09/10/2022
حبيبتى...طبيعى جدا تفتكرى نفسك قبل الخلفه و توحشك....و ساعات بتحسى انك مخنوقه...انا فاهمه يا حبيبتى
مخنوقه من المسئوليات....نفسك تخرجى براحتك و ماحدش يبوظلك الخروجه...
عاوزه جسمك بتاع زمان....بتبصى لهدومك فى الدولاب و نفسك ترجعى تبقى دى...مش عارفه تقنعى نفسك بالتباديل و التوافيق اللى عماله تعمليها علشان الحته دى تخنت.. و الحته دى نخبيها...و البلوزه دى تنفع مع الرضاعه....و الكعب ده هيقطم ضهرى....
نفسك تستحمى بجد😅 تسيبى حمام الكريم فى شعرك ربع ساعه...ع الاقل يعمل بفلوسه....تحسى بروقان و عزله تخليكى طالعه منتعشه و مزاجك رايق و مستعده تتقبلى العالم الخارجى...
واحشك القعده مع نفسك فى مكان غير الحمام اللى بتستخبى فيه علشان خلايا مخك تتنفس....
نفسك ترجعى كيوت مش عصبيه...🙈😅
رومانسيه و حالمه...مش عمليه و ردودك مُقفله!
بتخافى تقولى ده بصوت عالى...و ساعات حتى بتحسى بالذنب لمجرد الفكره....
بتخافى تكونى بتتبترى....بتخافى يكون قصدك انك مش عاوزه البيبى...و انتى اصلا بتموتى فيه و ماتقدريش تعيشى يوم بعيده عنه❤️
انا بس عايزه اقول لك....انتى مش وحشه انك بتفكرى فى كده...انتى مش بتكرهى ولادك....انتى مش ناكره النعمه...انتى مش رافضه العيله...
انتى لو اتعرض عليكى تبقى البنت القديمه و ماتشوفيش العيال دى تانى...عمرك ما هتوافقى....
انتى مش زى ما اصحابك اللى مش متجوزين فاكرين...انتى مش حسداهم...انتى ماتبهدلتيش....انتى بتحبى الولاد جدا...دوقتى طعم وجودهم و ضحكهم...
و تمسكهم بيكى اداكى معنى جديد و سبب علشان تقفى على رجلك كل يوم....
انتى مش وحشه....انتى طبيعيه....ده طبيعى
طبيعى توحشنا لحظة الهدوء....
طبيعى نفتكرها و نبتسم....
طبيعى تشوفى صورك و تحسى ان دى ال outfit اللى عاوزه تفضلى لابساها
حبيبتى....فترة البيبى مش دايمه....احنا تعباااانين اوى علشان فاكرين اننا هنفضل كده طول الوقت...
لا يا حبيبتى ....بيناموا مع الوقت...و بيعتمدوا على نفسهم فى حاجات كتير....و بتخسى بسرعه بعدها لما تقررى....
و اكيد انتى شايفه ان فيه امهات كتير خست و لبست الحاجات الحلوه اللى نفسك تلبسيها...
الولاد بتنزل المدرسه...و بتشربى الشاى...و تستحمى 😅 و تصلى ركعتين الصبح بما يرضى الله 😄
عارفه ليه البيبى التانى بيبقى اسهل من الاولانى؟ مش علشان المجهود اقل و الخبره اكتر.....علشان بتبقى عارفه ان كل فترة صعبه ليها اخر....بتبقى شوفتى فى الاولانى ان كل صعب له اخر....فبتتقبلى المرحله و انتى فاهمه انها مؤقته و بتعدى....كله بيعدى....
انتوا بتحبوا ولادكوا....مهما جت فى مخك افكار...و مهما مرت اوقات خنقة....
هتعدى يا حبيبتى.....فصول السنه اربعه مش واحد...
و انتى ام جميله 😘
