13/03/2025
မြတ်ဗုဒ္ဓရဲ့ ပြည်တော်ဝင်အခါတော်နေ့….
တပေါင်းလက မြန်မာလတွေထဲမှာ ၁၂-လမြောက်ဖြစ်ပြီး
တစ်နှစ်တာရဲ့ နောက်ဆုံးလလည်းဖြစ်ပါတယ်။
တပေါင်းလရဲ့ ပထမလဝက်က ဆောင်းနှောင်းမှာကျရောက်ပြီးတော့ ဒုတိယလဝက်ကတော့ နွေရာသီမှာကျရောက်ပါတယ်။ ဒါကြောင့် ခေတ်အဆက်ဆက်စာဆိုတို့က တပေါင်းလရဲ့အလှကိုရေးဖွဲ့ကြတာ ယနေ့ထက်တိုင်ပါပဲ။
ဗုဒ္ဓဘုရားရှင်လက်ထက်တော်က ဘုရားရှင်က ရာဇဂြိုဟ်ပြည် ဝေဠုန်ဝန်ကျောင်းတော်မှာ
သီတင်းသုံးနေစဉ် အင်္ဂတိုင်းနှင့် မဂဓတိုင်းက ဒကာ ဒကာမတွေကို
တရားရေအေးတိုက်ကျွေးလျက်ရှိပါတယ်။
ဒီသတင်းကို ခမည်းတော် သုဒ္ဓေါဒနမင်းကြီး ကြားသိသောအခါ သားတော်ဘုရားကို ဖူးတွေ့ချင်နေတာမို့ အမတ်တယောက်ကို အခြွေအရံတစ်ထောင်နဲ့အတူ စေလွှတ်ပြီးပင့်ဆောင်ခိုင်းပါတယ်။
အမတ်က ဗုဒ္ဓဆီ ရောက်လာရာ တရားတော်ကိုနာရပြီး အခြွေအရံတို့နှင့်အတူ ရဟန်းပြုသွားပါတယ်။
သုဒ္ဓေါဒနမင်းကြီးဆီ ဘုရားရှင်ကြွရောက်တော်မူရန် မပင့်ဖြစ်ခဲ့ပါ။
မင်းကြီးလည်း နောက်ထပ် အမတ်တွေကို အခြွေအရံ တစ်ထောင်စီ ကိုးကြိမ်တိုင်အောင် စေလွှတ်ခဲ့သော်လည်း အားလုံး ရဟန်းပြုပြန်ကြကုန်ပါတယ်။
ဆယ်ကြိမ်မြောက်မှာတော့ ဗုဒ္ဓဘုရားရှင်နှင့် ဖွားဖက်တော်ဖြစ်တဲ့ ကာဠုဒါယီအမတ်ကို စေလွှတ်ခဲ့ပြီး ကာဠုဒါယီအမတ်ကလည်း ရှေးကအမတ်တွေအတိုင်း နောက်ပါတွေနဲ့ ရဟန်းပြုပြန်ပါတယ်။
သို့ပေမဲ့ ခရီးလမ်းပန်းသာယာသော တပေါင်းလအချိန်သို့ ရောက်တဲ့အခါမှာ
လမ်းခရီးသာယာပုံ တပေါင်းအလှကို ဂါထာပေါင်း ၆၀ ဖွဲ့နွဲ့ပြီး
ကပိလဝတ်ပြည်သို့ ကြွပါမည့်အကြောင်း ဘုရားရှင်ကို လျှောက်ထားတောင်းပန်ခဲ့ပါတယ်။
ဗုဒ္ဓဘုရားရှင်လည်း လက်ခံပြီး တပေါင်းလပြည့်နေ့မှာ ကပိလဝတ်ပြည်ကို ကြွတော်မူခဲ့ပါတယ်။
ဘုရားရှင် ကပိလဝတ်နေပြည်တော်ကို ကြွတော်မူခြင်းကြောင့်နိဂြောဓာရုံကျောင်းကြီး ပေါ်ပေါက်လာခဲ့ပါတယ်။
ဂါထာ ၁၀ဝ၀ နဲ့တန်ဆာဆင်အပ်သော ဝေဿန္တရာဇာတ်တော်ကြီးကို ဟောတော်မူခဲ့ပါတယ်။
ခမည်းတော် သုဒ္ဓေါဒနမင်းကြီးလည်းမဟာဓမ္မပါလဇာတ်တော်ကြီးကို ကြားနာရတဲ့အခါမှာ အနာဂါမ် တည်ခဲ့ပါတယ်။ နောင်အခါအရဟတ္တဖိုလ် တည်သွားပါတယ်။
ဗုဒ္ဓဘုရားရှင် ကပိလဝတ်ပြည်ဆီ ကြွရောက်တော်မူပြီး တရားဟောတော်မူသဖြင့် မိထွေးတော်ဂေါတမီပါ သောတာပန်တည်နိုင်သွားပါတယ်။
ယသော်ဓရာကို အကြောင်းပြုပြီး စန္ဒကိန္နရီဇာတ်တော်ကိုလည်း ဘုရားဟောတော်မူခဲ့ပြီး ညီတော်နန္ဒမင်းသား ရဟန်းပြုဖြစ်ပါတယ်။
သားတော်ရာဟုလာ သာမဏေဘဝသို့ ရောက်ရှိခဲ့ပါတယ်။ သာကီဝင်မင်းသားတစ်ထောင် ရဟန်းဘောင်အတွင်း ရောက်ရှိသွားပါတယ်။
တပေါင်းလပြည့်နေ့က ဘုရားရှင် ပြည်တော်ဝင်ဖို့ စတင်ကြွလှမ်းသောနေ့ဖြစ်တာကြောင့်လည်း အဲ့ဒီနေ့ကို အကြောင်းပြုပြီး သာသနာတော်၌ထူးခြားတဲ့ ဖြစ်ရပ်ကြီးများ ပေါ်ထွန်းခဲ့သည်။
ဒါက ဗုဒ္ဓဘာသာဝင်တို့ အလေးအမြတ်ထားတဲ့ တပေါင်းလပြည့်နေ့ဖြစ်ပြီး ဘုရားရှင်ရဲ့
ပြည်တော်ဝင်အခါတော်နေ့အကြောင်းကို “ Bae's Box family” မှ မျှဝေပေးခဲ့တာဖြစ်ပါတယ် 🥰
နတ်လူအားလုံး သာဓုခေါ်စေသော် 🙏
#တပေါင်းလပြည့်နေ့
