04/05/2026
Жижиг гутлын хөөрхөн цехээ танилцуулья. 🥰💟
Манай ЧАРАХА хүүхдийн гутлын цех нь Дархан-Уул аймгийн Дархан суманд байрладаг.
Аав ээж хоёр маань анх биднийг жаахан байхад Говь-Алтай аймгийн Баянтоорой хэмээх буйдхан жижиг тосгонд аав минь тариа тарьж, ээж минь ногоо тарьж амьдардаг байлаа. Манайх ам бүл долуул, таван хүүхэдтэй айл. Жижиг тосгонд ажлын байрны олдоц тааруу, элдэв боломж хомс байсан учир 2006 онд Дархан хот руу нүүж энэ гутлын цехийн эхлэл тавигдсан билээ.
Анх нүүж ирээд мод хөрөөдөх, напелеоны цехэд ажиллах, гутал засварын газарт ажиллах зэргээр олон ажил хийснийхээ дараа өөрсдөө өөрийн гараар гутал хийхээр шийдэж, сургалтанд суусныхаа дараа хүүхдийн гутал хийж эхэлсэн билээ.
Ээж минь бага залуу байхаасаа дээл оёж, ээжийнхээ шөвгийг гуйн хонины бэлчээрт монгол гутал оёж байсан үеийн сонирхол, туршлага, өөрийн авьяаст үндэслэн, Аав минь аливааг чанартай, яс хийдэг зангаараа чанарыг ямагт барьж 2012 оноос хойш 15 орчим жил бяцхан жаалуудад гутал урласаар иржээ.
Дархан хот болоод Дарханыг тойрсон сумдуудын малчид манайхаар хамгийн их үйлчлүүлнэ. Том хүний размерын гутал хийдэггүй учир зарим үйлчлүүлэгч нар маань хүүхдийнх нь хөл томроод 36,37 өмсдөг болоод манайхаас гутал авч чадахаа больсон гэж ярих нь ч бий. Нэг айлын гурван хүүхэд өмсөөд элээгээгүй гутлыг дүүгийнхээ хоёр хүүхдэд өмсгөөд нийт таван жаалын хөлд өмсгөгдөж таваргаж явсан гутал гэж сайшаах нь ч бий.
Хамгийн чухал нь чийг татахгүй байлгах гэж элдэв материал туршиж, үнэтэй нь хамаагүй чанартай л байх хэрэгтэй гэж мөнгөө харамлахгүй материал авч хийнэ. Удаан эдэлгээтэй байх чухал гэж, жаалууд элээгээд ч барахгүй гутал хийгээд, өөртөө цалин олгохооргүй үнээр л өгөөд явуулчихна. Хоёулаа л хийдэг учраас өдөрт 3-5 хос гутал л гарна, иймээс намар, өвлийн саруудад захиалсан гутлыг хүлээлгэж байж хийж өгч л амжина. Тиймээс лангуун дээрээ нэг размер олон ширхэгийг байлгаж чадахгүй байх нь олонтаа. Тиймээс зун, хаврын саруудад гутлаа базаах үйлчлүүлэгч нар ч бий.
Ингэж хийсээр олон жилийг ардаа хийжээ.
Чанартай хийх гэж цөөн гутал л хийж амждаг учраас, мөн чанартай материалыг үнэтэй худалдан авч хийдэг учраас багагүй үнэлж зарж байж үйлдвэрлэл үргэлжлэх боломжтой болдог тул энэ үйлдвэрлэлийн үнэ цэнэ юунд байдаг, хэрхэн бий болдог тухай та бүхэндээ сонордуулья гэж шийдэн энэхүү танилцуулгыг эхэлсэн билээ.
Чанарыг болоод Монгол, дотоод үйлдвэрлэлээ дэмжихийн чухлыг ойлгодог, үнэлж дэмждэг монголчууд минь улам олон болох болтугай. 🤗
