20/01/2026
ارمي روحك وسط بيئة ناجحة وطموحة ✨
قربي من ناس تحب تتعلّم،
وناس مازالت تتعلّم،
وناس راهي فعلاً تخدم على روحها وتبني مستقبلها.
الناس هاذو يخرجوك من منطقة الراحة،
ويخلوك تشوفي قدرات في روحك ما كنتيش حاسة بيها من قبل.
كي تصاحبي الشاطرة… تتأثري بيها وتولّي شاطرة كيفها.
البيئة لي نعيشو فيها تأثر علينا بزاف،
تقريبًا أغلب تفكيرنا وسلوكنا يجي منها.
لهذا اختاري تكوني وسط ناس ناجحين،
ناس يضيفولك وتضيفيلهم،
ناس يشدّو بيدك وتشدّي بيدهم.
الناس لي دايرين بيك يأثرو عليك أكثر مما تتصوري.
كي تكوني ديما مع ناس يحبطوك،
يقللو من وش ديري،
ولا حتى قبل ما تبداي يقولولك:
«الدنيا صعيبة»
«وانتي واش راكي حابة توصلي؟»
غصب عنك راح تتأثري،
وتولي نظرتك لروحك وللحياة سلبية.
أما كي تحطي روحك وسط ناس مجتهدين،
يحاولو، يغلطو، ويعاودو يوقفو،
يشجعوك حتى بكلمة،
وتشوفي نجاحهم بعينيك…
هذا وحده يخليك تقولي:
علاه لا أنا زادة؟
صاحبي الشاطرة،
واختاري بيئتك بعناية،
خاطرها تأثر عليك،
على تفكيرك،
وعلى قدراتك أكثر ما تتخيلي ❤️
الصورة من الارشيف
