Deepak HV ವೆಂಕಟ್ ದೀಪಕ್ ನರಸಿಂಹ

26/01/2021

Kamala Harris, VP - US, started her first day in office with Sri Rudram Vedic Mantras on Lord Shiva . Chanting done by 2 Americans 👏

12/01/2021

28/05/2020

20/05/2020

ಶ್ರೀದತ್ತಾಪರಾಧಕ್ಷಮಾಪಣಸ್ತೋತ್ರಮ್

ದತ್ತಾತ್ರೇಯಂ ತ್ವಾಂ ನಮಾಮಿ ಪ್ರಸೀದ ತ್ವಂ ಸರ್ವಾತ್ಮಾ ಸರ್ವಕರ್ತಾ ನ ವೇದ ।
ಕೋಽಪ್ಯನ್ತಂ ತೇ ಸರ್ವದೇವಾಧಿದೇವ ಜ್ಞಾತಾಽಜ್ಞಾತಾನ್ಮೇಽಪರಾಧಾನ್ ಕ್ಷಮಸ್ವ ॥ 1॥

ತ್ವದುದ್ಭವತ್ವಾತ್ವದಧೀನಧೀತ್ವಾತ್ತವಮೇವ ಮೇ ವನ್ದ್ಯ ಉಪಾಸ್ಯ ಆತ್ಮನ್ ।
ಅಥಾಪಿ ಮೌಢ್ಯಾತ್ ಸ್ಮರಣಂ ನ ತೇ ಮೇ ಕೃತಂ ಕ್ಷಮಸ್ವ ಪ್ರಿಯಕೃನ್ಮಹಾತ್ಮನ್ ॥ 2॥

ಭೋಗಾಪವರ್ಗಪ್ರದಮಾರ್ತಬಂಧುಂ ಕಾರೂಣ್ಯಸಿನ್ಧುಂ ಪರಿಹಾಯ ಬನ್ಧುಮ್ ।
ಹಿತಾಯ ಚಾಽನ್ಯಂ ಪರಿಮಾರ್ಗಯನ್ತಿ ಹಾ ಮಾದೃಶೋ ನಷ್ಟದೃಶೋ ವಿಮೂಢಾಃ ॥ 3॥

ನ ಮತ್ಸಮೋ ಯದ್ಯಪಿ ಪಾಪಕರ್ತಾ ನ ತ್ವತ್ಸಮೋಽಥಾಪಿ ಹಿ ಪಾಪಹರ್ತಾ ।
ನ ಮತ್ಸಮೋಽನ್ಯೋ ದಯನೀಯ ಆರ್ಯ ನ ತ್ವತ್ಸಮಃ ಕ್ವಾಪಿ ದಯಾಲುವರ್ಯಃ ॥ 4॥

ಅನಾಥನಾಥೋಽಸಿ ಸುದೀನಬನ್ಧೋ ಶ್ರೀಶಾಽನುಕಮ್ಪಾಮೃತಪೂರ್ಣಸಿನ್ಧೋ ।
ತ್ವತ್ಪಾದಭಕ್ತಿಂ ತವ ದಾಸದಾಸ್ಯಂ ತ್ವದೀಯಮಂತ್ರಾರ್ಥದೃಢೈಕನಿಷ್ಠಾಮ್ ॥ 5॥

ಗುರೂಸ್ಮೃತಿಂ ನಿರ್ಮಲಬುದ್ಧಿಮಾಧಿವ್ಯಾಧಿಕ್ಷಯಂ ಮೇ ವಿಜಯ ಚ ದೇಹಿ ।
ಇಷ್ಟಾರ್ಥಸಿದ್ಧಿಂ ವರಲೋಕವಶ್ಯಂ ಧನಾನ್ನವೃದ್ಧಿಂ ವರಗೋಸಮೃದ್ಧಿಮ್ ॥ 6॥

ಪುತ್ರಾದಿಲಬ್ಧಿಂ ಮ ಉದಾರತಾಂ ಚ ದೇಹೀಶ ಮೇ ಚಾಸ್ತ್ವಭಯ ಹಿ ಸರ್ವತಃ ।
ಬ್ರಹ್ಮಾ-ಽಗ್ನಿ-ಭೂಮ್ಯೋ ನಮ ಓಷಧೀಭ್ಯೋ ವಾಚೇ ನಮೋ ವಾಕ್ಪತಯೇ ಚ ವಿಷ್ಣವೇ ॥ 7॥

ಶಾನ್ತಾಽಸ್ತು ಭೂರ್ನಃ ಶಿವಮನ್ತರಿಕ್ಷ ದ್ಯೌಶ್ಚಾಽಭಯಂ ನೋಽಸ್ತು ದಿಶ ಶಿವಾಶ್ಚ ।
ಆಪಶ್ಚ ವಿದ್ಯುತ್ಪರಿಪಾನ್ತು ದೇವಾಃ ಶ ಸರ್ವತೋ ಮೇಽಭಯಮಸ್ತು ಶಾನ್ತಿಃ ॥ 8॥

॥ಇತಿ ಶ್ರೀವಾಸುದೇವಾನನ್ದಸರಸ್ವತೀವಿರಚಿತಂ
ದತ್ತಾಪರಾಧಕ್ಷಮಾಪಣಸ್ತೋತ್ರಂ ಸಮ್ಪೂರ್ಣಮ್ ॥

04/05/2020

ಶ್ರೀ ಸೌಭಾಗ್ಯ ಕವಚ ಸ್ತೋತ್ರಮ್
॥ ಪೂರ್ವಪೀಠಿಕಾ ॥

ಕೈಲಾಸಶಿಖರೇ ರಮ್ಯೇ ಸುಖಾಸೀನಂ ಸುರಾರ್ಚಿತಂ
ಗಿರೀಶಂ ಗಿರಿಜಾ ಸ್ತುತ್ವಾ ಸ್ತೋತ್ರೈರ್ವೇದಾನ್ತಪಾರಗೈಃ ।
ಪ್ರಣಮ್ಯ ಪರಯಾ ಭಕ್ತ್ಯಾ ತಮಪೃಚ್ಛತ್ ಕೃತಾಂಜಲಿಃ
ರಹಸ್ಯಂ ರಕ್ಷಣಂ ಕಿಂ ವಾ ಸರ್ವಸಮ್ಪತ್ಕರಂ ವದ ॥

ಶ್ರೀಶಿವೋವಾಚ -
ಶೃಣು ದೇವಿ! ಪ್ರವಕ್ಷ್ಯಾಮಿ ಯಸ್ಮಾತ್ ತ್ವಂ ಪರಿಪೃಚ್ಛಸಿ
ಯಸ್ಯ ಶ್ರವಣಮಾತ್ರೇಣ ಭವಭೀತಿರ್ನ ಜಾಯತೇ ।
ಏತತ್ ಸೌಭಾಗ್ಯಕವಚ ರಹಸ್ಯಾತಿರಹಸ್ಯಕಂ
ಸೌಭಾಗ್ಯಕವಚಂ ದೇವಿ! ಶೃಣು ಸೌಭಾಗ್ಯದಾಯಕಮ್ ॥

ವಿನಿಯೋಗಃ -
ಅಸ್ಯ ಶ್ರೀಸೌಭಾಗ್ಯಕವಚಸ್ತೋತ್ರಸ್ಯ ಶ್ರೀಆನನ್ದಭೈರವ ಋಷಿಃ ।
ಅನುಷ್ಟುಪ್ ಛನ್ದಃ । ಶ್ರೀಸೌಭಾಗ್ಯಸುನ್ದರೀ ದೇವತಾ । ಓಂ ಕ್ಲೀಂ ಸೌಃ ಬೀಜಮ್ ।
ಹ್ರೀಂ ಕ್ಲೀಂ ಶಕ್ತಿಃ । ಆಂ ಹ್ರೀಂ ಕ್ರೋಂ ಕೀಲಕಮ್ ।
ಸರ್ವಸೌಭಾಗ್ಯಸಿದ್‍ಧ್ಯರ್ಥೇ ಪಾಠೇ ವಿನಿಯೋಗಃ ॥

ಋಷ್ಯಾದಿನ್ಯಾಸಃ -
ಶಿರಸಿ ಶ್ರೀಆನನ್ದಭೈರವಾಯ ಋಷಯೇ ನಮಃ । ಮುಖೇ ಅನುಷ್ಟುಪ್ಛನ್ದಸೇ ನಮಃ ।
ಹೃದಿ ಶ್ರೀಸೌಭಾಗ್ಯಸುನ್ದರೀದೇವತಾಯೈ ನಮಃ । ಗುಹ್ಯೇ ಓಂ ಕ್ಲೀಂ ಸೌಃ ಬೀಜಾಯ ನಮಃ ।
ಪಾದಯೋಃ ಹ್ರೀಂ ಕ್ಲೀಂ ಶಕ್ತಯೇ ನಮಃ । ನಾಭೌ ಆಂ ಹ್ರೀಂ ಕ್ರೋಂ ಕೀಲಕಾಯ ನಮಃ ।
ಸರ್ವಾಂಗೇ ಸರ್ವಸೌಭಾಗ್ಯಸಿದ್‍ಧ್ಯರ್ಥೇ ಪಾಠೇ ವಿನಿಯೋಗಾಯ ನಮಃ ।

ಷಡಂಗನ್ಯಾಸಃ -

ಕರನ್ಯಾಸಃ -
ಐಂ ಅಂಗುಷ್ಠಾಭ್ಯಾಂ ನಮಃ ।
ಕ್ಲೀಂ ತರ್ಜನೀಭ್ಯಾಂ ನಮಃ ।
ಸೌಃ ಮಧ್ಯಮಾಭ್ಯಾಂ ನಮಃ ।
ಐಂ ಅನಾಮಿಕಾಭ್ಯಾಂ ನಮಃ ।
ಕ್ಲೀಂ ಕನಿಷ್ಠಿಕಾಭ್ಯಾಂ ನಮಃ ।
ಸೌಃ ಕರತಲಕರಪೃಷ್ಠಾಭ್ಯಾಂ ನಮಃ ॥

ಅಂಗನ್ಯಾಸಃ -
ಐಂ ಹೃದಯಾಯ ನಮಃ ।
ಕ್ಲೀಂ ಶಿರಸೇ ಸ್ವಾಹಾ ।
ಸೌಃ ಶಿಖಾಯೈ ವಷಟ ।
ಐಂ ಕವಚಾಯ ಹುಂ ।
ಕ್ಲೀಂ ನೇತ್ರತ್ರಯಾಯ ವೌಷಟ್ ।
ಸೌಃ ಅಸ್ತ್ರಾಯ ಫಟ್ ॥

ಧ್ಯಾನಂ -
ಐಹಿಕಪರಫಲದಾತ್ರೀಮೈಶಾನೀಂ ಮನಸಿ ಭಾವಯೇ ಮುದ್ರಾಮ್ ।
ಐನ್ದವಕಲಾವತಂಸಾಮೈಶ್ವರ್ಯಸ್ಫುರಣಪರಿಣತಿಂ ಜಗತಾಮ್ ॥ 1॥

ಕ್ಲೀಬತ್ವದೈತ್ಯಹನ್ತ್ರೀ ಕ್ಲಿನ್ನಮನಸ್ಕಾಂ ಮಹೇಶ್ವರಾಶ್ಲಿಷ್ಟಾಮ್ ।
ಕ್ಲೃಪ್ತಜನೇಷ್ಟಕರ್ತ್ರೀಂ ಕಲ್ಪಿತಲೋಕಪ್ರಭಾಂ ನಮಾಮಿ ಕಲಾಮ್ ॥ 2॥

ಸೌಭಾಗ್ಯದಿವ್ಯಕನಿಧಿಂ ಸೌರಭಕಚವೃನ್ದವಿಚಲದಲಿಮಾಲಾಮ್ ।
ಸೌಶೀಲ್ಯಶೇಷತಲ್ಪಾಂ ಸೌನ್ದರ್ಯವಿಭಾಮಂಜರೀಂ ಕಲಯೇ ॥ 3॥

ಪಾಶಪಾಣಿ ಸೃಣಿಪಾಣಿ ಭಾವಯೇ ಚಾಪಪಾಣಿ ಶರಪಾಣಿ ದೈವತಮ್ ।
ಯತ್ಪ್ರಭಾಪಟಲಪಾಟಲಂ ಜಗತ್ ಪದ್ಮರಾಗಮಣಿಮಂಡಪಾಯತೇ ॥ 4॥

ಹೇಮಾದ್ರೌ ಹೇಮಪೀಠಸ್ಥಿತಾಮಖಿಲಸುರೈರೀಡ್ಯಮಾನಾಂ ವಿರಾಜತ್ ।
ಪುಷ್ಪೇಷ್ವಿಷ್ವಾಸಪಾಶಾಂಕುಶಕರಕಮಲಾಂ ರಕ್ತವೇಷಾತಿರಕ್ತಾಮ್ ॥ 5॥

ದಿಕ್ಷೂದ್ಯದ್ಭಿಶ್ಚತುರ್ಭಿರ್ಮಣಿಮಯಕಲಶೈಃ ಪಂಚಶಕ್ತ್ಯಾಂಚಿತೈಃ ಸ್ವ ।
ಭ್ರಷ್ಟೈಃ ಕ್ಲೃಪ್ತಾಭಿಷೇಕಾಂ ಭಜತ ಭಗವತೀಂ ಭೂತಿದಾಮನ್ತ್ಯಯಾಮೇ ॥ 6॥

ಕವಚಸ್ತೋತ್ರಂ -
ಶಿಖಾಗ್ರಂ ಸತತಂ ಪಾತು ಮಮ ತ್ರಿಪುರಸುನ್ದರೀ ।
ಶಿರಃ ಕಾಮೇಶ್ವರೀ ನಿತ್ಯಾ ತತ್ಪೂರ್ವಂ ಭಗಮಾಲಿನೀ ॥ 1॥

ನಿತ್ಯಕ್ಲಿನ್ನಾಽವತಾದ್ದಕ್ಷಂ ಭೇರುಂಡಾ ತಸ್ಯ ಪಶ್ಚಿಮಮ್ ।
ವಹ್ನಿವಾಸಿನ್ಯವೇದ್ ವಾಮಂ ಮುಖಂ ವಿದ್ಯೇಶ್ವರೀ ತಥಾ ॥ 2॥

ಶಿವದೂತೀ ಲಲಾಟಂ ಮೇ ತ್ವರಿತಾ ತಸ್ಯ ದಕ್ಷಿಣಮ್ ।
ತದ್ವಾಮಪಾರ್ಶ್ವಮವತಾತ್ ತಥೈವ ಕುಲಸುನ್ದರೀ ॥ 3॥

ನಿತ್ಯಾ ಪಾತು ಭ್ರುವೋರ್ಮಧ್ಯಂ ಭ್ರುವಂ ನೀಲಪತಾಕಿನೀ ।
ವಾಮಭ್ರುವಂ ತು ವಿಜಯಾ ನಯನಂ ಸರ್ವಮಂಗಲಾ ॥ 4॥

ಜ್ವಾಲಾಮಾಲಿನ್ಯಕ್ಷಿ ವಾಮಂ ಚಿತ್ರಾ ರಕ್ಷತು ಪಕ್ಷ್ಮಣೀ ।
ದಕ್ಷಶ್ರೋತ್ರಂ ಮಹಾನಿತ್ಯಾ ವಾಮಂ ಪಾತು ಮಹೋದ್ಯಮಾ ॥ 5॥

ದಕ್ಷಂ ವಾಮಂ ಚ ವಟುಕಾ ಕಪೋಲೌ ಕ್ಷೇತ್ರಪಾಲಿಕಾ ।
ದಕ್ಷನಾಸಾಪುಟಂ ದುರ್ಗಾ ತದನ್ಯಂ ತು ಭಾರತೀ ॥ 6॥

ನಾಸಿಕಾಗ್ರಂ ಸದಾ ಪಾತು ಮಹಾಲಕ್ಷ್ಮೀರ್ನಿರನ್ತರಮ್ ।
ಅಣಿಮಾ ದಕ್ಷಕಟಿಂ ಮಹಿಮಾ ಚ ತದನ್ಯಕಮ್ ॥ 7॥

ದಕ್ಷಗಂಡಂ ಚ ಗರಿಮಾ ಲಘಿಮಾ ಚೋತ್ತರಂ ತಥಾ ।
ಊರ್ಧ್ವೋಷ್ಠಕಂ ಪ್ರಾಪ್ತಿಸಿದ್ಧಿಃ ಪ್ರಾಕಾಮ್ಯಮಧರೋಷ್ಠಕಮ್ ॥ 8॥

ಈಶಿತ್ವಮೂರ್ಧ್ವದನ್ತಾಂಶ್ಚ ಹ್ಯಧೋದನ್ತಾನ್ ವಶಿತ್ವಕಮ್ ।
ರಸಸಿದ್ಧಿಶ್ಚ ರಸನಾಂ ಮೋಕ್ಷಸಿದ್ಧಿಶ್ಚ ತಾಲುಕಮ್ ॥ 9॥

ತಾಲುಮೂಲದ್ವಯಂ ಬ್ರಾಹ್ಮೀಮಾಹೇಶ್ವರ್ಯೌ ಚ ರಕ್ಷತಾಮ್ ।
ಕೌಮಾರೀ ಚಿಬುಕಂ ಪಾತು ತದಧಃ ಪಾತು ವೈಷ್ಣವೀ ॥ 10॥

ಕಂಠಂ ರಕ್ಷತು ವಾರಾಹೀ ಚೈನ್ದ್ರಾಣೀ ರಕ್ಷತಾದಧಃ ।
ಕೃಕಾಟಿಕಾಂ ತು ಚಾಮುಂಡಾ ಮಹಾಲಕ್ಷ್ಮೀಸ್ತು ಸರ್ವತಃ ॥ 11॥

ಸರ್ವಸಂಕ್ಷೋಭಿಣೀಮುದ್ರಾ ಸ್ಕನ್ಧಂ ರಕ್ಷತು ದಕ್ಷಿಣಮ್ ।
ತದನ್ಯಂ ದ್ರಾವಿಣೀಮುದ್ರಾ ಪಾಯಾದಂಸದ್ವಯಂ ಕ್ರಮಾತ್ ॥ 12॥

ಆಕರ್ಷಣೀ ವಶ್ಯಮುದ್ರಾ ಚೋನ್ಮಾದಿನ್ಯಥ ದಕ್ಷಿಣಮ್ ।
ಭುಜಂ ಮಹಾಂಕುಶಾ ವಾಮಂ ಖೇಚರೀ ದಕ್ಷಕಕ್ಷಕಮ್ ॥ 13॥

ವಾಮಕಕ್ಷಂ ಬೀಜಮುದ್ರಾ ಯೋನಿಮುದ್ರಾ ತು ದಕ್ಷಿಣಮ್ ।
ಲಸತ್ ತ್ರಿಖಂಡಿನೀಮುದ್ರಾ ವಾಮಭಾಗಂ ಪ್ರಪಾಲಯೇತ್ ॥ 14॥

ಶ್ರೀಕಾಮಾಕರ್ಷಿಣೀ ನಿತ್ಯಾ ರಕ್ಷತಾದ್ ದಕ್ಷಕೂರ್ಪರಮ್ ।
ಕೂರ್ಪರಂ ವಾಮಮವತಾತ್ ಸಾ ಬುದ್‍ಧ್ಯಾಕರ್ಷಿಣೀ ತಥಾ ॥ 15॥

ಅಹಂಕಾರಾಕರ್ಷಿಣೀ ತು ಪ್ರಕಾಂಡಂ ಪಾತು ದಕ್ಷಿಣಮ್ ।
ಶಬ್ದಾಕರ್ಷಿಣಿಕಾ ವಾಮಂ ಸ್ಪರ್ಶಾಕರ್ಷಿಣಿಕಾಽವತು ॥ 16॥

ಪ್ರಕೋಷ್ಠಂ ದಕ್ಷಿಣಂ ಪಾತು ರೂಪಾಕರ್ಷಿಣಿಕೇತರಮ್ ।
ರಸಾಕರ್ಷಿಣಿಕಾ ಪಾತು ಮಣಿಬನ್ಧಂ ಚ ದಕ್ಷಿಣಮ್ ॥ 17॥

ಗನ್ಧಾಕರ್ಷಿಣಿಕಾ ವಾಮಂ ಚಿತ್ತಾಕರ್ಷಿಣಿಕಾಽವತು ।
ಕರಭಂ ದಕ್ಷಿಣಂ ಧೈರ್ಯಾಕರ್ಷಿಣೀ ಪಾತು ವಾಮಕಮ್ ॥ 18॥

