31/10/2020
نقول تاني للناس اللي لسه بتسال
👇👇👇👇👇
الرجاء القراءة جيدا للاستفاده🙏
الفرق و مواصفات كل معيار :
(1) الكريم يعتبر ملابس جديدة أو شبه جديدة و نسبة براندات عالمية و مشهورة..
(2) الواحد × كريم يعتبر ملابس شبه جديدة و نسبة براندات لا بأس بها..
(3)النمرة واحد يصنف كملابس بحالة جيدة إلي حد كبير..
(4) البالات السحبة تعتبر ملابس خليط بين الجيد و المتوسطشرح مفصل للبالة و الطريقة الصحيحة لفتح أى بالة و تسعيرها و عدد القطع فى كل بالة
. يعني إيه بالة؟
البالات هى ملابس إستعمال أجنبي بيكون مستعمل خفيف و معظمها ماركات عالميه منتجة لمواصفات الأسواق الأوروبية
المعايير أو الدرجات المتعارف عليها للبالة من الأعلى جودة و سعر إلى الأقل بالنسبة للسوق المصرى :
(1) البالة الكريم
(2) البالة الواحد × كريم
(3) البالة نمرة 1
(4) البالات السحبة أو 2 × 1
(5) البالات النمرة 2
. يعني إيه ملابس كريمة أو بالة كريم؟
هى أفضل أنواع البالات و بيبقى فيها عادةً نسبة ملابس بالتيكت أو جديد بدون تيكت أو مستعمل خفيف..
و تُقيم كالآتى :
البالات الكريم
(1) شبه جديد و جديد فعلاً
(2) موديلات عالية
(3) ماركات عالمية
(4) نسبة تيكت علي الأقل 10%
(5) نسبة هالك صفر
وزن البالة قد إيه و أصنافها وعدد القطع قد إيه؟
وزن البالة في الأغلب 50 كيلو ..عدد القطع بيتوقف على الصنف و الجودة و الموسم (صيف أو شتاء) وفى أغلب الأحيان كل ما ترتفع الجودة بتكون البالة فيها ما خف وزنه و زادت قيمته
. إزاى أعرف البالة دى درجة تانية ولا أولى ولا كريم؟
لما تفتح البالة متستعجلش في الحكم عليها لازم تفرزها بناء على :
(1) الجودة هل الملابس جديدة أو شبهه جديدة و لا ظاهر عليها الإستهلاك..
(2) الموديلات هل هى حديثة و مقبولة و لا موديلات قديمة و مش متناسبة مع الموديلات الدارجة فى السوق المصرى..
(3) الماركات هل هى مشهورة و لا ماركات مش معروفة..
(4) الخامات هل هى عالية و جيدة و لا خامات شعبية..
. شرح الطريقة الصحيحة لفتح البالة المقفولة وتسعيرها :
من الأخطاء اللى بيقع فيها أى حد جديد في مجال البالة إنه بيقسم سعر البالة على عدد القطع وبيبتدي يبيع بناء على سعر تكلفة موحد للقطعة
مثال لفتح بالة غلط :-
بالة ب 9000 ج و فيها 300 قطعة
يبقي سعر القطعة = 9000 ÷ 300 = 30 جنيه للقطعة
و يبدأ التاجر يبيع القطع على اساس ان القطعة واقفة عليه ب 30 جنية ويحط سعر مثلاً 60 ج للقطعة (و ده غلط ) لييييه؟؟
لأن الزبون هينقي ويشتري أجود و أحسن القطع بسعر ال 60 جنية وهيسيب الباقي اللى مع الوقت هتضطر تخفض في سعره مرة ورا مرة ورا مره لحد ما تلاقي نفسك بتبيع أقل من سعر التكلفة و هتخسر ساعتها.
طيب نفتح البالة صح إزاي؟
مثال لفتح البالة (بطريقة صحيحة)
ذى ما ذكرنا في مثالنا إن البالة ب 9000 جنيه وطلع فيها 300 قطعة مثلاً
نقوم نفرز البالة قطعة قطعة .. و نخرج منها الممتاز و اللى شبهه جديد و اللى ماركات عالمية .. فرضاً طلع معانا 100 قطعة
نعمل إيه؟!!
