شبكة المحاسبين العرب

21/05/2026

إزاي تصمم نموذج أعمار ديون ذكي يلم فلوس شركتك من العملاء؟ 💸 السيطرة على السيولة! 📈

​السيولة هي شريان الحياة لأي منشأة، وأكبر مشكلة بتواجه المحاسب هي تداخل فواتير العملاء وتواريخ استحقاقها. لو استنيت لما العميل يتأخر عشان تفتكره، هتلاقي الديون تراكمت وممكن تتحول لديون معدومة! 🤦‍♂️ الحل هو سيستم رقابي يوريك الفلوس اللي برة مكانها فين بالظبط. 🗂️
​عشان تبني نموذج أعمار ديون (Aging Report) تلقائي ومحكم على الإكسيل، اتبع الـ 3 خطوات العملية دول: 👇
​1️⃣ الخطوة الأولى: هيكلة قاعدة بيانات الفواتير 📊
​جهز جدول حركات المبيعات الآجلة الأساسي، ولازم يحتوي على الأعمدة دي بالترتيب: (اسم العميل 👥 - رقم الفاتورة 📄 - تاريخ الفاتورة 📅 - قيمة الفاتورة 💰 - فترة الائتمان بالأيام ⏱️).
​ضيف عمود بمعادلة يحسب "تاريخ الاستحقاق الفعلي" وهو عبارة عن: تاريخ الفاتورة + فترة الائتمان. 🔍

​2️⃣ الخطوة الثانية: تقسيم فترات التأخير تلقائياً (الشرائح الزمنية) ⏳
​جنب الجدول الرئيسي، صمم 4 أعمدة للمتابعة مقسمة كالتالي:
​(من 1 إلى 30 يوم) 🗓️
​(من 31 إلى 60 يوم) ⏳
​(من 61 إلى 90 يوم) ⚠️
​(أكثر من 90 يوم 🚨)
​استخدم معادلة IF مع دالة TODAY() عشان السيستم يطرح تاريخ الاستحقاق من تاريخ النهاردة تلقائي، ويوزع قيمة الفاتورة في العمود المناسب ليها بدون أي تدبير يدوي. ⚙️
​3️⃣ الخطوة الثالثة: التنبيه البصري للمتابعة والتحصيل 🎯
​حدد عمود الشرائح المتأخرة (خاصة الشريحة الأكبر من 60 و90 يوم)، وفَعّل خاصية Conditional Formatting. 💻
​اطلب من الإكسيل يلون المبالغ اللي بتدخل في شريحة الخطر باللون الأحمر الظاهر. 🔴
​الخطوة الاحترافية للأتمتة الكاملة 🚀: ربط النموذج بأداة الـ Power Query عشان يسحب الفواتير الجديدة أول بأول من سيستم المبيعات، ويعيد ترتيب أعمار الديون لحظياً بمجرد تحديث البيانات (Refresh)، من غير ما تعيد بناء المعادلات كل شهر.

19/05/2026

الدورة المحاسبية، كما لم تعرفها من قبل

أحمد شاب طموح، عاوز يبقى صاحب شركة لتجارة الإلكترونيات .. قرر يجهز المخزن ببضاعة جديدة استعداداً للموسم الجديد

راح اشترى بضاعة بـ 100 ألف جنيه كاش .. والبضاعة دخلت المخزن

راح قال للمحاسب عنده، الحمد لله الموضوع كان بسيط جداً .. دفعت فلوسي وخدت بضاعتي، والأمور ماشية حلاوة

لكن المحاسب عنده بصله وقاله : ده الموضوع لسه ما بدأش أصلاً

----------------------------

أحمد استغرب وقاله : يعني إيه ما بدأش؟ .. يا ابني ما دفعنا واستلمنا وخلاص

المحاسب قاله : مبدئياً أنت قلت دفعت فلوسي .. وهي مش فلوسك أصلاً، دي فلوس الشركة

أحمد ضحك وقاله : يا عم ما أنا والشركة واحد

المحاسب قاله : لا يا حبيبي .. الشركة لها شخصية مستقلة عنك تماماً .. فلوس الشركة حاجة، وفلوسك الشخصية حاجة تانية .. ودي أول قاعدة لازم تفهمها

أحمد قاله : طيب ماشي يا سيدي اعتبرني فهمت .. نرجع لموضوعنا بقى، إزاي يعني العملية لسه ما بدأتش؟

المحاسب رد وقاله : اللي حصل ده كله بالنسبة للمحاسبة كأنه لم يكن، لو لسه ما اتسجلش في الدفاتر .. وعشان يتسجل، لازم أول حاجة نفهم الحدث المالي اللي حصل، ونحلله، ونشوف مستنداته المؤيدة

يعني نراجع الفاتورة ونتأكد إن كل تفاصيل العملية سليمة

لأن المحاسبة مش شغل حكاوي، تيجي تقولي أنا قبضت وصرفت، وبعت واشتريت، فأصدقك كده وخلاص

