هقولكم قصه قصيرة عن هشام دياب
ومين الشخص اللي انتوا عامليين لايك لصفحتوا ده
بصوا انا بدايتي كانت مصمم ازياء في شركه ملابس مصريه اسمها مومو .وكنت رئيس ل مصممين ازياء معايا في قسم التصميم وفي منهم دلوقتي ناس مشهورة جدا وهعرفكم عليهم مع مرور الوقت انا نفسيتي مش وحشه من اي حد انا ممكن ادعم اي شخص انا مؤمن بموهبته
المهم كنت بعمل حاجات كتير .تسويق وتخطيط ل الكوليكشن بتاع السيزون وطرق عرض الكوليكشن في
المحلات وطرق تصميم الواجهات الدعائيه وتصوير الكوليكشن من الاخر اللي انا. اللي بحكيهولكم ده مسمي اكبر واشمل من مصمم ازياء اللي هو (fashion director )كنت داخل في كل التفاصيل
وقعدت معاهم 6 سيزونز. لغابه 2009وبعد انفصالي عنهم دخلنا في مشروع دعايه وتصوير خارجي مره في 2010 وبعدين ماتواصلناش في مشروع يجمعني ب مومو فلما انهيت تعاقدي حبيت اعمل حاجه جديده وادخل مجال الآوت كوتيور .اتعرفت على محمد داغر. ومضينا عقد ممكن تقولوا عقد شفوي بانضمامي معاه وكانت مهمتنا اللي اتفقنا عليها اننا نعمل اول بيت أزياء باسم داغر .انجازاتي مع داغر كتيره يكفي ان العبد لله لما كان بيحب يعمل براين ستورمينج لافكار كان بيجيبني عشان أحرك تفكيروا وأطورو وعملتلوا اول بيل بورد لمصمم ازياء في تاريخ مصر يعلن عن نفسوا وكان على كوبري اكتوبر اول ما شفت الاعلان حسيت اننا انتصرنا وخدني بالعربيه وعدينا علي كوبري اكتوبر ومش هنسي كلامو (احنا حققنا انتصار يا هشام)
وعلي فكره مفيش مصمم ازياء عمل اعلان خارجي من ساعتها .ده انتصار للموضه يا أحبابي
حاجه جديدة محصلتش واحنا عملناها✌
المهم بعد سنتين من الشغل معاه حصلت خلافات (من الاخر هشام بقى داغر بيسمعلوا فلازم يمشي)
فقررت الانسحاب بهدوء عشان احتفظ بصداقه شخص بالنسبالي أحسن من انجبت مصر من مصممين ازياء علي مستوى تاريخها وكفايه جايزه بيير كيردان وجايزه ميامي فاشون وييك وغيرو
انا بحبه وهفضل طول عمري افكر الناس بيه
رحمه الله عليك يا صديقي ومعلمي آخر مره شوفتوا بالصدفه كانت في زارا سيتي ستارز قالي تعالي تعالى انا هشتري لبس تعالى اختارلي لبسي
كانت قبل وفاته ب شهر مع العلم انا عملت لداغر كوليكشن جواكت شتوي ليه يعني مصمم أزياء بيلبس مصمم أزياء كانو اربع جواكت
(بعد موتو صديقه ليا قالتلي انت مش بتعيط عليه ليه.ببساطه عشان هو ماماتش بس ساعات بفتكره وقلبي بيوجعني)
بعد كده اتجهت ان اعمل مشاريع مستقله مع مصممين ازياء.أبرزهم استاذي هاني البحيري ولكن مكانتش عن التصميم
ولكن مشاريع لتطوير الموضة في العموم ولكن مفيش حاجه تمت كنا بنعمل براين ستورمينج و ترتيب افكار لكن في ارض الواقع مفيش حاجه تمت ولكن شرف لاي حد في مجال الموضه انو يكون في صداقة هذا العملاق وعلي فكره هاني البحيري علي المستوي الشخصي انسان محترم جدا من كتر ما بيقولي حضرتك وهو بيكلمني بقولوا يا استاذي وبناديه كده عشان المقامات محفوظه يا جماعة تاريخ الموضه الحديث في مصر كاتب اسمو (سوءا اختلفت مع اللي بيقدمو او حبيتوا)
وفي اسماء تانيه دخلت معاها في ورش عمل ابداعيه بس مش هيكفي البوست اعرضهم كلهم
وهم من كبار مصممين الأزياء حاليا اللي بتشرف بمعرفتهم وصداقتهم.المهم وبعد كده كنت محتاج افهم تصميم الديكور الداخلي وجاتني فرصه ان ادخل في مشاريع ودخلت فيها واستمريت لمده سنه ونص (هي كانت بتجيب فلوس كتيير .بس مش هي دي انا .انا دخلتها من ناحيه الفضول وان لازم افهم لارتباط مجال الموضه بعلوم كتيير في حياتنا )
وبعدين قررت اثقف نفسي اكتر واتابع الموضه من وجهه النظر الدوليه والنواحي التسويقيه فدخلت في كورسيز اون لاين وخدت معرفه في نواحي كتير وعرفت ليه مش كل مصممين الأزياء ناجحين حتي لو كانت موهبتهم جبارة)
