اللهّ يهدي بنات المسلمين و يحبّب الحجاب لقلوبهنّ و يثبّتهنّ عليه 🥹❤️
18/02/2026
البادرة التي كنّا نحدّثكنّ عنها هي 🙈:
بما إنّه رمضان شَهر تُعتَقُ فيه الرّقابُ من النَّار، قرّرنا أن نضع أيدينا فوق أيديكنّ و نتوكّل على الله في طلب الخير: سيكون على كل قطعة تُشتَرى في رمضَان من عندنَا 1د للصدقة (و لا تحتقرنَها فلا ندري من مِن بيننا سيُرزَقُ الجنّة بدينار 🥺). ومَن تُريدُ أن تزيد على ذلك فلتتواصل معنا و صدقتها و الله في يد أمينة (يعني مثلا لو هي شرات روبة ب 50د و تحب تتصدّق ب 10د غير ال 1د الي متفقين فيه تبعثلنا 60د).
في آخر الشّهر بإذن الله تقرّرون معنا (عن طريق الستوري) من هو أولى بهذه الصدقة و في ما سنصرفها.
و اللّه رقيب علينا و عليكنّ، و هو وليّ التوفيق.
رمضان مبارك عليكنّ و على أهاليكنّ و أصحابكنّ و أولياء نعمتكنّ و كلّ من له فضل عليكنّ ❤️🫂🌜
17/02/2026
حضّروا معانا طلبيّة 🥰
16/02/2026
الرّوبة هاذي مش مخدومة بكل حب بركة، مخدومة بالدّموع زادا 😅
من عامين لتالي مشينا للدِبُّو الي متعودين نشريوا منه القماش قلنالهم نحبوا على قماش Jean بعثنا لفرع تابعه. فتعرضت لموقف فيه تعدّي على حدودي و ما كنتش متأكدة هل الي عمله يعتبر تحر* فبعد ما احتجيت على الوضع و السيد زاد على قدام ولات عركة بالمعنى الحرفي. سبحان الله في اللحظة هاكي و كأني ندافع على حقي كراجل و لكن في اللحظة الي طلعت في الكرهبة و هو ماعاش يرى في بكيت و كأني مش نفس الشخص الي كان يعارك.
بعد ما هديت مشيت شكيت بيه للشركة الأم و قلتلهم الي هو عرضني و أنا خارجة من عندهم و قلي حرفيا "كان جيت أختي راني ذ*ب*حتك" و طبعا ما صار حتى حاجة إلا ما حطيتلهم Avis عالPage الي عندهم متحرش و تقلبت الدنيا و أعلى هرم في الشركة يكلم في و وقتها وليت نتسمع و نتشاف أما كي تحب تاخذ حقك من غير ما "تفضح" ما تنجمش.
و في هذا الكل أنا مخي فيه حاجتين برك، نبكي خاطر مريم كانت حابة نعملوا حاجة jean و أنا حرمتها من الفرصة بإني تصرفت هكاكا، و الثانية انه هل أنا تصرفت بالصحيح أصلا ؟ بالك الراجل ما يقصد شي. قلت نسأل خويا أكيد راجل و يفهم الرجال، حكيتله الموقف كاملا و وضحلي إنه مانيش غالطة و قالي : "تحب نقص Billet و نروحلك؟" و صدقوني هاكي كانت أحلى و أعز كلمة سمعتها في حياتي و لو ننسى إسمي ما ننساهاش 🥺🥺 و قالي ما عادش تمشي غادي جملة، قتله حتى للشركة الأم ؟؟ قالي الشركة بكلها بكلالها ماعادش تدخللها. و هنا اندثر حلم الjean نهائيا و الليلة مرت في البكاء من ناحية غايضتني روحي و من ناحية غايضني القماش 😂.
طبعا بعدها طفيت الضو خاطر بمجرد ما جبرت بخاطرهم و فسخت الAvis ماعاد سمعت منهم شي و لكن كمية "حسبي الله و نعم الوكيل" قلتها في كل صلاة لا تعد و لا تحصى. (أبشركم إنه الشركة فلست و تواجه مصاعب عويصة 😅).
إلى أن ربي كرمنا بعدها بعباد نتعاملوا معاهم أحسن بمراحل سبحان الله و تطورنا معاهم و علاقتنا بيهم أكبر حتى من مجرد بيعة و شرية. عباد سهلت و يسرت علينا و التعامل معاها مريييح ... منهم الي نحكيو معاه قداش و ما يخزرلناش أصلا ديما عينيه لوطة. فسبحان الذي وضعنا في مثل ذلك الموقف ليختار لنا ما هو خير. و سبحان الله حتى أسوامهم خير (لو تلاحظوا في الفترة الأخيرة نفس المودال نبيعوه بسوم أقل من قبل ... التكلفة قلت فالثمن رخصناه Automatiquement)
علاش اخترت نحكيلكم القصة هاذي الكل:
1- خاطره مخدوم بدم القلب مش مجرد قماش متوفر في كل بلاصة و مودال تخدم بالساهل.
2- إذا حسيت الي فما حاجة غالطة راهو بالحق فما حاجة غالطة ما تقعدش تخمم و تشكك في إحساسك.
3- مهما حسينا رواحنا قويين و نجموا ناخذوا موقف وحدنا رانا بالحق just girls و احتياجنا للإحساس بالأمان حقيقي و ضعفنا حقيقي، فبالنسبة للبنات تقبلوا هذا الجزء من أنوثتكم، و بالنسبة للرجال راهو كلمة تحسس أمك ولا أختك ولا بنتك بالأمان ما تبخلش بيها خاطر هو "احتياج" بالنسبة لينا مش رفاهية.
4- البلاصة الي ما تلقاش فيها حقك ما تقعدش فيها أبدا و تو ربي يعوضك
5- رد بالك يمشي فيبالك الي حقك ممكن يضيع، راو ربي شاهد على كل شي و "حسبي الله و نعم الوكيل" تاخذلك حقك وين ما كان.
6- الي ربي كي فرض علينا الحجاب و السنة حطتلنا مقاييس للبس المرأة في الشرع راهو ماهياش عبثية ولا لمجرد إنه ربي يحرمك من حريتك -و العياذ بالله-. راني في الوقت هاكا لابسة جلباب فضفاااض و خمار طويل. و لكنّ الله أعلم بما في نفوس خلقه، هو أعلم بالرجال فشدد عليهم في موضوع غضّ البصر و عدم لمس غير المحارم، و هو أعلم بالنساء فشدد عليهنّ في عدم الخضوع بالقول و ترقيق الصوت و إبداء الزينة و فرض عليهنّ الحجاب. فهل ناقفوا أحنا بجهلنا و قلتنا أمام علمه الواسع و حكمته البالغا و نقولوا "لا أنا نعمل آش نحب و نلبس آش نحب و نعيش كيما نحب"
Be the first to know and let us send you an email when سَتر-Satr posts news and promotions. Your email address will not be used for any other purpose, and you can unsubscribe at any time.
