01/05/2021
وإحنا صغيرين، كنت دايمًا تلاقي في كل مكان، الشخص اللي بيلمع الاحذية..
الصندوق بتاعه المميز والفرش وتلميعته الجميلة قبل ماينتشر الكوتشي والجذم القماش وغيره وتصبح مهنة شبه منقرضة.. المهم انت يتهيألك إنه اللي الراجل بيعملهولك دا مجرد كماليات وانك ممكن تمسح الجذمة الجلد بتاعك بأي منديل وهيوفي الغرض.
في الحقيقة خلينا نتكلم من الجانب العلمي وأقولك إنه زمان لولا التلميعة إللي بتعملها دي وانت ماشي في الشارع، فالجذمة هتبوظ منك وهتلاقيها اتهرت لوحدها ودابت على رجلك.
في حين إنه كترة لبس الكوتشي بتبوظه وتهلكه، فالعكس في الجلد، كل ماتلبسها، تحافظ عليها أكتر وتطول في عمرها وتعيش أكتر.. الجلد خامة طبيعية غير مصنعة، بتنشف بسهولة جدًا في ظروف الجو العادية ويبدأ الجلد يهترأ ويتحلل منك، فلما بتلبسها، العرق اللي بيطلع من رجلك فيه دهون وأملاح بيمتصها جلد الجذمة ويرطب بيها نفسه وكأنه بيعالج نفسه بنفسه كده فعمره يطول أكتر.
طب لو انت مابتلبسهاش غير في المناسبات والانترفيو والخروجات المهمة! هتنشف وتطلعها تلاقي الجلد مشقق، وهنا كان بيجي ساعتها دور الراجل دا زمان.. الورنيش إللي بيستخدمه، بيكون فيه دهون أو شمع طبيعي بيحافظلك على الجلد وبيمده بإللي هو محتاجه بدل مانت تقعد تورنش جذمك الجلد في البيت كله شوية..
لو انت عندك انت او هي واحدة جلد طبيعي (أصلي مش مصنع أو تقليد) في البيت وسبتها فترة كبيرة مالبستهاش، هتلاقيها مشققة والجلد باظ، ولو ملقتهاش كده، ففي الغالب مهواش جلد نضيف لإنه دي طبيعة الجلد الطبيعي.
فممكن تريح نفسك وتوفر مجهود وفلوس وانت في طريقك، وتخليه يلمعهالك في دقيقتين كده ب5 جنيه ولا حاجة، وأهو خدت ثواب بالمرة وساعدت في الحفاظ عالمهنة من الانقراض وتذكر إنه دا مايقلش منه، بالعكس في بعض الدول الأوروبية بيكسبوا دهب.
