29/01/2018
Ոչ թե պարկինսոնիզմ, այլ երկաթի ավելցուկ գլխուղեղում. Իսպանիայում սխալ բուժում ստացած հիվանդը Աստղիկ բկ-ից հեռացավ առողջ
Իսպանիայում գլխուղեղում կուտակվող երկաթի ավելցուկով հիվանդին երկար ժամանակ բուժել են Պարկինսոնի հիվանդության դեմ: Երկաթի փոխանակության հիվանդությունները բավականին հազվադեպ են պատահում, ու այդ պատճառով հաճախ սխալ են ախտորոշվում:
Հենց այսպիսի դեպքի բախվեց «Աստղիկ» բժշկական կենտրոնի ընդհանուր եւ անոթային նյարդաբանության բաժանմունքի ղեկավար, ԵՊԲՀ-ի նյարդաբանության ամբիոնի վարիչ` պրոֆեսոր Հովհաննես Մ. Մանվելյանը:
Ինչպես պատմում է պրոֆեսորը՝ կլինիկա է դիմել 60 տարեկան տղամարդ, ով մինչ այդ երկար ժամանակ բնակվել է Իսպանիայում: Հիվանդը չէր կարողանում ինքնուրույն քայլել, բանավոր խոսքն անչափ աղքատիկ էր, սուղ, միմիկան՝ անտարբեր: Պարզվեց, որ նրան Պարկինսոնի հիվանդություն էին ախտորոշել եւ բուժում էին լեւոդոպա դեղամիջոցով, հետզհետե ավելացնելով դեղաչափերը, սակայն բուժումը ոչ մի արդյունք չէր տվել:
«Հիվանդի մոտ Պարկինսոնի հիվանդության այլ բնութագրական ախտանիշներ չկային, այսինքն՝ նրա մոտ առկա էր պարկինսոնիզմի համախտանիշ, բայց ոչ հիվանդությունը: Իսկ լեւոդոպան, ինչպես հայտնի է, համախտանիշի բուժման համար չափազանց անարդյունավետ է»,- նշում է բժիշկը:
Հիվանդը ենթարկվեց ՄՌՏ հետազոտության, եւ «Աստղիկ» ԲԿ-ում տեղադրված 3 տեսլա հզորությամբ սարքն օգնեց հայտնաբերել գլխուղեղի բազալ կորիզներում երկաթի կուտակման փաստը: Այսինքն՝ նրա համախտանիշը պայմանավորված էր գլխուղեղում երկաթի մեծ պարունակությամբ, որն առաջացել էր չափազանց հազվագյուտ ժառանգական հիվանդության հետեւանքով՝ կապված երկաթի փոխանակության խանգարման հետ, Neurodegeneration with brain iron accumulation (NBIA):
«Գլխուղեղից երկաթի ավելցուկը հեռացնելու համար կիրառվում է դեֆերոքսամին դեղամիջոցը, բայց Հայաստանում այն չկա: Մենք բուժումը սկսեցինք այլ խելատորներով, որոնք երկաթի ուղակի կլանիչ չեն, սակայն բարելավում են ուղեղային մետաբոլիզմը, նպաստում են հյուսվածքից նյութերի արտազատմանը, եւ զուգահեռ սկսեցինք դետոքսիկացիա կատարել ու պակասացնել Լ-դոպան: Արդյունքում՝ 5-րդ օրը հիվանդը ոտքի կանգնեց, իսկ 10-րդ օրը՝ վազեց»,- ամփոփեց Հովհաննես Մանվելյանը:
