18/04/2026
شکنه :
د جمعې په ورځ غرمه اکثره وخت زه پر کور یم کورنۍ مي زما د فرمایش سره سم غرمنۍ را تیاروي ،
نن یې راته وویل غرمې ته چشي درپاخه کړو ، ما ورته وویل. شکنه را تیاره کړئ
ول شکنه چشي ده ؟
ما ورته وویل یو خوندوره غذا ده چي د ښوروا په شکل خوړل کیږي ، موږ په کوچنیوالي خورا ډېره خوړل ، او په هرکور کي پخېدل. خصوصاً زموږ د غریبو هیواد والو دپاره هم اقتصادي تمامېدل او هم به یې ګوله غوړه وه .
پیاز په غوړو کي سره کړئ ، ورسته لږ اوړه ، مالګه ، کورکمن ، رومیان او مرچ ورواچوئ ،. ورسته د ضرورت په اندازه اوبه ، په آخره کي څلور دانۍ هګۍ هم ورلویږي ، په دې ښوروا کي هګۍ د غوښو رول لوبوي ، خو که پټاټې ورولوېږي خوند به یې یو په دوه سي .
د جمعې د لمانځه ورسته چي کور ته راغلم شکنه یې تیاره کړې وه او په خوند مي وخوړل. زموږ ددې پخوانيو خوړو نوم لا اوس د خلګو هېر دی . او پخېدل یې هم آسانه دي .
نه پوهېږم چي زموږ خلګو دا متل تر څه پوري ویلئ دئ
( په داغه شکنه یې پوري کوه )