نقسم سعر البالة كامل على ال 100 قطعة دول
9000 ÷ 100 = 90 جنيه
يعنى ال 100 قطعة دول هم اللى هيسددوا كل سعر البالة بالكامل .. وﻻزم تتباع كل قطعة منهم مش أقل من ال 90 جنيه أزيد أوك .. لكن أنقص ﻻاااا.
وهنا هيتبقي لنا ال 200 قطعة اللى في البالة .. ودول نحدد سعرهم براحتنا ونقدر نبيع القطعة بأقل سعر ونتحكم في ربحنا منهم .. لأن كلهم ربحنا من البالة .. لو بعت القطعة بأى رقم غالي أو رخيص فأنت الكسبان
أهم حاجة ال 100 قطعة الى ب90 جنية هم دول اللى هيجيبوا ثمن البالة .. والباقي كله المفروض يبقوا مكسب حتى لو بعت القطعة بسعر متدنى...... المقصد إنك هتكون كسبان .
..............................................................
سؤال دائم التكرار عن عدد القطع فى البالات
الأصناف الصيفى :-
50 كيلو ملابس اطفال = 450 قطعة تقريباً
50 كيلو قميص رجالى = 220 قطعة تقريباً
50 كيلو تى شيرت رجالى = 250 قطعة تقريباً
50 كيلو فيست وبدى = 280 قطعة تقريباً
50 كيلو شيميز وبلوزة = 400 قطعة تقريباً
50 كيلو فستان/فيست = 150 قطعة تقريباً
50 كيلو شورت وبرمودا = 170 قطعة تقريباً
50 كيلو ملابس رياضية = 160 قطعة تقريباً
50 كيلو داخلى حريمى لانچيرى و أندر و سوتيان و كورسيه 800 قطعة تقريباً
50 كيلو بنطلون رجالى = 75 قطعة تقريباً
50 كيلو بنطلون حريمى = 90 قطعة تقريباً
50 كيلو بنطلون محير = 110 قطعة تقريباً
50 كيلو بنطلون إسبورت و ووتر بروف = 140 قطعة تقريباً
الأصناف الشتوى :-
50 كيلو ملابس اطفال ميكس من سن يوم ل 8 سنوات = 270 قطعة تقريباً
50 كيلو سويتر أولادى و بناتى = 70 قطعة تقريباً
50 كيلو سويت شيرت أولادى و بناتى = 165 قطعة تقريباً
50 كيلو كنزة أطفالى من سن يوم ل 8 سنوات = 370 قطعة تقريباً
50 كيلو جاكيت وسويتر رجالى = 50 قطعة تقريباً
50 كيلو سويت شيرت رجالى ثقيل = 110 قطعة تقريباً
50 كيلو سويت شيرت رجالى خفيف = 130 قطعة تقريباً
50 كيلو سويت شيرت محير ثقيل = 140 قطعة تقريباً
50 كيلو سويت شيرت محير خفيف بكُم = 250 قطعة تقريباً
50 كيلو بلوفر رجالى = 125 قطعة تقريباً
50 كيلو بالطو رجالى جوخ = 38 قطعة تقريباً
50 كيلو كنزة حريمى قصيرة = 200 قطعة تقريباً
50 كيلو كنزة طويلة حريمى = 140 قطعة تقريباً
50 كيلو درالون حريمى = 280 قطعة تقريباً
50 كيلو بليزر حريمى = 70 قطعة تقريباً
50 كيلو جواكت فرو طبيعى حريمى ثقيل = 25/30 قطعة تقريباً
50 كيلو جواكت و فيستات فرو طبيعى و صناعى خفيف = 70 قطعة تقريباً
50 كيلو بنطلون ترنج ميلتون = 135 قطعة تقريباً
*طبعاً الأرقام دى متوسطات تقريبية*
