21/09/2026
أول مرة نكتبوا منشور ولا نخرجوا على إطار عمل الصفحة بصح والله العظيم مالڨيتش كيفاه...أقرا المنشور ضرك تفهم 👇👇
اللي يشري لمرتو وولادو ما راهوش يدير فيهم مزية… هذي مسؤوليتو
اليوم في المحل جوايه 12:30 شفنا موقف بصراحة خلانا نتأسفوا بزاف
راجل جا مع مرتو وبنتو الصغيرة طفلة مازالت في عمر التحضيري ولا السنة الأولى ابتدائي. كانت تتفرج في الحوايج وهزت حذاء باش تشوفوا في لحظة ضربها بكف لدرجة المسكينة عيات تبكي وحكمتها الشهقة ...خرج من المحل في عوض ما يهدي بنتو ولا يحتويها بدا يعيط على مرتو ويهدر معاها بطريقة فيها إهانة وتحڨير شغل ماشي زوجتو وشريكة حياتو تڨول جارية عندو
وهنا السؤال: علاش؟
علاش كي تكون قادر تشريلهم تحسب روحك وليت تملكهم؟
إذا شهريتك زوج ملاين عيش معيشة تاع زوج ملاين
وإذا شهريتك مليار ونص عيش معيشة تاع مليار ونص
ماشي لازم تشري لمرتك أغلى ماركة وماشي لازم ولادك يلبسو أغلى حاجة وماشي لازم كل مرة تدخل لأي محل تخرج بأغلى سلعة لالا ماهيش هكا خلاص
بصح كاين حاجة وحدة راهي فرض عليك هي الاحترام
يا خويا مرتك ماشي خدامة عندك ماهيش جارية وولادك ماشي ملكية تاعك
والصوارد اللي تصرفهم عليهم ما يعطوكش الحق تذلهم ولا تهينهم
وما تقولش:
أنا اللي نصرف أنا اللي نشري أنا اللي نجيب
لالا خويا هذي مسؤوليتك ماشي مزية
والله العظيم كثرت بزاف هاذ التصرفات وخاصة عندنا في المحل
قسمًا برب العزة والإكرام كاين اللي يسب مرتو ويهينها ويحرجها قدام الناس شغل نورمال هكا عادي هذا كل كي ڨاتلو هيا نخرجوا نشرو قش للأولاد سوا للعيد ولا الدخول المدرسي
المرأة اللي جاية معاك لأي محل ما تحتاجش غير حذاء ولا لباس
راهي تحتاج تحس بالاحترام والأمان
والطفل اللي داخل معاك ما يحتاجش غير لعبة ولا لباس جديد
راهو يحتاج أب يحسسو بلي هو في أمان معاه
خاطر الحاجة اللي تشريها اليوم قادر تتقطع وتتبدل مادريناش
بصح الكلمة الجارحة والضربة والإهانة يقدرو يبقاو في قلب الطفل وفي قلب زوجتك سنيييين
كون راجل لزوجتك وأولادك ماشي سيد عليهم
الرجولة ماشي في شحال تخلص ولا شحال تصرف
الرجولة تبان في كيفاش تعامل أضعف واحد في عايلتك سوا زوجتك ولا أولادك......ربي يهدي النفوس والله العظيم 🤲