ಸ್ಮೃತ್ಯಾಕರ್ಷಿಣ್ಯಸೌ ವಾಮಂ ನಾಮಾಕರ್ಷಿಣಿಕೇತರಮ್ ।
ಬೀಜಾಕರ್ಷಿಣಿಕಾ ಪಾಯಾತ್ ಸತತಂ ದಕ್ಷಿಣಾಂಗುಲೀಃ ॥ 19॥

ಆತ್ಮಾಕರ್ಷಿಣಿಕಾ ತ್ವನ್ಯಾ ಅಮೃತಾಕರ್ಷಿಣೀ ನಖಾನ್ ।
ಶರೀರಾಕರ್ಷಿಣೀ ವಾಮನಖಾನ್ ರಕ್ಷತು ಸರ್ವದಾ ॥ 20॥

ಅನಂಗಕುಸುಮಾ ಶಕ್ತಿಃ ಪಾತು ದಕ್ಷಿಣಸ್ತನೋಪರಿ ।
ಅನಂಗಮೇಖಲಾ ಚಾನ್ಯಸ್ತನೋರ್ಧ್ವಮಭಿರಕ್ಷತು ॥ 21॥

ಅನಂಗಮದನಾ ದಕ್ಷಸ್ತನಂ ತಚ್ಚೂಚುಕಂ ಪುನಃ ।
ರಕ್ಷತಾದನಿಶಂ ದೇವೀ ಹ್ಯನಂಗಃಮದನಾತುರಾ ॥ 22॥

ಅನಂಗರೇಖಾ ವಾಮಂ ತು ವಕ್ಷೋಜ ತಸ್ಯ ಚೂಚುಕಮ್ ।
ಅನಂಗವೇಗಿನೀ ಕ್ರೋಡಮನಂಗಾಸ್ಯಾಂಕುಶಾಽವತು ॥ 23॥

ಅನಂಗಮಾಲಿನೀ ಪಾಯಾದ್ ವಕ್ಷಃಸ್ಥಲಮಹರ್ನಿಶಮ್ ।
ಸರ್ವಸಂಕ್ಷೋಭಿಣೀ ಶಕ್ತಿರ್ಹೃತ್ ಸರ್ವದ್ರಾವಿಣೀ ಪರಾ ॥ 24॥

ಕುಕ್ಷಿಂ ಸರ್ವಾಕರ್ಷಿಣೀ ತು ಪಾತು ಪಾರ್ಶ್ವಂ ಚ ದಕ್ಷಿಣಮ್ ।
ಆಹ್ಲಾದಿನೀ ವಾಮಪಾರ್ಶ್ವಂ ಮಧ್ಯಂ ಸಮ್ಮೋಹಿನೀ ಚಿರಮ್ ॥ 25॥

ಸಾ ಸರ್ವಸ್ತಮ್ಭಿನೀ ಪೃಷ್ಠಂ ನಾಭಿಂ ವೈ ಸರ್ವಜೃಮ್ಭಿಣೀ ।
ವಶಂಕರೀ ವಸ್ತಿದೇಶಂ ಸರ್ವರಂಜಿನೀ ಮೇ ಕಟಿಮ್ ॥ 26॥

ಸಾ ತು ಸರ್ವೋನ್ಮಾದಿನೀ ಮೇ ಪಾಯಾಜ್ಜಘನಮಂಡಲಮ್ ।
ಸರ್ವಾರ್ಥಸಾಧಿನೀ ಶಕ್ತಿಃ ನಿತಮ್ಬಂ ರಕ್ಷತಾನ್ಮಮ ॥ 27॥

ದಕ್ಷಸ್ಫಿಚಂ ಸದಾ ಪಾತು ಸರ್ವಸಮ್ಪತ್ತಿಪೂರಿಣೀ ।
ಸರ್ವಮನ್ತ್ರಮಯೀ ಶಕ್ತಿಃ ಪಾತು ವಾಮಸ್ಫಿಚಂ ಮಮ ॥ 28॥

ಪಾಯಾತ್ ಕುಕುನ್ದರದ್ವನ್ದ್ವಂ ಸರ್ವದ್ವನ್ದ್ವಕ್ಷಯಂಕರೀ ।
ಸರ್ವಸಿದ್ಧಿಪ್ರದಾ ದೇವೀ ಪಾತು ದಕ್ಷಿಣ ವಂಕ್ಷಣಮ್ ॥ 29॥

ಸರ್ವಸಮ್ಪತ್ಪ್ರದಾ ದೇವೀ ಪಾತು ಮೇ ವಾಮವಂಕ್ಷಣಮ್ ।
ಸರ್ವಪ್ರಿಯಂಕರೀ ದೇವೀ ಗುಹ್ಯಂ ರಕ್ಷತು ಮೇ ಸದಾ ॥ 30॥

ಮೇಢ್ರಂ ರಕ್ಷತು ಮೇ ದೇವೀ ಸರ್ವಮಂಗಲಕಾರಿಣೀ ।
ಸರ್ವಕಾಮಪ್ರದಾ ದೇವೀ ಪಾತು ಮುಷ್ಕಂ ತು ದಕ್ಷಿಣಮ್ ॥ 31॥

ಪಾಯಾತ್ ತದನ್ಯಮುಷ್ಕಂ ತು ಸರ್ವದುಃಖವಿಮೋಚಿನೀ ।
ಸರ್ವಮೃತ್ಯುಪ್ರಶಮನೀ ದೇವೀ ಪಾತು ಗುದಂ ಮಮ ॥ 32॥

ಪಾತು ದೇವೀ ಗುಹ್ಯಮಧ್ಯಂ ಸರ್ವವಿಘ್ನನಿವಾರಿಣೀ ।
ಸರ್ವಾಂಗಸುನ್ದರೀ ದೇವೀ ರಕ್ಷತಾದ್ ದಕ್ಷಸಕ್ಥಿಕಮ್ ॥ 33॥

ವಾಮಸಕ್ಥಿತಲಂ ಪಾಯಾತ್ ಸರ್ವಸೌಭಾಗ್ಯದಾಯಿನೀ ।
ಅಷ್ಠೀವಂ ಮಮ ಸರ್ವಜ್ಞಾ ದೇವೀ ರಕ್ಷತು ದಕ್ಷಿಣಮ್ ॥ 34॥

ವಾಮಾಷ್ಠೀವಂ ಸರ್ವಶಕ್ತಿಃ ದೇವೀ ಪಾತು ಯುಗಂ ಮಮ ।
ಸರ್ವೈಶ್ವರ್ಯಪ್ರದಾ ದೇವೀ ದಕ್ಷಜಾನುಂ ಸದಾಽವತು ॥ 35॥

ಸರ್ವಜ್ಞಾನಮಯೀ ದೇವೀ ಜಾನುಮನ್ಯಂ ಮಮಾವತಾತ್ ।
ಅವ್ಯಾದ್ ದೇವೀ ದಕ್ಷಜಂಗಾಂ ಸರ್ವವ್ಯಾಧಿವಿನಾಶಿನೀ ॥ 36॥

ತದನ್ಯಾಂ ಪಾತು ದೇವೀ ಸಾ ಸರ್ವಾಧಾರಸ್ವರೂಪಿಣೀ ।
ಸರ್ವಪಾಪಹರಾ ದೇವೀ ಗುಲ್ಫಂ ರಕ್ಷತು ದಕ್ಷಿಣಮ್ ॥ 37॥

ಸರ್ವಾನನ್ದಮಯೀ ದೇವೀ ವಾಮಗುಲ್ಫಂ ಸದಾಽವತು ।
ಪಾರ್ಷ್ಣಿ ಮೇ ದಕ್ಷಿಣಂ ಪಾಯಾತ್ ಸರ್ವರಕ್ಷಾಸ್ವರೂಪಿಣೀ ॥ 38॥

ಅವ್ಯಾತ್ ಸದಾ ಸದಾ ಪಾರ್ಷ್ಣಿ ಸರ್ವೇಪ್ಸಿತಫಲಪ್ರದಾ ।
ದಕ್ಷಾಂಘ್ರಿಪಾರ್ಶ್ವಂ ವಶಿನೀ ಪೂರ್ವಂ ವಾಗ್ದೇವತಾ ಮಮ ॥ 39॥

ಸರ್ವಂ ಕಾಮೇಶ್ವರೀ ಚೋರ್ಧ್ವಮಧೋ ವಾಗ್ದೇವತಾ ಮಮ ।
ಮೋದಿನೀ ಪ್ರಪದಂ ಪಾತು ವಿಮಲಾ ದಕ್ಷಿಣೇತರೇ ॥ 40॥

ಅಂಗುಲೀರರುಣಾ ಪಾತು ದಕ್ಷಪಾದನಖೋಜ್ಜ್ವಲಾ ।
ತದನ್ಯಾ ಜಯಿನೀ ಪಾತು ಸದಾ ಸರ್ವೇಶ್ವರೀ ಮಮ ॥ 41॥

ದಕ್ಷವಾಮಪಾದತಲಂ ಕೌಲಿನೀ ದೇವತಾ ಮಮ ।
ಕುರ್ವನ್ತು ಜೃಮ್ಭಣಾ ಬಾಣಾಃ ತ್ರೈಲೋಕ್ಯಾಕರ್ಷಣಂ ಮಮ ॥ 42॥

ಮೋಹಂ ಸಂಹರತಾದಿಕ್ಷುಕೋದಂಡಂ ಭೃಂಗಮೌವಿಕಮ್ ।
ಕರೋತು ಸತತಂ ಪಾಶೀ ವಶೀಕರಣಮದ್ಭುತಮ್ ॥ 43॥

ವಿದಧ್ಯಾದಂಕುಶಂ ನಿತ್ಯಂ ಸ್ತಮ್ಭನಂ ಶತ್ರುಸಂಕಟೇ ।
ಪೀಠಂ ಮೇ ಕಾಮರೂಪಾಖ್ಯಂ ಪಾತು ಕಾಮಾನ್ತಿಕಂ ಮನಃ ॥ 44॥

ಪೂರ್ಣಂ ಪೂರ್ಣಗಿರೇಃ ಪೀಠಂ ಕಾನ್ತಿಂ ಮೇ ಜನಯೇತ್ ಸದಾ ।
ಜಾಲನ್ಧರಮನ್ಯಜಾಲನ್ಧರಪೀಠಂ ಮೇ ರಕ್ಷತು ॥ 45॥

