25/11/2018
الكتمان حدووودتة كبيرة جوه كل حد فينا ، اسرار وحكااااايات مستخبية جوانا
وكل حكاية ليها تفاصيلها اللى وجعانا ومأثرة فينا ، بس للأسف .. مبنقدرش نبوح بيها لحد .. ليه مبنقدرش ؟؟ لانه مينفعش ؟؟ وليه مينفعش ؟؟
لأن صعب حد يفهمها غيرنا ، صعب يحسوا بالوجع اللى احنا مش قادرين حتى نوصفه ، كل شخص بيقيس الموضوع على نفسه وبيحكم عليك باللى هو شافه مش باللي انت حسيته
ساعات كتير ناخد قرار اننا نحكى عشان نرتاح بس ف النهاية مبنقدرش ننفذه ليه ؟؟ لاسباب كتير
ياما بنكون اتعودنا ع الكتمان ف مبيقناش اصلا عارفين نخرج اللى جوانا
وساعات بنخاف نطلّعه ، ف نظرة اللى قدامنا تتغير تجاهنا
وساعات بنطلّعه ومنلحقش نفرح باننا خرجنا اللى جوانا .. ونلاقي الشخص ده طعنا بيه من ضهرنا
وساعاااات مبيكونش فيه حد اصلا قريب مننا عشان يسمعنا ويفهمنا
وساعات اللى قدامنا بيستهتر بوجعنا من غير حتى ما نتكلم
وساعاات بنخبيه بالضحكة عشان محدش يلمحه جوه عيونا
وساعات عيونا بتفضحنا فبنداريها بأى كدبة تيجي على بالنا
وساعاات نظرات غيرنا بتدبحنا لمجرد اننا حصل معانا ظروف معينة غيرت من ألقابنا صحيح احنا ملناش أي ذنب فيها .. بس المجتمع حكم بكده
وساعاات .. وساعاات .. وساعاااات .. تتعدت الأسباب والنتيجة واحدة
النتيجة👇👇
ان بنلاقي اكتر صاحب لينا .. هي دموعنا
اكتر حاجة بتفرج عننا ، بتغرقنا اه .. لكن ع الاقل بتدينا المساحة اننا نطلع اللى جوانا .. بتدينا المساحة اللى أقرب الناس لينا مقدروش يحققوهالنا
ياما كتمنا اصواتها عشان محدش يسمعنا ،وياما هربنا فيها من نفسنا ، وياما مسحناها بايدينا ف اكتر وقت كنا محتاجين فيه لحد يمسحها عننا
بس هربنا ..هربنا وتوهنا مننا .. واتخبطّنا كتير .. جينا علينا واخترنا نوجعنا أرحم من ان حد تاني يدوس علينا
بطلنا نحكي لحد ما اتعودنا وغيرنا اتعود اننا بنضحك .. بنضحك وبسسس
لان باختصار .. لما يتعودوا على ضحكنا اهون بكتييييير ما يتعودوا على دمعنا