المحاسبة مش بتعترف غير بالدليل .. ولو مفيش مستند، يبقى بالنسبة للمحاسبة العملية دي كأنها ما حصلتش أصلاً

----------------------------

أحمد قاله : ماشي يا فيلسوف، حلل وراجع وخلص اللي وراك بقى .. وخذ بالك كمان إننا بعنا جزء من البضاعة بـ 50 ألف جنيه، والحمد لله بدأنا نكسب

المحاسب ابتسم وقاله : اهدى على نفسك بس .. مش معنى إننا بعنا إننا خلاص كسبنا .. ماهو إحنا لسه ما حسبناش تكلفة البضاعة اللي اتباعت، ولسه ما حسبناش المصاريف، ولسه ما شفناش باقي الالتزامات

وممكن أصلاً الشركة تكون باعت كثير والكاش قليل لو كان البيع معظمه بالآجل

واحنا عندنا المحاسبة مش بتبص على الفلوس وهي داخلة وخارجة بس .. المحاسبة بتشوف الصورة كاملة

----------------------------

المهم، بعد ما المحاسب راجع كل المستندات والعمليات، وتأكد إن كل حاجة سليمة .. بدأ يسجل العمليات دي في دفتر اسمه (دفتر اليومية)

والدفتر ده سجل رسمي بيوثق كل اللي بيحصل داخل الشركة لحظة بلحظة

وكان بيسجل فيه بنظام (القيد المزدوج)، يعني كل عملية لها طرف مدين وطرف دائن لازم يتساووا

وطبعاً كان بيسجل كل عملية بتاريخها وترتيبها .. لأن أي شركة مهما كبرت، لو فقدت التسلسل الزمني للعمليات، هتتحول لفوضى

وفضل المحاسب يسجل كل حاجة توصله، لحد ما في نص الشهر

أحمد دخل عليه مستعجل وقاله : عايز أعرف الخزنة فيها كام دلوقتي، عشان هاخد قرار مترتب على رصيد الخزنة دلوقتي

----------------------------

المحاسب ما فتحش دفتر اليومية أصلاً .. لأنه ببساطة كان بيرحل كل القيود أول بأول لحاجة اسمها (دفتر الأستاذ)

يعني كل قيد بيتكتب في اليومية، كان بياخده ويرحله للحساب الخاص به في دفتر الأستاذ .. ماهو أصل كل حساب في الشركة له صفحة مستقلة به في دفتر الأستاذ ده

يعني في صفحة للخزنة، وصفحة للمبيعات، وصفحة للمشتريات، وصفحة للموردين، وصفحة للعملاء، وصفحة للمخزون .. الخ

وبالتالي بقى سهل جداً يعرف رصيد أي حساب فوراً، بدون ما يقعد يقلب وسط مئات القيود اللي موجودة في دفتر اليومية

وهنا أحمد بدأ يفهم لأول مرة إن المحاسبة مش مجرد تسجيل .. دي نظام كامل معمول عشان يديك المعلومة بسرعة وقت اتخاذ القرار

----------------------------

المهم، وصلنا آخر الشهر .. وأحمد دخل على المحاسب وهو مبتسم وقاله : ها يا عم المحاسب، قولي بقى كسبنا كام؟

المحاسب قاله : براحة بس، أنت ليه دايماً مستعجل .. إحنا أصلاً لسه ما وصلناش للنتيجة النهائية عشان أقولك كسبنا كام

أحمد استغرب وقاله : إيه تاني؟ .. ما أنت سجلت كل حاجة في اليومية، ورحلتها للأستاذ، والدنيا تمام

المحاسب قاله : بص يا أحمد، التسجيل لوحده مش كفاية .. إحنا لازم نتأكد إن كل اللي اتسجل واترحل سليم أصلاً، قبل ما نعمل قوائم مالية ونعتمد عليها في اتخاذ القرارات

----------------------------

فراح المحاسب جمع أرصدة كل الحسابات من دفتر الأستاذ .. زي رصيد الخزنة، ورصيد المبيعات، ورصيد المشتريات، ورصيد الموردين، ورصيد البنوك .. الخ

وحطهم كلهم في كشف واحد اسمه (ميزان المراجعة)

وأداه لأحمد وقاله : أهو الكشف ده يعتبر اختبار للنظام كله، عشان نشوف هل إجمالي المدين يساوي إجمالي الدائن ولا لأ

أحمد قاله : طب ولو ما تساووش؟

المحاسب رد بسرعة : يبقى فيه حاجة مش مظبوطة .. ممكن رقم اترحل غلط، أو قيد ناقص، أو حساب اتحط في غير مكانه ..الخ

