16/05/2026
دهان أُستر ولا لاكيه؟ 🤔
يمكن سمعت قبل كدا المصطلحات دي بس مش عارف الفرق بينهم أو بتتلخبط فيهم، عشان كدا في البوست دا هقولك سريعاً كدا ايه الفرق بينهم.
✅ دهان الأستر:
في قاعدة جميلة في الديكور بتقول كل ما هو طبيعي جميل ومريح نفسياً، عشان كدا لما بنحتاج نظهر جمال ثمرة الخشب في الأبواب بنستخدم دهان الاستر، لأن من أهم مميزاته إنه دهان شفاف.
طبعا قيمة وسعر الخشب المستخدم في الحالة دي بيكون عالي زي (الأرو - الزان - الماهوجني .. الخ)، كل الأنواع دي الثمرة بتاعتها شكلها حلو جدا عشان كدا مش من المنطقي إننا نغطيها بدهان لاكيه.
من عيوب دهانات الاستر إن درجات ألوانها محدودة هتلاقي منها (البني - الاسود - البيج)، وكمان قوة تحملها للعوامل الجوية بتكون أضعف شوية عشان كدا بتستخدم أكتر في الأبواب الداخلية.
نقدر نعمل دهانات الاستر في أي ستايل سواء مودرن أو كلاسيك، لأن مفيش حاجة من الطبيعة موضتها بتقدم، وبيدهنه الاستورجي.
✅ دهان اللاكيه:
اللاكيه عكس الاستر بنستخدمه لو عايزين نداري ثمرة الخشب، وفي منه ألوان كتير جدا، بس أشهر لون هو الأبيض، وممكن نعمله لامع أو نص لامع أو ربع لامع.
قيمة وسعر الخشب المستخدم في الحالة دي بيكون أقل لانه كدا كدا هيتدارى، زي الخشب الموسكي لأن مش منطقي زي ما اتفقنا استخدم أخشاب غالية ومظهرش جمالها.
قوة تحمل دهانات اللاكيه للعوامل الجوية أقوى نسبياً من دهانات الاستر، وفي منها العادي والمغسول.
اللاكيه لو هتعمله هيليق أكتر مع الاستايل المودرن، بلاش تعمله في الكلاسيك، وممكن يدهنه النقاش.
✅ ❤️
