19/07/2026
لو إنت من الرجالة اللي معتمدة على نفسها في أمور حياتها، وبتدبر شؤونها بنفسها بعد كرم وفضل ربنا، فأكبر غلطة ممكن تعملها في حق نفسك إنك تضغطها بالمقارنات، وتدخل سباق أصلًا مش عادل.
إنت ليك حياتك، وليك ظروفك، وليك طريق ربنا كتبهولك، وماشي فيه بمجهودك وتعبك. فبلاش تبص لغيرك. اللي اشترى يشتري، واللي سافر يسافر، واللي نجح ينجح… رزق كل واحد له معاد وطريق مختلف.
ماتصعبهاش على نفسك. فيه ناس أهلها بيصرفوا عليها، وناس أهلها بيجهزولها كل حاجة، وناس حواليها اللي يسندها ويشيل عنها. وإنت يمكن ربنا كتبلك تعتمد على نفسك من أول الطريق لآخره، ودي مش قلة حظ، دي مدرسة بتخرج رجالة تعرف قيمة كل جنيه وكل خطوة.
المطلوب منك الرضا، والاجتهاد، والسعي، وبس. أما الرزق والنتيجة فبيد ربنا.
وصدقني… مفيش متعة تساوي إنك تبص لحاجة وتقول: “دي من تعبي”. مفيش إحساس يساوي إن فلوسك من شغلك، وموبايلك من كدك، وعربيتك من مجهودك، ومشروعك من سهر الليالي.
ويمكن غيرك وصل أسرع، لكن اللي وصل بتعبه بيفضل فاكر قيمة كل خطوة، وبيحافظ على كل نعمة لأنه عارف هي كلفته قد إيه. ودي لذة عمرها ما يحس بيها غير اللي بنى نفسه بنفسه❤️