ಸಾಯುಜ್ಯೇ ನಿಯತಾಂ ಪ್ರಜ್ಞಾಂ ಶ್ರೀಪೀಠಂ ಶ್ರೀಕರಂ ಮಮ ।
ಕಾಮೇಶ್ವರೀ ತ್ವಾತ್ಮತತ್ತ್ವಂ ರಕ್ಷೇದ್ ವಜ್ರೇಶ್ವರೀ ತಥಾ ॥ 46॥

ವಿದ್ಯಾತತ್ತ್ವಂ ಶೈವತತ್ತ್ವಂ ಪಾಯಾಛ್ರೀಭಗಮಾಲಿನೀ ।
ಕಾಮಂ ವಿದ್ಯಾನ್ಮಹಾಶತ್ರೂನಮೃತಾರ್ಣವಮಾನಸಮ್ ॥ 47॥

ಕ್ರೋಧಂ ಕ್ರೋಧಾಪಹಾ ಹನ್ಯಾನ್ಮನ್ಯುಂ ಪೈತಾಮ್ಬುಜಾಸನಮ್ ।
ಲೋಭಂ ಚಿದಾಸನಂ ಹನ್ಯಾದ್ ದೇವ್ಯಾತ್ಮಾಮೃತರೂಪಭಾಕ್ ॥ 48॥

ಮೋಹಂ ಸಂಹರತಾಚ್ಚಕ್ರಂ ಮದಂ ಮನ್ತ್ರಾಸನಂ ಮಮ ।
ಮಾತ್ಸರ್ಯಂ ನಾಶಯೇನ್ನಿತ್ಯಂ ಮಮ ಸಾನ್ಧ್ಯಾಸನಂ ತಥಾ ॥ 49॥

ಆಧಾರಂ ತ್ರಿಪುರಾ ರಕ್ಷೇತ್ ಸ್ವಾಧಿಷ್ಠಾನಂ ಪುರೇಶ್ವರೀ ।
ಮಣಿಪೂರಂ ಮಣಿದ್ಯೋತಾ ಪಾಯಾತ್ ತ್ರಿಪುರಸುನ್ದರೀ ॥ 50॥

ಅವ್ಯಾದನಾಹತಂ ಭವ್ಯಾ ನಿತ್ಯಂ ತ್ರಿಪುರವಾಸಿನೀ ।
ವಿಶುದ್ಧಿಂ ತ್ರಿಪುರಾ ಶ್ರೀಶ್ಚ ಆಜ್ಞಾಂ ತ್ರಿಪುರಮಾಲಿನೀ ॥ 51॥

ಇಡಾಂ ಮೇ ತ್ರಿಪುರಸಿದ್ಧಾ ತ್ರಿಪುರಾ ಚಾಪಿ ಪಿಂಗಲಾಮ್ ।
ಸುಷುಮ್ನಾಂ ಪಾತು ಮೇ ನಿತ್ಯಾ ಪಾಯಾತ್ ತ್ರಿಪುರಭೈರವೀ ॥ 52॥

ತ್ರೈಲೋಕ್ಯಮೋಹನಂ ಚಕ್ರಂ ರೋಮಕೂಪಾಂಶ್ಚ ರಕ್ಷತು ।
ಸರ್ವಾಶಾಪೂರಕಂ ಚಕ್ರಂ ಸಪ್ತಧಾತೂँಶ್ಚ ರಕ್ಷತು ॥ 53॥

ಸರ್ವಸಂಕ್ಷೋಭಣ ಚಕ್ರಂ ಪ್ರಾಣಾದ್ಯಂ ವಾಯುಪಂಚಕಮ್ ।
ಸೌಭಾಗ್ಯದಾಯಕಂ ಚಕ್ರಂ ನಾಗಾದ್ಯನಿಲಪಂಚಕಮ್ ॥ 54॥

ಸರ್ವಾರ್ಥಸಾಧಕಂ ಚಕ್ರಂ ಕಾರಣಾನಾಂ ಚತುಷ್ಟಯಮ್ ।
ಸರ್ವರಕ್ಷಾಕರಂ ಚಕ್ರಂ ರಕ್ಷತಾನ್ಮೇ ಗುಣತ್ರಯಮ್ ॥ 55॥

ಸರ್ವರೋಗಹರಂ ಚಕ್ರಂ ಪಾಯಾತ್ ಪುರ್ಯಷ್ಟಕಂ ಮಮ ।
ಸರ್ವಸಿದ್ಧಿಪ್ರದಂ ಚಕಮವ್ಯಾನ್ಮೇ ಕೋಶಪಂಚಕಮ್ ॥ 56॥

ಸರ್ವಾನನ್ದಮಯಂ ಚಕ್ರಂ ಯಶಃ ಕೀರ್ತಿಂ ಚ ರಕ್ಷತು ।
ಸೌನ್ದರ್ಯಂ ಮನ್ಮಥಃ ಪಾಯಾದ್ ಧೃತಿಶ್ಚಾಪಿ ರತಿಂ ಮಮ ॥ 57॥

ಪ್ರೀತಿಂ ಮೇ ಪಾತು ಯಾ ಪ್ರೀತಿಃ ರೂಪಂ ಪಾತು ವಸನ್ತಕಃ ।
ಸಂಕಲ್ಪಂ ಕಲ್ಪಕೋದ್ಯಾನಂ ಮಹಾಲಕ್ಷ್ಮೀ ಶ್ರಿಯಂ ಮಮ ॥ 58॥

ಕಾನ್ತಿಂ ಕಪಾಲಿನೀ ರಕ್ಷೇತ್ ಮನ್ದಿರಂ ಮಣಿಮಂಡಪಃ ।
ಪುತ್ರಾನ್ ಶಂಖಯನಿಧಿಃ ಪಾಯಾದ್ ಭಾರ್ಯಾಂ ಪದ್ಮನಿಧಿಸ್ತಥಾ ॥ 59॥

ಮಾರ್ಗೇ ಕ್ಷೇಮಂಕರೀ ರಕ್ಷೇತ್ ಮಾತಂಗೀ ಮುಕುಟಂ ತಥಾ ।
ಯೋಗಿನೀ ಪ್ರಕಟಾದ್ಯಾಸ್ತಾ ನವದ್ವಾರಾಣಿ ಪಾನ್ತು ಮೇ ॥ 60॥

ಭೋಜನೇ ಮಾಮನ್ನಪೂರ್ಣಾ ಮಾತಂಗೀ ಕ್ರೀಡನೇಽವತಾತ್ ।
ವನೇ ರಕ್ಷತು ಮಾಂ ದುರ್ಗಾ ಜಾಗ್ರತೀ ದುಷ್ಟನಿಗ್ರಹೇ ॥ 61॥

ತ್ರಿಧಾಽಹಂಕಾರನೈಷ್ಠುರ್ಯದೋಷತ್ರಯಂ ಮಲತ್ರಯಮ್ ।
ಡಾಕಿನ್ಯೋ ಯೋಗಿನೀಮುಖ್ಯಾಃ ಸಂಹರನ್ತು ಮಮಾನಿಶಮ್ ॥ 62॥

ಇಚ್ಛಾಶಕ್ತಿರ್ಗುರೋರ್ಭಕ್ತಿಂ ಪಾತು ಮೇ ಜ್ಞಾನಮಾತ್ಮನಿ ।
ಜ್ಞಾನಶಕ್ತಿಃ ಕ್ರಿಯಾಶಕ್ತಿರ್ವೈರಾಗ್ಯವಿಷಯೇಷ್ವಪಿ ॥ 63॥

ಹೃತ್ಪದ್ಮಕರ್ಣಿಕಾಮಧ್ಯೇ ಹ್ರೀಂಕಾರೀ ಪರಿರಕ್ಷತು ।
ವೈಖರೀ ಶ್ರವಣಂ ಪಾತು ಮಧ್ಯಮಾ ಮನನಂ ಪುನಃ ॥ 64॥

ಯೋಗಂ ರಕ್ಷತು ಪಶ್ಯನ್ತೀ ಸಾಕ್ಷಾತ್ ಜ್ಞಾನಪರಾ ಮಮ ।
ಬ್ರಹ್ಮಾಣೀ ಜಾಗೃತಂ ಪಾತು ಶಯಾನಂ ವೈಷ್ಣವೀ ತಥಾ ॥ 65॥

ಸುಷುಪ್ತೌ ಚಂಡಿಕಾ ಪಾತು ತುರ್ಯಾ ಮೇ ಮೋಹಕಾರಿಣೀ ।
ಸದಾ ಮಾಂ ಭೈರವೀ ಪಾತು ಜಗದ್ಭರಣಪಂಡಿತಾ ॥ 66॥

ಚರಣಾಮ್ಭೋರುಹಾನನ್ದಪರಾಮೃತರಸೇರಿತಾ ।
ಪ್ಲಾವಿನೀ ಕುಂಡಲೀ ಪೂರ್ಣಾ ಅನ್ತರಾನ್ತಂ ಸದಾಽವತಾತ್ ॥ 67॥

ಅಷ್ಟದಿಕ್ಷು ಮಹೇನ್ದ್ರಾದ್ಯಾ ಸಾಯುಧಾಃ ಪಾನ್ತು ಸರ್ವದಾ ।
ಪಾಯಾದೂರ್ಧ್ವಾ ದಿಶಂ ಬ್ರಹ್ಮಾ ವಿಷ್ಣುಶ್ಚಕ್ರಾಯುಧೋಪ್ಯಧಃ ॥ 68॥

ಅನಾವೃತ್ತಾನಿ ಸ್ಥಾನಾನಿ ಕವಚೇನ ತು ಯಾನಿ ಮೇ ।
ತಾನಿ ಸರ್ವಾಣಿ ರಕ್ಷನ್ತು ಶಿವಾದ್ಯಾ ಗುರವಃ ಸದಾ ॥ 69॥

ಫಲಶ್ರುತಿಃ ।
ಏತತ್ ಸೌಭಾಗ್ಯಕವಚಂ ಶಾಂಕರಂ ಯಸ್ತು ಪಾಠಯೇತ್ ।
ತ್ರಿಸನ್ಧ್ಯಂ ಯಃ ಪಠೇದ್ ಭಕ್ತ್ಯಾ ಶೃಣುಯಾದ್ ವಾ ಸಮಾಹಿತಃ ॥ 1॥

