Guide mamati dz

23/07/2026

نعلم بلي الأغلبية راهي تعرف هذي المعلومة، بصح حبيت نذكركم فقط ❤️

رانا في فصل الصيف والحرارة عالية، وكاين بزاف مواد غذائية تقدر تفسد بسرعة إذا ما تخزنتش مليح.

وبالخصوص البيض 🥚، تولّهوا مليح عليه!

ما تخسري والو، غير دقيقة من وقتك ❤️حطي البيض في إناء فيه ماء، والبيض لي يطلع للفوق كيما في الصورة راه غالبًا ماشي طازج، أما لي يبقى في القاع فهو أفضل.

ديريها عادة قبل ما تستعملي البيض، خاصة في هاذ السخانة 🌸

دقيقة من وقتك تقدر تحمي عائلتك ❤️

26/05/2026

🐑 واش هي أجزاء الكبش لي ما تصلحش للرضيع؟ 🚫👶
بمناسبة عيد الأضحى، كامل نحبّو نفرحو بولادنا ونذوقوهم من الأضحية 🥰
بصح لازم نردّو بالنا، لأن جهاز الرضيع الهضمي مازال حساس وما يقدرش يتحمل بعض أجزاء الكبش، خاصة عند الأطفال أقل من عام ( اقل من سنة ) ⚠️
هادو أهم الأجزاء لي يُفضّل تبعديها تمامًا عن الرضيع:
🫁 الدوّارة والأحشاء (الكرشة، الرية...)
تكون ثقيلة بزاف على المعدة، ومعمرة بدهون وبكتيريا ممكن تسبب انتفاخ، مغص، إسهال أو اضطرابات هضمية، حتى مع التنظيف الجيد.
🥓 الشحم والدهون الزائدة
جهاز الرضيع الهضمي مازال ما يفرزش العصارات الكافية لهضم الدهون الثقيلة، لذلك الشحم يقدر يسبب عسر هضم، تقيؤ أو إسهال بدون أي فائدة غذائية حقيقية للطفل.
🧠 المخ
يحتوي على نسبة عالية جدًا من الدهون والكوليسترول، وهادي تعتبر حملاً كبيرًا على الكلى والجهاز الهضمي عند الرضيع.
🐑 البوزلوف
رغم أن الكثير يحبوه، إلا أنه غني جدًا بالدهون خاصة في الخدود واللسان، إضافة إلى خطر العظام الصغيرة.
كما أن عملية الشيّ على النار تخلّي بقايا مواد محروقة وكاربون قد تكون مضرة بصحة الرضيع.
🐽 الخصية
غير مناسبة إطلاقًا للرضع بسبب طبيعتها الثقيلة واحتوائها على نسبة عالية من الهرمونات، إضافة إلى قوامها المطاطي الذي قد يشكل خطر اختناق عند الطفل.

🫘 الكلى
الكلى تعتبر “مصفاة” الجسم، لذلك تكون مركزة بالأملاح والفضلات والمعادن الثقيلة، وهاد الشي يفوق قدرة كلى الرضيع الصغيرة وغير الناضجة.
🐏 الطحال
غني جدًا بالحديد والدم والمعادن المركزة، وقد يسبب اضطرابات هضمية وإسهال عند الرضع بسبب صعوبة هضمه.

✅ الأفضل للرضيع يكون: لحم طري ونظيف بدون شحوم ، مطهو مليح بدون ملح أو توابل قوية، وبكميات صغيرة تناسب عمره 👌💚

🎈 العيد فرحة، وصحة ولادنا أولوية دائمًا.

26/05/2026

يوم عرفة ♥️

26/05/2026

كبدة الخروف مسموحة وممتازة جداً للرضيع ابتداءً من الشهر السادس، لأنها أغنى مصدر طبيعي بالحديد اللي يحميه من فقر الدم، وفيها فيتامينات تقوي المناعة! 🥩💪
​بصح حذاري! كاين 3 أخطاء قادرة تضر وليدكِ:
1️⃣ ممنوع الملح: اطبخيها مسوسة تماماً.
2️⃣ ممنوع الشحم (الملفوف): عطي له الكبدة الصافية برك، الشحم خطير وثقيل على معدته.
3️⃣ ممنوع تعطيها له قطع: الكبدة تتفتت وممكن تسبب له شرق (إختناق)؛ لازم تطبخيها مليح حتى تذوب، وتهرسيها مع شوية خضار وماء دافئ أو قطرات زيت زيتون باش تجي طرية وسهلة البلع. 🥰🥣