وبعدين عملت عمليه خطيره في المخ وكنت حرفيا ميت ولكن ربنا لسه مأذنش بمعاد الموت ولو مت ماكنتش اصلا هكتب الكلام ده كنت هبقى في طي النسيان.ذاكرتي ممكن ماتفتكرش اسماء الناس ولكن أنا مبنساش وش شفتوا. فتره حاولت استفاد منها على قد ما اقدر وبعدين وقعدت سنه في البيت ابحر في علوم الموضه على الانترنت من كورسات ومقالات وابحاث وطرق التسويق الحديث والسوشيال ميديا وخدت معرفه تخليني اقدر اقف قدام آننا وينتور وماخافش وبعدين دخلت في مشاريع كتيره مع مصممين جدد بدون اجر بنوع من التحفيز ونقلتلهم علم يستفادوا بيه وفي نفس الوقت احنا بنستمتع بالموضه
انا طول عمري بعيد عن ال سبوت لايتس عشان انا مش عايز كده لاني من النوع اللي بيعقد يبدع لوحدوا كتير. الحياة الصاخبة مش موودي.فقررت اني افتح صفحه عن الموضه بعيد عن صفحات الموضه اللي في مصر يعني مش فساتين وكده انا عايز الموضه تبقى حياه يوميه ونستمتع مع بعض بخلطه من المعلومات افتكر اني بعرضها بطريقه صحيحه وده بدليل التشجيع المستمر منكم انا بحب الموضه ممكن اصمم رجالي وحريمي عشان انا خبرتي خليط من الإتنين قررت .اني بعد 9 سنين في رحلة الموضه اعمل لاين ملابس باسمي واخيرا بعد رجوعي من وراء الكواليس وفي ناس كتير كسبت من هشام وهشام مكسبش حاجه منهم بدليل انهم معروفين وانا محدش يعرفني .عشان ببساطه انا بعمل حاجه بحبها ومش عايز من الناس حاجه غير اني لما اقابل ربنا اقولوا اني عمري أفنيته إني أطور عقول الناس واخليهم يستمتعوا بنفسهم مهما اختلفت شخصياتهم عشان نفسكم ليها حق عليكم .لازم تبسطوا نفسكم عشان يا جماعه مفيش حد وحش ربنا مش بيخلق ناس وحشه احنا بس اللي نفوسنا وحشه بس فطرتنا واللي اتولدنا عليه ناس كويسه
وانا حاليا قدامي عرض من بره مصر ولكن هنشوف لما يتم هقول عنو وكمان في مرحله رسم ميني كوليكشن كوكتيل دريسيز من سن 15 الي 29
شايفين بحدد اهو😂 ده العلم بتاع الموضه تبقى عارف انت هتعرض ايه للناس لاحترام عقولهم وهبيعوا في اون لاين ستور لما يطلع من الإنتاج
وفي حاجتين افخر انهم مسجليين باسمي في وزاره العدل المصرية
-اسبوع الموضه في القاهره
-مجلس مصممين الأزياء في مصر
ولكن مفيش لسه تنفيذ للمشاريع دي .عشان ضيق الوقت للبحث عن سبل تنفيذها. الموضه رايحه في داهيه عندنا عشان مفيش هيكله فعليه للمجال ده
بس فكرتهم مسجله باسمي لضمان حقي الأدبي فيهم
انا للاسف معنديش اي صور لشغل ليا عشان ببساطه مفيش حاجه بيور هشام.لاني كنت رأس الهرم ولكن في ناس معايا تانيه فمش عايز انسب نجاح منتج عليا وكمان في مشاهير كلنا بنحبهم لبسوا من هشام بس انا مصورتش حاجه
وده غلط مني طبعا
زمان في تي شيرت رجالي عملتو في مومو صاحب مومو كان هيفصلني😂 قالي ايه اللي هببتوا ده
قلتلوا هيتباع ماتخافش 😂 اسمع مني
نزل المحلات اتباع
وعمل اوردر ل 2سيزونز جايين(انا صح .انا صح😂😂😂✌✌)
المهم انا كتبتلكم لمحه عن مافي حياتي بفخر اني انجزتها ولسه مكمليين ولكن في حاجات تانيه كتيير مش هعرف اكتبها كلها وفي سوااد كتيير برضوا مش هعرضوا عشان بس نديكم امل و ان مفيش حاجه صعبه وانتوا كلكم تقدروا تبقوا الشخص اللي نفسكم فيه طول ما في إيمان بده جواكم
وانا معاكوا اهو
ولما نشوف الجاي في ايه
ولو مت مثلا من قبل ما اكمل الهدف اللي بسعى ليه انتوا موجودين وكملوا حتى لو بتحبوا الموضه وبتشتغلوا في مجال تاني .حب الموضه يكفي
محدش يهاجمني يا جماعه انا مش بهاجم حد وبحترم كل الناس طلبي بسيط مش عايز تعظيم عشان انا مش عظيم ومش عايز حد يقل أدبوا عليا عشا أنا مش هقل أدبي علي حد انا راجل مسالم ولا ابحث عن الضوضاء
وياجماعه انا طول عمري الناس بتناديني
الواد بتاع الموضه
انا كده و لا تقولولي مصمم أو خبير موضة ولا اي حاجه...انا ببساطه بحب الموضه
شكرا ليكم ومره كمان محدش يهاجمني ده انا
من غير رتوش او اصطناع
ومستمروون