ತಸ್ಯ ಶೀಘ್ರೇಣ ಸಿಧ್ಯನ್ತಿ ಸಿದ್ಧಯಸ್ತ್ವಣಿಮಾದಯಃ ।
ಗುಟಿಕಾಪಾದುಕಾದ್ಯಷ್ಟಸಿದ್ಧಯಃ ಸಮ್ಭವನ್ತಿ ಚ ॥ 2॥

ವಶ್ಯಾದೀನ್ಯಷ್ಟಕರ್ಮಾಣಿ ಯೋಗಶ್ಚಾಷ್ಟಾಂಗಸಂಯುತಃ ।
ಬ್ರಹ್ಮಾವಿಷ್ಣುಗಿರೀಶೇನ್ದ್ರಕನ್ದರ್ಪರತಿಭಿಃ ಸಹ ॥ 3॥

ವಿಚರನ್ತೇ ತದಖಿಲಾನ್ ಸಿದ್ಧಗನ್ಧರ್ವಸೇವಿತಾಃ ।
ತಸ್ಯ ಸ್ಮರಣಮಾತ್ರೇಣ ಗ್ರಹಭೂತಪಿಶಾಚಕಾಃ ॥ 4॥

ಕೀಟವತ್ ಪ್ರಪಲಾಯನ್ತೇ ಕಷ್ಮಾಂಡಾ ಭೈರವಾದಯಃ ।
ತಸ್ಯಾಂಘ್ರಿತೋಯಪತನಾತ್ ಪ್ರಶಾಮ್ಯತಿ ಮಹಾರುಜಾಃ ॥ 5॥

ತತ್ಪಾದಕಮಲಾಸಕ್ತರಜೋಲೇಶಾಭಿಮರ್ಶನಾತ್ ।
ವಶ್ಯಂ ಭವತಿ ಶೀಘ್ರೇಣ ತ್ರೈಲೋಕ್ಯಂ ಸಚರಾಚರಮ್ ।
ಆಬಾಲಮಹಿಲಾಭೂಪಾಃ ಕಿಮು ಮಾಯಾವಿಮೋಹಿತಾಃ ॥ 6॥

॥ ಇತಿ ವಾಮಕೇಶ್ವರನ್ತನ್ತ್ರೇ ನಿತ್ಯಾಷೋಡಶಿಕಾರ್ಣವೇ ಶ್ರೀಸೌಭಾಗ್ಯಕವಚಮ್ ॥

29/04/2020

ಶ್ರೀ ಅಮೃತಸಂಜೀವನಸ್ತೋತ್ರಂ
(ಶ್ರೀ ಸುದರ್ಶನ ಸಂಹಿತಾಯಾಂ)

ಅಥಾಪರಮಹಂ ವಕ್ಷ್ಯೇsಮೃತಸಂಜೀವನಂ ಸ್ತವಂ |
ಯಸ್ಯಾನುಷ್ಠಾನಮಾತ್ರೇಣ ಮೃತ್ಯುರ್ದೂರಾತ್ಪಲಾಯತೇ ||1||

ಅಸಾಧ್ಯಾಃ ಕಷ್ಟಸಾಧ್ಯಾಶ್ಚ ಮಹಾರೋಗಾ ಭಯಂಕರಾಃ |
ಶೀಘ್ರಂ ನಶ್ಯಂತಿ ಪಠನಾದಸ್ಯಾಯುಶ್ಚ ಪ್ರವರ್ಧತೇ ||2||

ಶಾಕಿನೀಡಾಕಿನೀದೋಷಾಃ ಕುದೃಷ್ಟಿಗ್ರಹಶತ್ರುಜಾಃ |
ಪ್ರೇತವೇತಾಲಯಕ್ಷೋತ್ಥಾ ಬಾಧಾ ನಶ್ಯಂತಿ ಚಾಖಿಲಾಃ ||3||

ದುರಿತಾನಿ ಸಮಸ್ತಾನಿ ನಾನಾಜನ್ಮೋದ್ಭವಾನಿ ಚ |
ಸಂಸರ್ಗಜವಿಕಾರಾಣಿ ವಿಲೀಯಂತೇsಸ್ಯ ಪಾಠತಃ ||4||

ಸರ್ವೋಪದ್ರವನಾಶಾಯ ಸರ್ವಬಾಧಾಪ್ರಶಾಂತಯೇ |
ಆಯುಃ ಪ್ರವೃದ್ಧಯೇ ಚೈತತ್ ಸ್ತೋತ್ರಂ ಪರಮಮದ್ಭುತಂ ||5||

ಬಾಲಗ್ರಹಾಭಿಭೂತಾನಾಂ ಬಾಲಾನಾಂ ಸುಖದಾಯಕಂ |
ಸರ್ವಾರಿಷ್ಟಹರಂ ಚೈತದ್ಬಲಪುಷ್ಟಿಕರಂ ಪರಂ ||6||

ಬಾಲಾನಾಂ ಜೀವನಾಯೈತತ್ ಸ್ತೋತ್ರಂ ದಿವ್ಯಂ ಸುಧೋಪಮಂ |
ಮೃತವತ್ಸತ್ವಹರಣಂ ಚಿರಂಜೀವಿತ್ವಕಾರಕಂ ||7||

ಮಹಾರೋಗಾಭಿಭೂತಾನಾಂ ಭಯವ್ಯಾಕುಲಿತಾತ್ಮನಾಂ |
ಸರ್ವಾಧಿವ್ಯಾಧಿಹರಣಂ ಭಯಘ್ನಮಮೃತೋಪಮಂ ||8||

ಅಲ್ಪಮೃತ್ಯುಶ್ಚಾಪಮೃತ್ಯುಃ ಪಾಠಾದಸ್ಯ ಪ್ರಣಶ್ಯತಿ |
ಜಲಾಗ್ನಿವಿಷಶಸ್ತ್ರಾರಿನಖಿಶೃಂಗಿಭಯಂ ತಥಾ ||9||

ಗರ್ಭರಕ್ಷಾಕರಂ ಸ್ತ್ರೀಣಾಂ ಬಾಲಾನಾಂ ಜೀವನಪ್ರದಂ |
ಮಹಾರೋಗಹರಂ ನೃಣಾಮಲ್ಪಮೃತ್ಯುಹರಂ ಪರಂ ||10||

ಬಾಲಾ ವೃದ್ಧಾಶ್ಚ ತರುಣಾ ನರಾ ನಾರ್ಯಶ್ಚ ದುಃಖಿತಾಃ |
ಭವಂತಿ ಸುಖಿನಃ ಪಾಠಾದಸ್ಯ ಲೋಕೇ ಚಿರಾಯುಷಃ ||11||

ಅಸ್ಮಾತ್ಪ್ರತರಂ ನಾಸ್ತಿ ಜೀವನೋಪಾಯ ಐಹಿಕಃ |
ತಸ್ಮಾತ್ಸರ್ವಪ್ರಯತ್ನೇನ ಪಾಠಮಸ್ಯ ಸಮಾಚರೇತ್ ||12||

ಆಯುತಾವೃತ್ತಿಕಂ ವಾಥ ಸಹಸ್ರಾವೃತ್ತಿಕಂ ತಥಾ |
ತದರ್ಧಂ ವಾ ತದರ್ಧಂ ವಾ ಪಠೇದೇತಶ್ಚ ಭಕ್ತಿತಃ ||13||

ಕಲಶೇ ವಿಷ್ಣುಮಾರಾದ್ಯ ದೀಪಂ ಪ್ರಜ್ವಾಲ್ಯ ಯತ್ನತಃ |
ಸಾಯಂ ಪ್ರಾತಶ್ಚ ವಿಧಿವತ್ಸ್ತೋತ್ರಮೇತತ್ಪಠೇತ್ಸುಧೀಃ ||14||

ಸರ್ಪಿಷಾ ಹವಿಷಾ ವಾsಪಿ ಸಂಯಾವೇನಾಥ ಭಕ್ತಿತಃ |
ದಶಾಂಶಮಾನತೋ ಹೋಮಂ ಕುರ್ಯಾತ್ಸರ್ವಾರ್ಥಸಿದ್ಧಯೇ ||15||

ನಮೋ ನಮೋ ವಿಶ್ವವಿಭಾವನಾಯ
ನಮೋ ನಮೋ ಲೋಕಸುಖಪ್ರದಾಯ |
ನಮೋ ನಮೋ ವಿಶ್ವಸೃಜೇಶ್ವರಾಯ |
ನಮೋ ನಮೋ ಮುಕ್ತಿವರಪ್ರದಾಯ ||16||

ನಮೋ ನಮಸ್ತೇsಖಿಲಲೋಕಪಾಯ
ನಮೋ ನಮಸ್ತೇsಖಿಲಕಾಮದಾಯ |
ನಮೋ ನಮಸ್ತೇsಖಿಲಕಾರಣಾಯ
ನಮೋ ನಮಸ್ತೇsಖಿಲರಕ್ಷಕಾಯ ||17||

ನಮೋ ನಮಸ್ತೇ ಸಕಲಾರ್ತಿಹರ್ತ್ರೇ
ನಮೋ ನಮಸ್ತೇ ವಿರುಜಪ್ರಕರ್ತ್ರೇ |
ನಮೋ ನಮಸ್ತೇsಖಿಲವಿಶ್ವಧರ್ತ್ರೇ
ನಮೋ ನಮಸ್ತೇsಖಿಲಲೋಕಭರ್ತ್ರೇ ||18||

ಸೃಷ್ಟಂ ದೇವ ಚರಾಚರಂ ಜಗದಿದಂ ಬ್ರಹ್ಮಸ್ವರೂಪೇಣ ತೇ
ಸರ್ವಂ ತತ್ಪರಿಪಾಲ್ಯತೇ ಜಗದಿದಂ ವಿಷ್ಣುಸ್ವರೂಪೇಣ ತೇ |
ವಿಶ್ವಂ ಸಂಹ್ರಿಯತೇ ತದೇವ ನಿಖಿಲಂ ರುದ್ರಸ್ವರೂಪೇಣ ತೇ
ಸಂಸಿಚ್ಯಾಮೃತಶೀಕರೈರ್ಹರ ಮಹಾರಿಷ್ಟಂ ಚಿರಂ ಜೀವಯ ||19||

