27/05/2025
لو عندك ولد و عايزه تربيه انه يطلع راجل ذو مروءة و أدب و ديانه و شهامة و أصالة دي شوية حاجات يمكن تساعدك
1️⃣- يقوم بمهام في البيت فيها شوية قوة بدنيه
زي تغيير قارورة المية / إخراج الزباله(و تبقي مفهماه ان الأصل ان النساء متسترات و ميخرجوش كتير و ان خروجه هو أسهل ) / لو عايزه تزقي حاجه نادي عليه / يشيل طلبات البيت و هكذا
و تبقي مفهماه ان هيكله البدني مختلف عنك و ده يأهله لمهام هو يقوم بيها افضل منك عشان طبيعة خلقته
* ف ده يخليه يبني تصور ذهني ان جسمه زي ما فيه أفضلية فعليه تكليف.
2️⃣- في التعاملات الخارجية ف الشارع صدريه
اي تعاملات فعليا
و هتتفقي معاه ع ال set up قبل ما تدخلوه
يعني هندخل المكان الفلاني انت هتتصرف بالشكل الفلاني و هتطلب كذا و كذا
و حضرتك هتبقي واقفة ف ضهره ساكتة تماما حتى لو غلط
ليه بقى هتسكتي لو غلط؟
عشان حاجتين
الأولى: انك تزرعي انه عادي يغلط لو تصدر .. فميخافش من التصدر اصلا
ثانيا:انه يتعود بدام خد دفة القيادة ميبقاش فيه صوت ورا بيعدل عليه ( تلت اربع مشاكل البيوت هي ف الخناقة على مين اللي سايق اصلا)
طيب لو غلط هتعملي ايه
هتسبيه يخلص معاملته غلط عادي خالص
و بعد كده هتقوليله ان التصرف الصح كان كذا و كذا بس انا مقدرتش اتكلم و انت واقف مع الرجالة (بظبط كده)
اما لو هو طلب مساعدتك فاتدخلي بصوت واطي و شكل لطيف من غير ما تحسسيه انه مش عارف يتصرف
و قوليله انك واثقة جدا انه هيقدر يخلص اللي ف ايده ده على أكمل وجه
ضروري اوي لما تصدريه .. تزرعي فيه الثقة انه اهل للتصدر .. عشان ميبقاش التصدر فيلم رعب بنسبة له زي ما كتير من الامهات عملوا الله يسامحهم
لا عادي تتصدر .. و انت اهل ل ده .. و انا واثقة فيك .. و حتى لو غلطت محلولة. .. ادينا بنتدرب.
3️⃣- يتعلم مهارات قتا.لية و فروسية
عشان جسمه ينشف و قلبه يقوى
4️⃣- انا مع جدا الشغل من الصغر لانه بيفتح الذهن و بيخلي الانسان يكتسب خبرات بدري بدري و يبقى سابق سنه و مختلط بالمجتمع
لو في مكان آمن للشغل
ارميه فيه
5️⃣- يقعد في مجالس الرجال
و يتعلم على ايد شيخ مش شيخه
و ياخد درس مع مدرس مش مدرسة
عشان يفهم نفوس الرجال بدري
و يلقط طريقتهم
6️⃣- عشان تخلقي جواه الصلابة العقلية
اتكلمي معاه ف مواضيع عامة
و خدي رأييه كأنه استشاري مش طفل
و قوليله تفتكر الموضوع ده يتحل ازاي؟
انا بثق في عقلك جدا
فيحس انه قادر ع الحل .. و انه تشغيل المخ مش خطيئة 😁
7️⃣- لما يجي يحكيلك مشكلة خاصة بيه
و انت شايفاه غلط
اوعي اوعي تبادري بالحل
احنا عايزين رجال مبادرين
مش احنا اللي نحللهم
أسأليه حسيت ايه
و ايه الفكرة المحركة للشعور ده
و الفكرة دي بتحاول تقولك ايه
طب و انت شايف الحل ازاي؟
زقيه انه هو اللي يتحرك و يفكر و يحل
مش انتي
لو قالك ابعتي للميس
قوليله لا ابعت انت
كلمي الإدارة .. لا روح انت
و هكذا
علميه انه يواجه و ميخافش م العواقب و انك كده كده ف ضهره
بس مش قدامه !