25/05/2026

22/05/2026

❤️ ادعوا لأولادكم فى العشر الأوائل من ذي الحجه
❤️اللهم إنك وهبت لي ((اولادي )) من غير حول مني ولا قوة فاحفظهم بحفظك بلا حول مني ولا قوة
❤️اللهم احفظهم من أي مكروه يصيبهم ومن كل شر وضرر
❤️ اللهم احفظهم من الأسقام والأمراض
❤️اللهم لاتجعل ابتلائي فيهم اللهم أجرهم من الفتن ما ظهر منها وما بطن
❤️اللهم اجعلهم من صالح عبادك وحفظة كتابك ومن أحسن الناس دينا وعبادة وأخلاقا ومن أسعدهم حياة وأرغدهم عيشة
❤️ اللهم أغنهم بحلالك عن حرامك وبفضلك عمن سواك ربي كما حفظت كتابك إلي يوم الدين ،
احفظهم من الشيطان الرجيم
ربي ارزقهم صحبة الأخيار وخصال الأطهار و التوكل عليك يا قادر يا جبار
ربي أبعد عنهم أمراض القلوب والأبدان ، وبلغني فيهم غاية أملي بحولك وقوتك ياكريم يا منان
ربي متعني ببرهم في حياتي وأسعدني بدعائهم بعد مماتي وصلي اللهم وسلم وبارك على سيدنا محمد وآله الطيبين الطاهرين.

22/05/2026

ادراج لقاح جديد في الجدول و هو لقاح hpv human papilloma virus في عمر 11-13 سنة يحمي من اورام الرحم و اورام الانف و الحنجرة orl

18/05/2026

قريت خبر يقول بلي الـ U.S. Food and Drug Administration حذّرت من أي ماكلة ولا مشروب لونو أحمر، كيما ياغورت الفريز وحليب الفريز، وقالو بلي يسبب السرطان.
بصح كي راجعت الخبر، لقيت بلي المعلومة ماشي دقيقة كامل.
المشكل ماشي في أي حاجة لونها أحمر.

القضية بلي الـ FDA قررت تمنع صبغة صناعية معيّنة اسمها Red No. 3 ولا E127، لي تستعمل في بعض الماكلة، المشروبات وحتى بعض الأدوية لي تتبلع.

علاه؟

خاطر كاين دراسات دارت على ذكور الفيران، وبجرعات كبيرة بزاف، لقات ارتباط بينها وبين ظهور أورام.
بصح مهم بزاف نفهمو الفرق:
ياغورت الفريز وحدو ماشي هو المشكل.
الفريز الطبيعي ماشي هو المشكل.
وماشي أي مشروب أحمر يعني خطر.
المشكل يكون كي تكون هذيك الصبغة الصناعية مضافة للمنتج.
يعني بدل ما نخافو من أي حاجة لونها أحمر، نديرو حاجة أبسط وأذكى:

👈👈 اقراو المكونات.
إذا لقيتو Red No. 3 ولا E127، حاولو تنقصو منو ولا اختارو بديل خير.
والأهم من هذا كامل، نقصو من المنتجات المصنعة بزاف قد ما تقدروا.
ماشي أي خبر يخوف يكون صحيح. وساعات نصف الحقيقة يقدر يكون أخطر من الكذبة الكاملة 👌👍

18/05/2026

💚 نوضي نتي هي ساس الدار وكي طيحي كامل الدار طيح معك علابالي راكي تعبانة ويمكن حتى ما راكيش قادرة تكملي بصح وليداتك يحتاجوك قوية
انت القدوة ♥️

17/05/2026

🔴 ولدك ما ياكلش؟ مش دايمًا راه دلال… معرفة السبب هي نصف الحل 💚
اليوم حبيت نحكيلكم تجربتي مع ولدي 👶
بداية الأكل عندو كانت مليحة بزاف، بديتلو من 4 شهور و10 أيام، وكان ياكل عادي وكلش مليح حتى لعمر عام 🥰
من بعد حملت، وكان عندي وحام صعيب بزاف… لا أكل لا شرب، غير الغثيان والتقيّؤ 😔
وولدي كان ديما معايا يشوف فيا بهاذ الحالة… ومع الوقت تبدل كامل تعاملو مع الأكل.
🔴 بدا يرفض الأكل… ويهرب من أي حاجة جديدة!
بعد بحث طويل فهمت بلي العلم يفسر رفض الأطفال للأكل من زاويتين مهمين 👇