ಯೋ ಧನ್ವಂತರಿಸಂಜ್ಞಯಾ ನಿಗದಿತಃ ಕ್ಷೀರಾಬ್ಧಿತೋ ನಿಃಸೃತೋ
ಹಸ್ತಾಭ್ಯಾಂ ಜನಜೀವನಾಯ ಕಲಶಂ ಪೀಯೂಷಪೂರ್ಣಂ ದಧತ್ |
ಆಯುರ್ವೇದಮರೀರಚಜ್ಜನರುಜಾಂ ನಾಶಾಯ ಸ ತ್ವಂ ಮುದಾ
ಸಂಸಿಚ್ಯಾಮೃತಶೀಕರೈರ್ಹರ ಮಹಾರಿಷ್ಟಂ ಚಿರಂ ಜೀವಯ ||20||

ಸ್ತ್ರೀರೂಪಂ ವರಭೂಷಣಾಂಬರಧರಂ ತ್ರೈಲೋಕ್ಯಸಂಮೋಹನಂ
ಕೃತ್ವಾ ಪಾಯಯತಿ ಸ್ಮ ಯಃ ಸುರಗಣಾನ್ಪೀಯೂಷಮತ್ಯುತ್ತಮಂ |
ಚಕ್ರೇ ದೈತ್ಯಗಣಾನ್ಸುಧಾವಿರಹಿತಾನ್ ಸಂಮೋಹ್ಯ ಸ ತ್ವಂ ಮುದಾ
ಸಂಸಿಚ್ಯಾಮೃತಶೀಕರೈರ್ಹರ ಮಹಾರಿಷ್ಟಂ ಚಿರಂಜೀವಯ ||21||

ಚಾಕ್ಷುಷೋದಧಿಸಂಪ್ಲಾವಭೂವೇದಪ ಝಷಾಕೃತೇ |
ಸಿಂಚ ಸಿಂಚಾಮೃತಕಣೈಶ್ಚಿರಂ ಜೀವಯ ಜೀವಯ ||22||

ಪೃಷ್ಠಮಂದರನಿರ್ಘೂರ್ಣನಿದ್ರಾಕ್ಷ ಕಮಠಾಕೃತೇ |
ಸಿಂಚ ಸಿಂಚಾಮೃತಕಣೈಶ್ಚಿರಂ ಜೀವಯ ಜೀವಯ ||23||

ಯಾಂಚಾಛಲಬಲಿತ್ರಾಸಮುಕ್ತನಿರ್ಜರ ವಾಮನ |
ಸಿಂಚ ಸಿಂಚಾಮೃತಕಣೈಶ್ಚಿರಂ ಜೀವಯ ಜೀವಯ ||24||

ಧರೋದ್ಧಾರಹಿರಣ್ಯಾಕ್ಷಘಾತಕ್ರೋಡಾಕೃತೇ ಪ್ರಭೋ |
ಸಿಂಚ ಸಿಂಚಾಮೃತಕಣೈಶ್ಚಿರಂ ಜೀವಯ ಜೀವಯ ||25||

ಭಕ್ತತ್ರಾಸವಿನಾಶಾತ್ತಚಂಡತ್ವ ನೃಹರೇ ವಿಭೋ |
ಸಿಂಚ ಸಿಂಚಾಮೃತಕಣೈಶ್ಚಿರಂ ಜೀವಯ ಜೀವಯ ||26||

ಕ್ಷತ್ರಿಯಾರಣ್ಯಸಂಛೇದಕುಠಾರಕರ ರೈಣುಕ |
ಸಿಂಚ ಸಿಂಚಾಮೃತಕಣೈಶ್ಚಿರಂ ಜೀವಯ ಜೀವಯ ||28||

ಭೂಭಾರಾಸುರಸಂದೋಹಕಾಲಾಗ್ನೇ ರುಕ್ಷಿಣೀಪತೇ |
ಸಿಂಚ ಸಿಂಚಾಮೃತಕನೈಶ್ಚಿರಂ ಜೀವಯ ಜೀವಯ ||29||

ವೇದಮಾರ್ಗರತಾನರ್ಹವಿಭ್ರಾಂತ್ಯೈ ಬುದ್ಧರೂಪಧೃಕ್ |
ಸಿಂಚ ಸಿಂಚಾಮೃತಕನೈಶ್ಚಿರಂ ಜೀವಯ ಜೀವಯ ||30||

ಕಲಿವರ್ಣಾಶ್ರಮಾಸ್ಪಷ್ಟಧರ್ಮದ್ರ್ಧ್ಯೈ ಕಲ್ಕಿ ರೂಪಭಾಕ್ |
ಸಿಂಚ ಸಿಂಚಾಮೃತಕಣೈಶ್ಚಿರಂ ಜೀವಯ ಜೀವಯ ||31||

ಅಸಾಧ್ಯಾಃ ಕಷ್ಟಸಾಧ್ಯಾ ಯೇ ಮಹಾರೋಗಾ ಭಯಂಕರಾಃ |
ಛಿಂಧಿ ತಾನಾಶು ಚಕ್ರೇಣ ಚಿರಂ ಜೀವಯ ಜೀವಯ ||32||

ಅಲ್ಪಮೃತ್ಯುಂ ಚಾಪಮೃತ್ಯುಂ ಮಹೋತ್ಪಾತಾನುಪದ್ರವಾನ್ |
ಭಿಂಧಿ ಭಿಂಧಿ ಗದಾಘಾತೈಶ್ಚಿರಂ ಜೀವಯ ಜೀವಯ ||33||

ಅಹಂ ನ ಜಾನೇ ಕಿಮಪಿ ತ್ವದನ್ಯ-
ತ್ಸಮಾಶ್ರಯೇ ನಾಥ ಪದಾಂಬುಜಂ ತೇ |
ಕುರುಷ್ವ ತದ್ಯನ್ಮಸೀಪ್ಸಿತಂ ತೇ
ಸುಕರ್ಮಣಾ ಕೇನ ಸಮಕ್ಷಮೀಯಾಂ ||34||

ತ್ವಮೇವ ತಾತೋ ಜನನೀ ತ್ವಮೇವ
ತ್ವಮೇವ ನಾಥಶ್ಚ ತ್ವಮೇವ ಬಂಧುಃ |
ವಿದ್ಯಾಧನಾಗಾರಕುಲಂ ತ್ವಮೇವ
ತ್ವಮೇವ ಸರ್ವಂ ಮಮ ದೇವದೇವ ||35||

ನ ಮೇsಪರಾಧಂ ಪ್ರವಿಲೋಕಯ ಪ್ರಭೋ-
sಪರಾಧಸಿಂಧೋಶ್ಚ ದಯಾನಿಧಿಸ್ತ್ವಂ |
ತಾತೇನ ದುಷ್ಟೋಪಿ ಸುತಃ ಸುರಕ್ಷ್ಯತೇ
ದಯಾಲುತಾ ತೇsವತು ಸರ್ವದಾsಸ್ಮಾನ್ ||36||

ಅಹಹ ವಿಸ್ಮರ ನಾಥ ನ ಮಾಂ ಸದಾ
ಕರುಣಾಯಾ ನಿಜಯಾ ಪರಿಪೂರಿತಃ |
ಭುವಿ ಭವಾನ್ ಯದಿ ಮೇ ನಹಿ ರಕ್ಷಕಃ
ಕಥಮಹೋ ಮಮ ಜೀವನಮತ್ರ ವೈ ||37||

ದಹ ದಹ ಕೃಪಯಾ ತ್ವಂ ವ್ಯಾಧಿಜಾಲಂ ವಿಶಾಲಂ
ಹರ ಹರ ಕರವಾಲಂ ಚಾಲ್ಪಮೃತ್ಯೋಃ ಕರಾಲಂ |
ನಿಜಜನಪರಿಪಾಲಂ ತ್ವಾಂ ಭಜೇ ಭಾವಯಾಲಂ
ಕುರು ಕುರು ಬಹುಕಾಲಂ ಜೀವಿತಂ ಮೇ ಸದಾsಲಂ ||38||

ನ ಯತ್ರ ಧರ್ಮಾಚರಣಂ ನ ದಾನಂ
ವ್ರತಂ ನ ಯಾಗೋ ನ ಚ ವಿಷ್ಣುಚರ್ಚಾ |
ನ ಪಿತೃಗೋವಿಪ್ರವರಾಮರಾರ್ಚಾ
ಸ್ವಲ್ಪಾಯುಷಸ್ತತ್ರ ಜನಾ ಭವಂತಿ ||39||

ಕ್ಲೀಂ ಶ್ರೀಂ ಕ್ಲೀಂ ಶ್ರೀಂ ನಮೋ ಭಗವತೇ ಜನಾರ್ದನಾಯ
ಸಕಲದುರಿತಾನಿ ನಾಶಯ ನಾಶಯ
ಕ್ಷ್ರೌಂ ಆಮಾರೋಗ್ಯಂ ಕುರು ಕುರು
ಹ್ರೀಂ ದೀರ್ಘಮಾಯುರ್ದೇಹಿ ದೇಹಿ ಸ್ವಾಹಾ |
ಅಸ್ಯ ಧಾರಣತೋ ಜಾಪಾದಲ್ಪಮೃತ್ಯುಃ ಪ್ರಶಾಮ್ಯತಿ |
ಗರ್ಭರಕ್ಷಾಕರಂ ಸ್ತ್ರೀಣಾಂ ಬಾಲಾನಾಂ ಜೀವನಂ ಪರಂ ||40||

ಶತಂ ಪಂಚಾಶತಂ ಶಕ್ತ್ಯಾsಥವಾ ಪಂಚಾಧಿವಿಂಶತಿಂ |
ಪುಸ್ತಕಾನಾಂ ದ್ವಿಜೇಭ್ಯಸ್ತು ದದ್ಯಾದ್ದೀರ್ಘಾಯುಷಾಪ್ತಯೇ ||41||

ಭೂರ್ಜಪತ್ರೇ ವಿಲಿಖ್ಯೇದಂ ಕಂಠೇ ವಾ ಬಾಹುಮೂಲಕೇ |
ಸಂಧಾರಯೇದ್ಗರ್ಭರಕ್ಷಾ ಬಾಲರಕ್ಷಾ ಚ ಜಾಯತೇ ||42||

ಸರ್ವೇ ರೋಗಾ ವಿನಶ್ಯಂತಿ ಸರ್ವಾ ಬಾಧಾ ಪ್ರಶಾಮ್ಯತಿ |
ಕುದೃಷ್ಟಿಜಂ ಭಯಂ ನಶ್ಯೇತ್ತಥಾ ಪ್ರೇತಾದಿಜಂ ಭಯಂ ||43||

