25/10/2024
ပိစိလေးတို့ သွားပေါက်ချိန်😍😍
ကလေးများသွားပေါက်ချိန်
•••••••••••••••••••••••••••••••••••••••••••••
သွားပေါက်ချိန်နဲ့ပတ်သက်ရင် တသမှတ်တည်းမရှိပါဘူး။ ကလေးတစ်ဦးနဲ့တစ်ဦး မတူညီနိုင်ကြပါဘူး။ ကလေးအသက် ၁နှစ်ဝန်းကျင်မှာ သွားပေါက်တာကိုတော့ တွေ့ရများပါတယ်။
💠ဘယ်အချိန်သွားစပေါက်မလဲ?
တခါတလေ ကလေးအချို့ဟာ မွေးကတည်းက သွားလေးပါလာတာကို ရှားရှားပါးပါးတွေ့ရတတ်ပါတယ်။ တချို့ကတော့ အသက် ၄လမတိုင်ခင်တည်းက သွားထွက်တာကိုတွေ့ရပါတယ်။ တချို့ကတော့ အသက် ၁၂လလောက်မှ သွားပေါက်ပါတယ်။ အများစုကတော့ သွားငုတ်တုတ် လူငုတ်တုတ်ဆိုတဲ့စကားအတိုင်း အသက် ၆လလောက်မှာ သွားစပေါက်တာကိုတွေ့ရပါတယ်။
💠ကလေးလေးတွေသွားစပေါက်ရင် ဘာလက္ခဏာတွေရှိတတ်လဲ?
ကလေးလေးတွေသွားစပေါက်နေပြီဆိုရင် သူတို့မှာ Teething Symptoms လို့ခေါ်တဲ့ အနည်းငယ်မအီမသာဖြစ်တဲ့သွားပေါက်လက္ခဏာလေးတွေ ကြုံရလေ့ရှိပါတယ်။ အဲဒါတွေကတော့
▪️သွားထွက်မယ့်နေရာက သွားဖုံးရဲပြီးနာနေခြင်း
▪️အဖျားငွေ့ငွေ့ရှိခြင်း (38'C)
▪️ပါးတစ်ဖက်ရဲနေခြင်း
▪️မျက်နှာမှာအနီပြင်လေးဖြစ်နေခြင်း
▪️နားရွက်ကိုပွတ်နေတတ်ခြင်း
▪️သွားရည်ပိုကျခြင်း
▪️ပါးစပ်ထဲမှာဘာမှမရှိဘဲဝါးနေခြင်း
▪️ညဘက်ကောင်းကောင်းမအိပ်နိုင်ခြင်း
▪️ဂျီကျခြင်း စတဲ့လက္ခဏာများဖြစ်ပါတယ်။
💠ဒီလိုလက္ခဏာတွေဖြစ်နေပြီဆိုရင်
▪️Teething Rings လေးတွေပေးပြီး ကလေးကိုကိုက်ခိုင်းထားလို့ရပါတယ်။ ရေခဲသေတ္တာ အောက်အကန့်ထဲမှာထားပြီး အေးအေးလေးကို ကိုက်ခိုင်းထားတာက သွားဖုံးနာကျင်မှုလျှော့စေပါတယ်။ Teething rings ကို ရေခဲအခဲမခံပါနဲ့။ ပြီးတော့ ကြိုးနဲ့ချည်ပြီး လည်ပင်းမှာဆွဲထားတာမျိုးတော့မလုပ်ရပါဘူး။ သန့်ဖို့လည်း အထူးဂရုစိုက်ရပါမယ်။
▪️၆လအထက်ကလေးများဆိုရင်တော့ Paracetamol အရည်ကို အသက်/ခန္ဓာကိုယ်အလေးချိန်ပေါ်လိုက်ပြီး ဆေးညွှန်းအတိုင်းတိုက်နိုင်ပါတယ်။
💠ကလေးသွားပေါက်တဲ့အစီအစဉ်အကြမ်းဖျင်း
▪️အရှေ့အောက်သွား ၂ ချောင်း - အသက် ၅~၇လဝန်းကျင်
▪️အရှေ့အပေါ်သွား ၂ချောင်း - အသက် ၆~၈လ ဝန်းကျင်
▪️အရှေ့ဘေးသွား ၂ချောင်း - အသက် ၉~၁၁လဝန်းကျင်
▪️အောက်ဘေးသွား ၂ချောင်း- အသက် ၁၀~၁၂လဝန်းကျင်
▪️ပထမအံသွား( First Molars) - အသက် ၁၂~၁၆လ ဝန်းကျင်
▪️Canines (ဘေးသွားနှင့် အံသွားကြားမှ သွားများ) - အသက် ၁၆~၂၀လ ဝန်းကျင်)
▪️ဒုတိယအံသွား(Second Molars) - အသက် ၂၀လ~၃၀လ ဝန်းကျင်
