21/02/2023
လိုက်မရောင်းနဲ့၊ လာဝယ်အောင်လုပ်
➖➖➖➖➖➖➖➖➖➖➖➖➖➖➖➖
"အကြော်စုံ ပူပူလေးရမယ်၊ အကြော်စုံ ပူပူလေး"
ဒါ ညနေ ၆ နာရီလောက်ဆိုရင် သုံးဘီးတစ်စီးနဲ့ ကျွန်တော်တို့ အိမ်ရှေ့က ဖြတ်ဖြတ်သွားလေ့ရှိတဲ့ အကြော်ရောင်းတဲ့ ဦးလေးကြီးရဲ့ အသံ။
သူ့ခမျာ ဆိုင်ကယ်ဆီကုန်ခံ၊ အပင်ပန်းခံပြီး အကြော်တွေလည်ရောင်းပေမယ့်လည်း ကျွန်တော်တို့ လမ်းထဲရောက်လာတဲ့အခါတိုင်း သူ့ဆီက ဘယ်သူမှအကြော်ဝယ်မစားကြဘူး။
ကျွန်တော်တို့ လမ်းထဲကလူတွေက အကြော်မစားကြလို့စားဆိုတော့လည်း မဟုတ်ဘူး။ လမ်းထဲကလူတွေက သူ့ဆီကသာ မဝယ်တာ နေတဲ့နေရာကနေ တော်တော်လှမ်းလှမ်းသွားရတဲ့ ဟိုးဂျောင်ကြိုဂျောင်ကြားက အကြော်ဆိုင်ကိုတော့ တကူးတက သွားစားကြတယ်။
ကျွန်တော်ကိုယ်တိုင်လည်း အကြော်စားချင်တဲ့အခါတိုင်း အိမ်ရှေ့ထိလာရောင်းတဲ့ ဦးလေးကြီးဆီမှာ မစားဘဲ တကူးတက အဲ့ဒီအကြော်ဆိုင်ထိ သွားစားလေ့ရှိတယ်။
အဲ့ဒီဆိုင်က အကြော်ရောင်းတဲ့ အန်တီကြီးကလည်း ချေတယ်။ သွားဝယ်တဲ့အခါတိုင်း အကြော်စားချင်လား၊ စားချင်ရင် စောင့်ရမယ်၊ ရှေ့မှာ မှာထားတဲ့ လူတွေအများကြီး ဒီလို ခပ်ပြတ်ပြတ်ပဲ ပြောလေ့ရှိတယ်။
ကျွန်တော်တို့လည်း စားချင်တော့ စောင့်ရတယ်၊ သူချေလည်း ခံရတာပဲ။ ဘာလို့ဆို သူ့ရဲ့အကြော်က စားကောင်းတာကိုး။
အဲ့တော့ တစ်ခါတလေ စဥ်းစားမိတယ်။ ဘာလို့ အိမ်ရှေ့ထိလာပြီး ချိုချိုသာသာနဲ့ အကြော်လေးစားကြပါဦးလို့ သုံးဘီးနဲ့ လာရောင်းတဲ့ ဦးလေးကြီးဆီမှာ မဝယ်ဘဲ ဒီဂျောင်ကြိုဂျောင်ကြားက ခပ်ချေချေအန်တီကြီးဆီမှာ တကူးတက သွားဝယ်မိနေတာလဲပေါ့။
အဖြေက အဲ့ဒီအန်တီကြီးရဲ့ အကြော်ဟာ ကောင်းလွန်းနေတာကြောင့်ပါပဲ။ သူ့ဆီမှာ ကျွန်တော်တို့လိုချင်တဲ့အရာ ရှိနေတာကြောင့်ပါပဲ။ သူဟာ အကြော်ရောင်းပါတယ်လို့ လိုက်အော်မရောင်းပါဘူး၊ ဒါပေမဲ့ သူ့ရောင်းတဲ့အကြော်က ဘယ်လောက်ကောင်းပါတယ်ဆိုတာတော့ လူတွေသိအောင်တော့ ပြုလုပ်ပါတယ်။
အဲ့ဒီအခါမှာ သူလိုက်မရောင်းလည်း လူတွေက သူ့ဆီမှာ တကူးတကသွားဝယ်စားကြပါတယ်။
ဒါကြောင့် မိတ်ဆွေတို့လို အကြံပေးချင်တာက စျေးရောင်းကောင်းချင်တယ်ဆိုရင်
ကျွန်တော်တို့ ဘာရောင်းပါတယ်ဆိုတာထက် ကျွန်တော်တို့ရောင်းတဲ့ ပစ္စည်းက ဘာလုပ်ပေးနိုင်ပါတယ်ဆိုတာကိုသာ အသားပေး လုပ်ပါ။
ကျွန်တော်တို့ပစ္စည်းဘယ်လောက်ကောင်းတယ်ဆိုတာ လူတွေသိလေလေ ကျွန်တော်တို့ လိုက်ရောင်းစရာမလိုဘဲ လူတွေလာဝယ်လေလေပါပဲလို့ ပြောချင်ပါတယ်။
Dr Thet Htar Aung
ီ_ဘာ_ဘာ