ಮಯಾ ಕಥಿತಮೇತತ್ತೇsಮೃತಸಂಜೀವನಂ ಪರಂ |
ಅಲ್ಪಮೃತ್ಯುಹರಂ ಸ್ತೋತ್ರಂ ಮೃತವತ್ಸತ್ತ್ವನಾಶನಂ ||44||

||ಇತಿ ಶ್ರೀ ಅಮೃತಸಂಜೀವನಸ್ತೋತ್ರಂ ಸಮಾಪ್ತಂ ||

28/04/2020

#ಶಂಕರ #ಜಯಂತಿ #ಶುಭಾಶಯಗಳು

ಶ್ರೀ ಶಂಕರಾಚಾರ್ಯರ ಸುಪ್ರಭಾತ
(ಶ್ರೀ ಶೃಂಗೇರಿ ಶಿವಗಂಗಾ ಶಾರದ ಪೀಠದ 17ನೇ ಪೀಠಾಧಿಪತಿಗಳಾಗಿದ್ದ ಶ್ರೀ ಶ್ರೀ ವಿಶ್ವೇಶ್ವರಾನಂದಭಾರತೀಸ್ವಾಮಿಗಳಿಂದ ವಿರಚಿತ)

ಶ್ರೀ ಶಿವಾಯ ಗುರುವೇ ನಮಃ
ಶ್ರೀ ಶಂಕರಾಚಾರ್ಯ ಸುಪ್ರಭಾತಮ್
ಅಜ್ಞಾನಧ್ವಾಂತಸೂರ್ಯಾಭಾಂ ಶಾರದರೂಪಿಣೀಂ ಶುಭಾಮ್
ಜ್ಞಾನಪ್ರದಾಂ ಸ್ಮರಾಮ್ಯಂಬಾಂ ಸರ್ವಶಕ್ತಿಮಯೀಂ ಸದಾ ||1||

ಆಚಾರ್ಯವರ್ಯ ಕರುಣಾಮಯ ಮೋಕ್ಷದಾಯಿನ್
ಅಜ್ಞಾನಜಾಡ್ಯತಿಮಿರಾಪಹ ದಿವ್ಯಗಾತ್ರ
ಪ್ರಾರಬ್ಧಕರ್ಮಸುವಿಮೋಚನಜ್ಞಾನರಾಶೇ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||2||

ಸರ್ವಾರ್ಥಸಾಧಕ, ಸದಾಶಿವ ಶಾಂತಮೂರ್ತೇ
ತೇಜೋಮಯಾರ್ತಿಹರ ತಾತ್ವಿಕ ಮಾರ್ಗದರ್ಶಿನ್
ಪೀಯೂಷವರ್ಷಿಪರಿಪೂರ್ಣಮುಖೇಂದುಬಿಂಬ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||3||

ದಾರಿದ್ರ್ಯನಾಶನ ದಯಾಮಯ ದೀನಬಂಧೋ
ಧರ್ಮಸ್ವರೂಪ ಧೃತಷಣ್ಮತ ಧರ್ಮಸಂಸ್ಥ
ಶ್ರೀ ಭಾರತೀ ವಿಜಯ ಲಬ್ಧಯಶೋ ವಿಶಾಲ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||4||

ಶ್ರೀ ವ್ಯಾಸನಿರ್ಮಿತ ಮಹೋಜ್ವಲ ಸೂತ್ರಭಾಷ್ಯ
ನಿರ್ಮಾಣ ಸಂಗತಿ ಧುರೀಣ ಲಸತ್ಪ್ರಭಾವ
ಜ್ಞಾನಪ್ರದಾನ ಚಣಪಾದಪಯೋಜಯುಗ್ಮ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||5||

ಆಜ್ಞಾವಶಂವದ ರಮಾ ಕರುಣಾಕಟಾಕ್ಷ
ಭೂಮಾಪ್ರದಾನ ಗುಣಸಿದ್ಧಗುರುಸ್ವಭಾವ
ಆರ್ಯಾಂಬಿಕಾತನಯ ಬಂಧವಿಮೋಚಕಸ್ಯ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||6||

ಜನ್ಮಾದಿ ದುಃಖವಿನಿವಾರಣ ಭಕ್ತಪೋಷ
ದೇಹಾತ್ಮಧೀಭ್ರಮನಿವಾರಕ ಜ್ಯೋತಿರೂಪ
ಶ್ರೀ ಕಾಲಟೀಜನನ ಶಿಷ್ಯಹೃದಬ್ಜವಾಸ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||7||

ಬ್ರಹ್ಮಣ್ಯದೇವ ತವಶಾಂತ ಮುಖಾರವಿಂದ
ಸನ್ದರ್ಶನೇನ ಕಲುಷಾನಭಿಭೂತಚಿತ್ತಾಃ
ಸಚ್ಚಿತ್ತಯೋಗಮುಪಯಾಂತಿ ನರಾಃ ಕ್ಷಣೇನ
ತ್ವದ್ದರ್ಶನಂ ಸುಕೃತಿನಾಂ ಖಲು ಜಾಯತೇ ಹಿ ||8||

ಧೀಲಕ್ಷ್ಯಯುಕ್ತ ಬುಧಸೇವಿತಭಾವಗಮ್ಯ
ವೈರಾಗ್ಯಭಾಗ್ಯ ವರದಾಭಯ ಪಾಣಿಪದ್ಮ
ಸರ್ವಜ್ಞಪೀಠಸಮಧಿಷ್ಠಿತ ಪಾದಪದ್ಮ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||9||

ಶ್ರೀ ದಕ್ಷಿಣಾಭಿಮುಖದೇವ ಮಹೇಶ ಶಂಭೋ
ವಿಶ್ವಾರ್ತಿಭಂಜನ ವಿವೇಕಿ ಜನಾಳಿವಂದ್ಯ
ಬ್ರಹ್ಮಾದಿದೇವಗಣಮಾನಿತ ಮಂತ್ರಶಕ್ತೇ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||10||

ಧ್ಯಾಯಾಮಿ ನಿತ್ಯಮನವದ್ಯ ಪದದ್ವಯಂ ತೇ
ಕೈವಲ್ಯದಾಯಿ ಕಮಲಾಮಲಕಾಂತಿಕಾಂತಮ್
ಸಾಕ್ಷಚ್ಛಿವಾತ್ಮಕಮಮೇಯ ಮಹಾನುಭಾವ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||11||

ಭೋ, ಪೂಜ್ಯಪಾದ ವೃಷಭಾಚಲವಾಸ ವಿಶ್ವ
ಸ್ಯಾತ್ಮ ಸ್ವರೂಪ ಸದಸದ್ಗುಣಸಾರಗಮ್ಯ
ಅದ್ವೈತರಾಜ್ಯ ಪರಿಪಾಲಕ ಸಂಯಮೀಂದ್ರ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||12||

ಸತ್ಪಂಡಿತೇಡ್ಯ ಧೃತದಂಡ ಕಮಂಡಲು ಶ್ರೀ
ಹಸ್ತಾಬ್ಜದಿವ್ಯ ಪದಪಂಕಜ ಪಾಹಿ ಪಾಹಿ
ಭಾವಂ ಪ್ರಭೋಧ್ಯ ಭವಬಂಧವಿಮೋಚಕಸ್ಯ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||13||

ಬಾಲಂ ವಿಶುದ್ಧಪರಮಾತ್ಮರತಿಂ ಸುಧೀರಂ
ದೃಷ್ಟ್ವಾಕರಾಮಲಕಸಾರ್ಥಕ ನಾಮಧೇಯಂ
ಕೃತ್ವಾ ಸ್ವಶಿಷ್ಯಮಧಿಕಂ ಮುದಿತೋಸಿತಸ್ಯ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||14||

ಸದ್ಬ್ರ್ಮಹಚರ್ಯ ಗುರುಸನ್ನಿಧಿವಾಸಕಾಲೇ
ಭಿಕ್ಷಾಟನಾಯ ಗೃಹಿಣೋsಧಿಕಭಕ್ತಿಭಾಜಃ
ರಿಕ್ತಸ್ಯ ಗೇಹಮಕರೋಃ ಕಮಲಾನಿವಾಸಂ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||15||

ತದ್ವೇಶ್ಮಯತ್ಸ್ವ ಯಮುಪೇಯುಷಿ ದೀನಬಂಧೌ
ತ್ವಯ್ಯಾದರೇಣ ಗೃಹಿಣೇ ಕಿಲ ಸಾ ದ್ವಿಜಸ್ಯ
ಧಾತ್ರೀ ಫಲಂ ಕಿಮಪಿ ದತ್ತವತೀ ಹಿ ತುಭ್ಯಂ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||16||

ಶ್ರೀಪದ್ಮಪಾದ ಮುನಿಸೇವಿತಪಾದಪದ್ಮ
ಸತ್ತೋಟಕಾಭಿಧ ಸುಶಿಷ್ಯ ಗುಣಾಳಿತೃಪ್ತ
ಸತ್ಸೇವಕೋತ್ತಮ ಕರಾಮಲಕಾದಿಯುಕ್ತ
ಬುದ್ಧಿಪ್ರಧಾನ ಬುಧವರ್ಯ ಸುರೇಶ್ವರಾಪ್ತ ||17||

ವ್ಯಾಘ್ರಾಜಿನಸ್ಥ ಗುರುಪುಂಗವ ಶರ್ಮದಾಯಿನ್
ತ್ಸತ್ಸೇವಯಾ ವಿದಿತ ಶಾಂತಿರಸಾತಿ ಶುದ್ಧಾನ್
ಭಕ್ತಪ್ರಭಾವ ಚುತುರಾಂಸ್ತವ ಶಿಷ್ಯಮುಖ್ಯಾನ್
ಧ್ಯಾಯಾಮಿ ಚೇತಸಿ ಮಮಾತ್ಮವಿಕಾಸಸಿದ್ಧ್ಯೈ ||18||

ಶಂಕಾಕಳಂಕ ಪರಿಹಾರಕ ಕಿಂಕರಾಣಾಂ
ಪ್ರಾಗ್ಜೋತಿರಾದಿಸುವಿಸಾರಿ ವಿಭಾವಿಶೇಷ
ಪ್ರಾಭಾಕರಾದಿ ಘನಪಂಡಿತ ಸೇವಿತಾಂಘ್ರೇ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||19||

