14/03/2026
السلام عليكم ورحمة الله وبركاته 🤍
زي ما أكيد كلكم عارفين، صار قصف وحرب في دبي في الأيام اللي فاتت، وهذا الشي للأسف أثر على حركة الشحن بشكل كبير.
أنا كنت موفرة مجموعة من المنتجات بالحجز من دبي، وآخر شحنة كانت محجوزة قبل الحرب بيوم. لكن بسبب الأحداث والتأخير اللي صار في الشحن، للأسف شحنة واحدة فقط ما قدرتش توصل في الوقت رغم إنها كانت محجوزة قبل باقي الشحنات.
الحمد لله باقي الشحنات، وعلى كلام شركة الشحن، بعون الله بتوصل غداً.
أما بالنسبة للشحنة اللي تأخرت، فأنا طبعاً نتحمل المسؤولية كاملة، لأن من حق الزبونة لو وصلت البضاعة بعد العيد إنها ما تستلمهاش. وحنقوم أيضاً برد العربون بالكامل للناس اللي في الشحنة هذه.
ونحب نوضح حاجة: الزبونات اللي يحجزن من عندي من زمان يعرفنّي ويعرفن أسعاري، ويعرفن إني ديما نحاول نخلي الأسعار معقولة وما نبالغش في المكسب. ولهذا مع الزيادات اللي صارت في الشحن بسبب الظروف، الخسارة بتكون أكبر عليّا. لكن هذا شيء عادي قدام راحة الزبونة وحقها.
والله يعلم إني كنت نتمنى من قلبي إن كل وحدة تعيد بلبسها اللي اختارته، لكن هذا أمر من الله سبحانه وتعالى وما كانش بيدي.
طبعاً الشحنة اللي تأخرت هي شحنة واحدة فقط، والزبونات اللي فيها بعثتلهم رسالة في الخاص.
لو ما وصلكش مني رسالة، اعرفي إن طلبك إن شاء الله ماشي في الشحن وبيوصلك.
وبصراحة نحب نقول كلمة حق:
والله إني تحشمت من ردود فعلكم وكلامكم الطيب. في زبونات لما قلتلهم بنرجعلهم العربون قالوا:
"لا والله، بارك الله فيك وربّي يعوضك."
شكراً من قلبي على تفهمكم للظروف 🙏
ورغم إن كان في عدد بسيط جداً زعل، أنا نعتذر منهم مرة ثانية، ويشهد الله إن الموضوع هذا مش بإيدي، وهذه ظروف حرب أثرت على الجميع.
ربي يقدرني ديماً نكون عند حسن ظنكم، وكل عام وأنتم بالف خير
