04/06/2026
🙏🥺
හොරණ වැඩිහිටි නිවාසයේ බිහිසුණු ගින්නකින් 11ක් දිවිසැරිය නිමා කරයි: මියගිය මවුපියන්ට නිවන් සුව අත්වේවා! 🥺💔
හොරණ, බටගොඩ ප්රදේශයේ පිහිටි “සෙනෙහසේ කැදැල්ල” මවුපිය සෙවණ වැඩිහිටි නිවාසයේ අද (03) සන්ධ්යාවේ හටගත් බිහිසුණු ගින්නකින් එහි නේවාසිකව සිටි වැඩිහිටි මවුපියන් 11 දෙනකු අවාසනාවන්ත ලෙස ජීවිතක්ෂයට පත්ව තිබේ. ගින්න හටගන්නා අවස්ථාවේදී මෙම නිවාසයේ වැඩිහිටියන් 70 දෙනකු පමණ රැඳී සිට ඇති අතර, ඉන් 45 දෙනකු නිරුපද්රිතව බේරා ගැනීමට පොලිසිය සහ ප්රදේශවාසීන් සමත්ව ඇත. කෙසේ වෙතත්, ගින්නත් සමඟ ඇති වූ ගෑස් සිලින්ඩර පිපිරීමක් හේතුවෙන් අනතුරේ බිහිසුණු බව ඉහළ ගොස් ඇති අතර, මියගිය වැඩිහිටියන් බොහොමයක් තමන් සිටි පුටුවලම අවසන් හුස්ම හෙළා ඇති බව අඟුරුවාතොට පොලිසිය සිදුකළ මූලික විමර්ශනවලදී අනාවරණය වී තිබේ.
මෙම ඛේදනීය සිදුවීමෙන් තුවාල ලැබූ තවත් පුද්ගලයන් හයදෙනකු කඩිනමින් රෝහල්ගත කිරීමට පියවර ගෙන ඇති අතර, ඔවුන්ගේ සෞඛ්ය තත්ත්වය පිළිබඳව වෛද්ය අංශ දැඩි අවධානයෙන් පසුවෙයි. හොරණ නගර සභාවේ ගිනි නිවීමේ ඒකකය, පොලිසිය සහ ප්රදේශවාසීන් එක්ව දැඩි පරිශ්රමයකින් යුතුව ගින්න මැඩපැවැත්වීමට කටයුතු කර ඇත. ගින්න හට ගැනීමට හේතුව මෙතෙක් නිශ්චිතව අනාවරණය වී නොමැති අතර, මියගිය මවුපියන්ගේ අනන්යතාව තහවුරු කරගැනීම සහ අනතුර පිළිබඳ වැඩිදුර පරීක්ෂණ අඟුරුවාතොට පොලිසිය විසින් ක්රියාත්මක කරනු ලබයි.