ಸಂಸಾರಪಂಕಪರಿಶೋಷಣ ತೀಕ್ಷ್ಣರಶ್ಮೇ
ತಾಪತ್ರಯಾಕುಲಜನೌಘ ಸುಖಪ್ರದಾತಃ
ಸಾಮ್ರಾಜ್ಯಪಾಲನ ಸುಧನ್ವನೃಪಾಲ ಶಾಸ್ತ್ರಃ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||20||

ಸರ್ವಾಪದುದ್ಧುರಣ ಸಾಂದ್ರದಯಾರಸಾಬ್ಧೇ
ಸಾನ್ನಿಧ್ಯವರ್ತಿ ಹಿತ ಶಿಷ್ಯ ಸಮಾಹಿತಾತ್ಮನ್
ಭಾಷ್ಯಾರ್ಥ ಭೋಧನ ವಿಧಾನ ಕಲಾಪ್ರವೀಣ
ತೇ ಸಾರ್ವಭೌಮ ಗುರುಶಂಕರ ಸುಪ್ರಭಾತಮ್ ||21||

ತುಂಗಾಂಬು ಶ್ರೀಕರ ಕಣೈಶ್ಯಿಶಿರೇ ನೃನಾರೀ
ಸಂದೋಹ ರಂಜಿತ ಝಷಪ್ರಕರ ಪ್ರಮೋದೇ
ಹಂಸಾವಳೀ ಶುಕಪಿಕಾದಿ ವಿಕೂಜಿತೈಶ್ಚ
ರಮ್ಯೇ ಪವಿತ್ರ ಭುವಿಶೃಂಗಗಿತೌ ವಿಶಾಲಮ್ ||22||

ನಿರ್ಮಾಯ ಸುಂದರಶಿಲಾಕೃತಿಶಿಲ್ಪಜಾಲೈಃ
ಪ್ರಾಸಾದಮದ್ಭುತವಿಮಾನವಿಶೇಷಮಗ್ರ್ಯಮ್
ಸಂಪೂಜ್ಯ ದಿವ್ಯಮಣಿಭೂಷಣಭೂಷಿತಾಂಗೀಂ
ಶ್ರೀ ಶಾರದಾಂ ಪ್ರಮುದಿತಾಮಕರೋಸ್ತ್ವಮಂಬಾಮ್ ||23||

ತತ್ರಾದ್ಯಪೀಠ ಗುರುಯೋಗ್ಯ ಪದೇ ನಿವೇಶ್ಯ
ಶ್ರೀಮತ್ಸುರೇಶ್ವರ ಯತೀಶ್ವರಮಾತ್ಮತುಲ್ಯಮ್
ಭಾಷ್ಯಾದಿ ವಾರ್ತಿಕ ಮುಖಾನಪಿ ಕಾರಯಿತ್ವಾ
ತುಂಗಾಪ್ರಶಸ್ತ ಪುಲಿನೇ ಖಲು ತೇನ ಭಾಸಿ ||24||

ಧ್ಯಾಯಾಮಿ ಸಂಶಯ ವಿದಾರಣ ಧೀ ವಿಶಾಲಂ
ತಂ ಸದ್ಗುರುಂ ಶಿವಗುರೋಃ ಪ್ರಿಯ ಪುತ್ರರತ್ನಮ್
ಧೀಮಂತಮಾಂತರ ಗುಹಾನಿಲಯಂ ನಿತಾಂತಂ
ಶ್ರೀ ಶಂಕರಾರ್ಯ ಗುರುವರ್ಯಮಹಂ ಹಿ ಸಿದ್ಧ್ಯೈ ||25||

ಯೇ ಮಾನವಾಸ್ಸತತಮಾಶ್ರಮಿಣಸ್ಸಮಸ್ತ
ಮೂರ್ತಿಪ್ರಕಾಶನಗುರುಂ ಪರಮಾರ್ಥಬುದ್ಧ್ಯಾ
ಧ್ಯಾಯಂತಿತೇ ತತ ಮಹೋದ್ಧತ ದುಃಖವಾರ್ಧಿ
ಸಂತಾರಣೇನ ನಿತರಾಂ ಮುದಿತಾ ಭವಂತಿ ||26||

ರಾಗಾದಿರೋಗ ಪರಿಶೋಷಣ ಭೇಷಜಂ ತಂ
ಯೋಗಾದಿ ಭೂಷಣ ವಿವರ್ಧಿತ ದೇಹಕಾಂತಿಮ್
ಶಿಷ್ಯಾಳಿ ಸೇವಿತ ಮನೋಜ್ಞ ಪದಾಂಬುಜಾತಂ
ಶ್ರೀ ವೇದ ವಾರಿನಿಧಿ ಪೂರ್ಣ ಶರತ್ಸುಧಾಂಶುಮ್ ||27||

ಸೇವೇದ್ಯ ಸಂಸ್ಕೃತಿದವಾನಲತಾಪಶಾಂತ್ಯೈ
ಶ್ರೀ ಶಂಕರಾರ್ಯ ಇತಿ ಪೂಜಿತನಾಮಧೇಯಮ್
ಅದ್ವೈತತತ್ವಮಹಿಮೋನ್ನತಿಮೂರ್ತಿಮಂತಂ
ವಿಶ್ವೈಕಶಾಂತಿಸುಖದಾನವಿಧಾನಶೀಲಮ್ ||28||

ಚಂದ್ರಾರ್ಕವಾಯು ಸಲಿಲಾಗ್ನಿ ವಿಯತ್ಸುಧೀಜ್ಯಾ
ಮೂರ್ತ್ಯಾ ಸಮಸ್ತ ಜಗತಾಂ ಪರಿಪಾಲಕಂ ತಮ್
ಫಾಲೇ ವಿರಾಜದತಿ ದಿವ್ಯ ಮಹಾ ಪ್ರಕಾಶಮ್
ಧ್ಯಾಯಾಮಿ ಶ್ರೀ ಶಿವಗುರುಂ ಮಮ ಬುದ್ಧಿಕೋಶೇ ||29||

ಯೋ ಮಂದಧೀರ್ಗಿರಿರಿತಿ ಪ್ರಥಿತೋತಿ ಭಕ್ತ
ಶಿಷ್ಯಸ್ತ್ವದೀಯ ಕರುಣಾರ್ದ್ರದೃಶೈವ ಸದ್ಯಃ
ಸ್ತುತ್ಯಾ ಕುಶಾಗ್ರಧೀಷಣೋ ಭುವಿತೋಟಕಾಖ್ಯ
ವೃತ್ತೈಸ್ಸತೋಟಕ ಇತಿ ಪ್ರಥಿತೋ ಬಭೂವ ||30||

ಭೋ ಶಂಕರಾರ್ಯ, ಮುನಿವರ್ಯ, ಶ್ರುತಿಪ್ರಶಸ್ತ
ದೀವ್ಯದ್ಗುಣಾಢ್ಯ ವಿದಿತಾಖಿಲಶಾಸ್ತ್ರತತ್ವ
ಅಜ್ಞಾನರಾತ್ರಿಮಿಹಿರಾಖಿಲಲೋಕಬಂಧೋ
ಬ್ರಹ್ಮಾದ್ವಯೈಕರಸಪೂರ್ಣನಿಗೂಢತತ್ತ್ವ ||31||

ಸರ್ವಾಂಗ ತಾಪಕ ಭವಾಭಿದ ದೀರ್ಘರೋಗ
ಸಂಹಾರಕಾಮೃತ ಮಹೌಷಧಿ ರೂಪನಿತ್ಯಮ್
ಸೇವಾಂ ತ್ವದೀಯ ಪದಪಂಕಜ ಭಕ್ತಿರೂಪಾಂ
ಕೃತ್ವಾಥವಂದನ ಶತಾನಿ ಸಮರ್ಪಯಾಮಿ ||32||

ಶ್ರೀ ಶಂಕರಾಖಿಲಗುರೋ ತವ ಸುಪ್ರಭಾತ-
ಮಿತ್ಥಂ ಸುಬೋಧವಚಸಾ ರಚಿತಂ ಮಹಾ ಯತ್
ತ್ಪತ್ಪ್ರೇರಣೈವ ತವ ಮೇ ನ ಗುಣೋಪಿ ದೋಷಃ
ತ್ವತ್ಕಾರಿತಂ ಕೃತವತಸ್ತ್ವದನುಗ್ರಹೇಣ ||33||

ಫಲಶ್ರುತಿ

ಭಕ್ತ್ಯಾ ಹಿ ಯೇ ಭುವಿ ಜಗದ್ಗುರು ಸಾರ್ವಭೌಮ
ಶ್ರೀ ಸುಪ್ರಭಾತ ವಿನುತಿಂ ಮನುಜಾಃ ಪಠಂತಿ
ತೇ ಯಾಂತಿ ಶಾನ್ತಿಸುಖಲಕ್ಷ್ಮ್ಯವಿದೋsಖಿಲಾರ್ಥಾನ್
ಮುಕ್ತಿಂ ಚ ಶಂಕರಗುರೋಸ್ಸದನುಗ್ರಹೇಣ ||34||

ಇತಿ ಶ್ರೀ ಶಂಕರಾಚಾರ್ಯ ಸುಪ್ರಭಾತಸ್ಯ ಕೀರ್ತನಾತ್
ಮೋಹಭ್ರಾಂತಿ ವಿಮುಕ್ತಾಸ್ಸ್ಯುಸ್ಸ್ವಯಮೇವ ನ ಸಂಶಯಃ ||35||

ಧ್ಯಾಯಾಮೋ ಭವತ್ಪಾದ ಶಂಕರಂ ಕರುಣಾಲಯಮ್ |
ಸುಖಶಾಂತಿಮನೋಭೀಷ್ಟಸಿದ್ಧಿದಂ ಶುದ್ಧಬುದ್ಧಿದಮ್ ||

ಶ್ರೀಶಂಕರ ಭಗವತ್ಪಾದ ಚರಣಾರವಿಂದಾರ್ಪಣಮಸ್ತು ಶ್ರೀ ಶಂಕರ ಭಗವತ್ಪಾದಾಸ್ತೃಪ್ಯಂತು

ಇತಿ ಶ್ರೀ ಶ್ರೀ ವಿಶ್ವೇಶ್ವರಾನಂದ ಭಾರತೀಸ್ವಾಮಿ ಕೃತಿಷು ಶ್ರೀ ಶಂಕರಾಚಾರ್ಯ ಸುಪ್ರಭಾತಮ್

Deepak Hv