1️⃣ النيوفوبيا (Neophobia)
وهي خوف فطري من تجربة أي أكل جديد.
يعني الطفل يشوف الأكل الجديد كأنه “حاجة مجهولة”، فيخاف يذوقها.
العلم يقول بلي هذي غريزة قديمة عند الأطفال باش يحمو رواحهم من أي أكل يقدر يكون خطر.
2️⃣ الحساسية الحسية
الأطفال عندهم حاسة ذوق أقوى بزاف من الكبار 😳
يعني الطعم لي نحسوه عادي، هوما يقدرو يحسوه قوي بزاف.
خصوصًا المرورة تاع بعض الخضر، يذوقوها أقوى منا بمرات، لذلك يرفضوها بسرعة.

وحالة ولدي كانت من النوع الأول 👈 نيوفوبيا الأكل.
👶 نيوفوبيا الأكل عند الأطفال (Food Neophobia)

هي خوف أو رفض الطفل لتجربة أطعمة جديدة، وهي حالة شائعة بزاف خصوصًا بين عمر سنة حتى 5 سنين.

🌱 علاش تصرا؟

✔️ مرحلة طبيعية فالتطور
✔️ يحب الروتين ونفس الأكل كل مرة
✔️ يقلد الوالدين
✔️ تجربة سلبية سابقة
✔️ أو حتى يشوف الأم تتقيأ ولا ترفض الأكل… كيما صار معايا.

👶 كيفاش تبان؟

▪️ يرفض أي أكل جديد مباشرة
▪️ يشم ويعاين بصح ما يذوقش
▪️ يطلب نفس الوجبات ديما
▪️ يبكي أو يغضب وقت الماكلة
▪️ غير يشوف حاجة جديدة يهرب 😅

⚠️ هل هذي حاجة خطيرة؟

غالبًا لا، وهي مرحلة وتفوت 💚
بصح لازم ننتبهو إذا:
❌ الطفل ما عندوش تنوع كامل فالأكل
❌ الوزن أو النمو ناقص
❌ يرفض مجموعات كاملة كيما الخضر أو البروتينات.

💡 وش ساعدني مع ولدي؟

👈 قدّمي الأكل الجديد بزاف مرات بدون ضغط
الطفل يقدر يحتاج يشوف الأكلة 10 حتى 15 مرة قبل ما يذوقها 😅 الرفض من أول مرة ما يعنيش فشل.

👈 خليه يشارك فالتحضير
ولدي بديت نخليه يكسر البيض، يخلط، يزيد الملح…
الطفل كي يشارك يحس بالأمان أكثر ويولي يحب يذوق ❤️

👈 الجو يكون هادئ بلا عصبية
بصح نعترف 😅
كاين مرات كنت نجبرو غير على “المغرفة الأولى” باش يذوق ويعرف بلي الأكل ما يضرش بدون عصبية … وبعدها يكمل ياكل عادي لأنه يكتشف بلي بنين 😍 و ميضروش اذا شفتيه رفض بعدها حبسي

👈 كولي قدّامو نفس الأكل
الأطفال يقلدو بعينيهم أكثر من كلامنا 👀
كي يشوفك تستمتعي بالأكل يتحمس يجرب قعدوه معاكم ف طابلة كولو جماعة

👈 عطيلو اختيار محدود
بدل: “واش تحب تاكل؟”
قولي: “تحب جزر ولا خيار مع الغدا؟” 🥕🥒
هكا يحس روحو يقرر وحدو.

🚫 حاولي تتجنبي:
❌ الضغط والصراخ
❌ العقاب
❌ تخبية الأكل بطريقة تخليه يفقد الثقة
❌ الاستسلام بسرعة.

💬 مع ولدي لقيت نتيجة و لكن مزالها مش 100% رانا مواصلين بإذن الله لانو مرحلة هدي تحتاج صبر وقت برك يتحسن الطفل و يتجاوزها
شكون مرت عليه هدي حالة ؟؟؟؟؟ شاركونا تجاربكم و نحاولو مع بعض نلقاو حلول حسب حالة

#الأمومة