05/04/2026
1. Сонголтын стрессийг бууруулах
Хэт их сонголттой үед хүний тархи их ядардаг. Олон юмны нэгийг нь сонгох гэж гайхширч, эргэлзэж байснаас ердөө 2 сонголт л өөртөө өгчих.
Жишээлбэл, "Гараад алхах уу, эсвэл гэртээ гэрээ цэвэрлэх үү?" гэсэн 2-оос 1-ийг нь сонгох нь "Өнөөдөр юу хийх вэ?" гэж түм буман сонголтоор ядрааснаас хамаагүй амар байх болно.
2. Допаминаар хөшүүрэг хий
Хийх дургүй ажлаа хийх үедээ дуртай зүйлтэйгээ хоршуулаад үзээрэй. Дуу сонсдог юм уу, кофе уудаг юм уу дуртай зүйлтэйгээ хоршуулбал дургүй ажлаа ч төд удалгүй дуусгавар болгож чадна.
3. Хүлээлтийг эвдэх
Бидний тархи өөрийгөө зөв гэдгийг цаг үргэлж батлах гэж оролдож байдаг. Тухайлбал, нэг хүнийг муу гээд бодцон бол "Муу" гэдгийг нь л батлах гэж ямар нэг нотолгоо гаргаж ирэхийн тулд ажиллаж өгнө.
Яг үүнтэй адил, ажил ч юм уу, олон нийтийн арга хэмжээнд ч юм уу очихдоо "Хөгжилтэй байх болно", "Сонирхолтой байх болно" гэж тархиндаа хэлэхэд л яг ийм байлгахын тулд эдгээрийг нотлох гэж тархи ажиллаж эхлэх болно.
4. 90 секундын дүрэм
"Бодол"-оор л цааш нь тэтгээд, нэмээд байхгүй бол ямар ч сэтгэл хөдлөл сайндаа л 90 секундын л настай байдаг. Уур хүрэх, сэтгэл гутрах үед 90 секунд л тэсээрэй. Харин яг энэ үедээ нөгөө нэг муу муухай дурсамж, бодлуудаа авчираад тавьчихвал цаашаа гал түймэр мэт дүрэлзэж, нөгөө уур чинь бүр дийлдэхгүй болно.
5. Хардаг, сонсдог зүйлээ цэгцлэх
Юуг их харж, их сонсоно ... тэр нь тархинд гүн бэхлэгдэж байдаг. Бусдын хов жив хөөцөлдөөд л байвал, нэг л мэдэхэд өөрийн амьдралаас хов жив тасрахаа болино. Сошиал дээр үргэлж хар бараан юм үзээд л байвал энэ улс чинь, энэ амьдрал чинь сүйрч байгаа юм биш үү гэж бодогдох болно. Тиймээс, сайн сайхан, урам зориг өгдөг контентуудыг мөн үзэж байвал сайн.
6. Санаа зовнил, сэтгэл түгшүүртээ хоч өгчих
Санаа зовнил, сэтгэл гутрал, түгшүүрийн мэдрэмжиндээ "Балай авгай", "Тэнэг банди" гэх мэтээр хоч өгчих. Юу юугүй стрессдээд, сэтгэл эзэмдээд эхлэхээр нь "Балай авгай минь зүгээр байгаарай, тэгэж стрессдэж байх хүсэл алга" гэх зэргээр загнах төдийд, стресс "Контрол"-оо алдаж, удалгүй сарнин алга болно.
7. "Төгсгөл"-ийн дүрэм
Бид аливаа зүйлийн хамгийн гол хэсэг юм уу, "Төгсгөл"-ийн хэсгийг дурсамжиндаа шингээж үлддэг. Тиймээс, өдрийг "Ёстой муухай өдөр байлаа", "Стрессдэж үхэх нь ээ" гэх зэргээр дуусгачихвал маргааш нь босож ирэхэд мөн л сэтгэл санаа унжигар байна. Харин жоохон ч гэсэн талархах сэтгэлээр "За болно доо" гэж бодоод орондоо орвол маргааш нь сэргэлэн цовоо босож ирнэ.
8. Цаг хугацааны дүрэм
Амьдрал хэт давтагдмал байвал цаг хугацаа нисэн одож, хурдан хөгширч байгаа мэт санагддаг. Тиймээс, ойр ойрхон шинэ зүйл, шинэ аялал, шинэ адал явдал, шинэ сорилт туршиж байвал амьдрал дүүрэн мэт санагдаж эхэлдэг. Наад зах нь өдөр бүр явдаг замаасаа хазайгаад арай өөр замаар явах төдийд л өөр мэдрэмжүүд төрнө.
9. "За" гэхээсээ өмнө пауз ав
Агшин зуур "За" гэж зөвшөөрөх нь өөрийн чинь үнэ цэнийг унагаж байдаг. Тиймээс, "Бодоодхоё", "Эргээд хариу өгье" гэх зэргээр хандвал таны үг, үйлдлийн үнэ цэнийг хэд дахин нэмэгдүүлдэг.
10. Хөгжим бол "Жороор олгодог эм"-тэй адил
Өдөрт дунджаар 5-10 дуу сонсдог хүмүүс огт хөгжим сонсолгүй өнгөрөөдөг хүмүүсээс биеийн дархлаа, сэтгэлийн амар тайван байдал хавь илүү болохыг нотолсон судалгаа байдаг.
Copy
