12/05/2026
هونوها على بعض
بدل العتاب الكتير
أصل الحياة مرهقة بما فيه الكفاية
في اللي بيضحك وهو مخنوق
وفي اللي ساكت علشان تعِب من الكلام
وفي اللي نفسه حد يسمعه أو يحتويه
حتى لو لدقيقة
فخلونا نهونها على بعض
اللي اتأخر متلوموش كتير
واللي غلط مرة متفكروش كل مرة بغلطته
واللي ساكت… اسألوه ماله
واللي بيحاول… قدّروا تعبه
واللي مبيسألش... متلوموش
هونوها على الأم
اللي شايلة فوق طاقتها
وعلى الأب
اللي شايل هم البيت والمصاريف
هونوها على أصحابكم
مش كل هزار يبقى تقيل
ومش كل كلمة تتقال وقت العصبية
هونوها على الناس
محدش عارف كل واحد إيه جواه
في ناس كل اللي محتاجاه حد يطمنها إن اللي جواها هيمر
يمكن كلمة منك تخفف عن حد حاجات كتير جواه
خلونا نهونها على بعض
#خاطرتي
