25/11/2025
( النداهة )
بتنده عليا الدقايق
بتسحبني لعدة سنين
تتراكم عليا الحقايق
ويدوس علي قلبي الحنين
اوقات بكون فايق
وكتير بنام حزين
فكرك لو مكنتش انا
كنت هبقا مين ؟
هل كان وارد ساعتها تحبيني
او تشوفي صورتك فعيني
ف تغضي الطرف عن عيبي
هل كان وارد نكمل ؟
ولا اتكتب عليا أتحمل
غيابك في كل الحالات
وصعب الحلم يتأول
طبع الطبع يتحول
حرام البعد لو طوّل
وانا الغلطان من الأول
أنا الغلطان
وانا الغرقان
وانا الآثم
وانا المتلام
انا .. إنسان
كل اللي انا فاكره
اني نمت فيوم زعلان
وصحيت لقيتني مش لاقيني
لا شيء قادر يضحكني
ولا الوجع أصبح يبكيني
بقيت متحاوط بسور بُعدك
قفلتي عليا وسبتيني
بحارب لوحدي شياطيني
والنوم اللي كنت بهرب بيه
عاقبني و بطل يجيني
مكنتش عارف ليلتها
وانا بكتبلك أول بحبك
إن دي هتكون آخرتها
وبعد القرب هتغيبي
وأمد ايديا وتسيبي
كان ليه يجمعنا الطريق
لما انتي مش نصيبي ..
جريت وراكي كما المسحور
والكون بيدور جوا عنيكي
درت معاه أنا المفتون
أملاً حبي يرضيكي
وأتاري الحب نداهة
بتندهلك وقت توهانك
لو كنت أصم كان زمانك
عايش لسة دلوقتي
وحالتك عكس حالتي
انا طيفها واخد مساحتي
بصبر نفسي واقول اهي فترة وتعدي
ميعديش غير الوقت
" لو أني أعرف خاتمتي ما كنت بدأت "
