04/07/2026
أنا جوزي كان مسافر لمدة 4 سنين، وكنت طول فترة سفره عايشة في شقتنا اللي موجودة في بيت العيلة. بعد سفره حصلت بيني وبين أهله مشاكل كبيرة، وفي الآخر طردوني أنا وبناتي من البيت.
اضطريت آخد بناتي وأروح أقعد عند أهلي، لكن ما ارتحتش هناك، فنزلت اشتغلت، ومن تعب وشقايا أجرت شقة وفرشتها علشان أعيش أنا وبناتي في مكان مستقر.
لما جوزي رجع من السفر النهارده، كلمته وقلت له ييجي يقعد معانا ويشوف بناته اللي بقاله 4 سنين بعيد عنهم، لكنه رفض، وقال إنه عايزني أرجع أقعد في الشقة اللي أهله طردوني منها.
أنا رفضت، لأني مستحيل أرجع مكان اتعرضت فيه للإهانة والضرب، وفوق ده كله أهله طول فترة غيابه ما سألوش على بناته ولا مرة، وهو وقتها ما وقفش معايا ولا جابلي حقي.
قولت له على الأقل تعالى شوف بناتك وسلم عليهم الأول، لكن للأسف راح لأهله قبل ما ييجي يشوف ولاده.
اللي واجع قلبي إن بناتي قاعدين يعيطوا وبيحملوني أنا المسؤولية، وبيقولولي: "يا ماما كنتِ ارجعي". لكن والله أنا مش قادرة أتنازل عن كرامتي بعد كل اللي شوفته.
أنا دلوقتي محتارة... هل أنا فعلًا غلطانة؟ ولا كان المفروض هو أول ما نزل من المطار ييجي يشوف بناته ويقعد معاهم، وبعدها يروح يسلم على أهله؟
