06/07/2026
Ye jumla suntay hi bohat se sellers ghabra jatay hain.
"Bhai, doosri jagah yehi cheez sasti mil rahi hai."
Aur foran zehan mein khayal aata hai:
"Yaar, thora discount de deta hoon, warna ye chala jayega."
Lekin zara rukain…
Ye woh lamha hota hai jahan zyada tar sellers sab se bari ghalti kar baithtay hain.
Pehle ye samjhein ke jab koi aisa kehta hai to us ke peechay kai wajahain ho sakti hain.
Kabhi waqai usay kahin aur kam qeemat mili hoti hai, lekin aksar auqat woh sirf ye dekh raha hota hai ke aap apni qeemat par kitne mazboot hain.
Agar aap foran discount de dein, to us ke zehan mein yehi baat baith jati hai:
"Asal qeemat to is se bhi kam hai, bas pehle zyada bata raha tha."
Phir agli baar woh mazeed kam qeemat mange ga.
To aise moqay par kya karna chahiye?
Ghabranay ke bajaye, pur-sukoon lehjay aur aitmaad ke sath kahain:
"Ji bilkul, market mein har qeemat ki cheez mil jati hai. Lekin hum apni quality, apni service aur apne customers ke aitmaad par kabhi samjhauta nahi kartay. Alhamdulillah hum ne hamesha behtareen tajurba dene ki koshish ki hai. Faisla aap ka hai."
Aur phir khamosh ho jayein.
Ye khamoshi bohat taqatwar hoti hai.
Is aik jawab mein aap ne na behas ki, na apni qeemat kam ki, aur na hi safaiyan dein.
Aap ne sirf apni qadr batayi aur faisla samnay walay par chhor diya.
Agar samnay wala samajhdar customer hoga, to woh soche ga:
"Ye banda apni cheez par pur-aitmaad hai, yaqeenan is ke paas koi khaas baat hogi."
Aur agar kisi ko sirf sasti cheez chahiye aur quality se koi gharz nahi, to woh waise bhi aap ka mustaqil customer nahi ban sakta.
Yaad rakhein…
Jo log sirf qeemat dekhte hain, woh hamesha sasti jagah ki talash mein rehte hain.
Aaj aap se lain ge, kal kisi aur se.
Lekin jo log aap ke kaam, quality aur service ki qadr kartay hain, woh baar baar wapas aatay hain, doosron ko bhi aap ke paas bhejtay hain, aur waqt ke sath aap ke karobar ka sab se qeemti sarmaya ban jatay hain.
Apni qeemat par qaim rahain, kyun ke mazboot aitmaad hi kamyab karobar ki asal pehchan hai.