🍀ကလေးလေးတွေဟာ အသက် ၂-၃နှစ်ရောက်ရင် ငယ်သွားလေးတွေ စုံနေတတ်ပါတယ်။
💠သွားပေါက်နောက်ကျခြင်း
ကလေးငယ်များဟာ ၆-၇လမှာ ပထမဆုံးသွား စမထွက်သေးတာက စိတ်ပူစရာမဟုတ်ပါဘူး။ ဒါပေမယ့် တစ်နှစ်ကျော်တဲ့အထိ သွားတစ်ချောင်းမှစမထွက်သေးရင်တော့ ဆရာဝန်နဲ့တိုင်ပင်ပြသသင့်ပါတယ်။ သွားပေါက်နောက်ကျရခြင်းရဲ့ နောက်ကွယ်မှာ အာဟာရမပြည့်ဝခြင်း၊ မျိုးဗီဇ၊ လမစေ့ဘဲမွေးခဲ့ခြင်း၊ ဖွံ့ဖြိုးမှုနောက်ကျခြင်းနဲ့ ဟော်မုန်းဆိုင်ရာပြဿနာများ ရှိကောင်းရှိနိုင်လို့ဖြစ်ပါတယ်။ ဆရာဝန်နဲ့ပြသမှသာ အကြောင်းရင်းကို ခန့်မှန်းပြီး လိုအပ်သလို စောင့်ကြည့်ကုသနိုင်မှာဖြစ်ပါတယ်။
💠ခံတွင်းနှင့်သွားသန့်ရှင်းရေး
▪️ကလေးသွားစပေါက်ပြီဆိုတာနဲ့ သွားတိုက်ပေးလို့ရပါပြီ။
▪️အသက်အရွယ်အလိုက် သွားတိုက်ဆေးကို ရွေးချယ်ပါ။
▪️၃နှစ်အောက်မှာ သွားတိုက်ဆေးပမာဏ အမျှင်တန်းပါးပါးလေးသာလိုပါတယ်။
▪️၃နှစ်အထက်မှာတော့ ပဲစေ့ခန့်ပမာဏသာလိုပါတယ်။
▪️သွားရဲ့မျက်နှာပြင်တစ်ခုလုံးခြုံငုံမိအောင် စက်ဝိုင်းပုံစံ ကူတိုက်ပေးပါ။
▪️ညမအိပ်ခင်တစ်ကြိမ်နှင့် ကြိုက်နှစ်သက်ရာတစ်ကြိမ်- တစ်နေ့၂ကြိမ်သွားတိုက်ပေးပါ။
▪️ကလေးကို သွားတိုက်ရတယ်ဆိုတဲ့ အမူအကျင့်လေးသိရအောင်ကြိုးစားပြုလုပ်ပေးပါ။
▪️သွားတိုက်အပြီး သွားတိုက်ဆေးကို ထွေးထုတ်တတ်တဲ့အကျင့်လေးရအောင် ရှေ့ကနေ ပုံစံလုပ်ပြပါ။
💠အစားကျွေးတဲ့ပုံစံနဲ့ပတ်သက်ပြီး လိုအပ်ချက်မရှိအောင်
▪️ကလေးကိုဖြည့်စွက်စာစကျွေးချိန်မှာ အသီးအရွက်၊ အသား၊ ငါး၊ ကြက်ဥ၊ ဘဲဥ၊ ပဲ စသည်တို့ကို တစ်ဆင့်ချင်းစီစုံအောင်ကျွေးသွားပါ။
▪️မိခင်နို့ကို ကလေးအသက် ၂နှစ်အထိတိုက်ကျွေးပေးပါ။
▪️အစာကို အကုန်လုံးကြိတ်ချေကျွေးခြင်းကနေ အစာကျဲ ၊ အစာပျစ်ပျစ်၊ ထမင်းပျော့ပျော့မှ ပုံမှန်ထမင်းသို့ တစ်ဆင့်ချင်းစီတိုးပြီးကျွေးသွားပါ။ ကလေးက သွားမပေါက်သေးရင်တောင် သွားဖုံးနဲ့ ကြိတ်ပြီးစားနိုင်ပါတယ်။
ဒါကတော့ ကလေးများသွားပေါက်ခြင်းနဲ့ပတ်သတ်တဲ့ ဆောင်းပါးဖြစ်ပါတယ်။ အထက်မှာဖော်ပြခဲ့တဲ့ သွားပေါက်ခြင်းမှာ စိုးရိမ်စရာလက္ခဏာများရှိနေရင် ကျွမ်းကျင်သူဆရာဝန်များနဲ့ တိုင်ပင်ဆွေးနွေးပြီး ကုသမှုခံယူဖို့ ရေးသားလိုက်ရပါတယ်ရှင်။
အားလုံးကျန်းမာပျော်ရွှင်ကြပါစေ။
မောင်(ဆေး-၁)မာမီ
✅စာများကို လွတ်လပ်စွာ share နိုင်ပါတယ်။ ခွင့်ပြုချက်တောင်းရန်မလိုပါ။
❗️တစ်ဆင့်ပြန်လည်ကူးယူဖော်ပြခြင်းခွင့်မပြုပါ။