أحمد قاله : طب الحمد لله أنا شايف الميزان متوازن، يبقى خلصنا

المحاسب بصله وقاله : هو أنت مستعجل تقفل الشركة ولا إيه؟

أحمد قاله : يعني فيه إيه تاني؟

----------------------------

المحاسب قاله : فيه حاجات حصلت فعلاً، لكن لسه ما اتسجلتش

أحمد اتلخبط وقاله : إزاي يعني حصلت وما اتسجلتش؟

المحاسب قاله : هو أنت مش عندك موظفين شغالين طول الشهر .. هتدفع رواتبهم أمتى ؟

أحمد قاله : ما أنت عارف .. يوم 5 الشهر الجاي

المحاسب قاله : طيب، مش الناس دي اشتغلت طول الشهر الحالي اللي احنا فيه، يبقى المصروف يخص أنهي شهر؟

أحمد سكت شوية وقاله : تقصد الشهر الحالي؟

المحاسب ابتسم وقاله : بالظبط كده أهو بدأت تفهم .. المحاسبة مش بتستنى الفلوس تخرج عشان تعترف بالمصروف .. طالما المنفعة حصلت، يبقى لازم نسجل الالتزام، ونعمل قيد تسوية ونسجل الرواتب المستحقة دي

أحمد بصله وقاله : بس إحنا لسه ما دفعناش عشان نسجلها

المحاسب رد وقاله : عشان كده اسمها مستحقة .. يعني الشركة عليها التزام لازم يظهر .. ولو ما سجلناش الرواتب، أرباح الشهر هتطلع أكبر من الحقيقة

وساعتها هتبقى أنت شايف إن الشركة كسبانة والدنيا ظابطة معاك، بينما الحقيقة غير كده

----------------------------

وبعدها المحاسب كمل شغله، وقال لأحمد : على فكرة، أنا عاوز أعمل جرد فعلي للمخزن عشان أطابقه برصيد المخزن اللي موجود عندي في الدفاتر

لأن أي فرق ممكن يبقى تلف، أو كسر، أو سرقة، أو خطأ تسجيل .. ولازم نسوي أي فروقات تظهر لنا

وبالمناسبة، التسويات الجردية مش هنعملها للمخزون بس

إحنا كمان هنراجع باقي التسويات الجردية زي المصروفات والإيرادات المستحقة والمقدمة، والإهلاكات، وكل البنود اللي لازم تتعدل قبل ما نطلع القوائم المالية النهائية

أحمد قاله : هو ليه كل التعديلات دي؟ ما الميزان كان متوازن وخلاص

المحاسب ابتسم وقاله : توازن الأرقام لوحده مش معناه إن الأرباح صحيحة

إحنا بنعمل التسويات دي عشان القوائم المالية تطلع معبرة عن الحقيقة الفعلية للشركة، وعشان كل فترة مالية تتحمل باللي يخصها فعلاً .. لأن أي تسوية ناقصة هنا ممكن تغير نتيجة الشركة كلها

----------------------------

وبعد ما المحاسب خلص كل التسويات، رجع عمل ميزان مراجعة تاني بعد التسويات الجردية دي

أحمد قاله : هو إحنا هنفضل نراجع ورا بعض كده كتير؟

المحاسب قاله : طبعاً .. لأن أي رقم هيطلع غلط هنا، هيبوظ القوائم المالية كلها .. والقوائم دي مش مجرد ورق بيتطبع .. دي أرقام هتبني عليها قرارات مصيرية تخص مستقبل الشركة كله

----------------------------

وبعدها أخيراً، المحاسب بدأ يطلع القوائم المالية .. وأول قائمة كانت قائمة الدخل

المحاسب قال لأحمد : بص دي القائمة اللي هتقولك بعت بكام .. واتكلفت كام .. وصافي الربح الحقيقي كام

أحمد بدأ يبص للأرقام بتركيز لأول مرة وقال بصوت هادي : طيب هل ممكن أبقى ببيع كثير، وفي الآخر أرباحي ضعيفة؟

المحاسب قاله : طبعاً .. عشان البيع لوحده مش نجاح .. المهم تبيع بهامش محترم، وتسيطر على مصاريفك، وتعرف فلوسك رايحة فين

وبعدها طلعله الميزانية العمومية وقال له : ودي بقى صورة الشركة نفسها اللي بتعرفك مركزك المالي .. يعني معاك أصول قد ايه .. وعليك التزامات قد إيه .. وحقوقك في الشركة وصلت لفين

أحمد فضل يبص للأرقام شوية وبعدين قال للمحاسب : أنا أول مرة أحس إني شايف الشركة فعلاً .. زمان كنت فاكر إن طالما فيه فلوس داخلة يبقى الدنيا تمام .. لكن واضح إن الموضوع أكبر من كده بكتير

المحاسب ابتسم وقاله : عشان كده المحاسبة لغة البيزنس .. لأنها بتحول كل اللي بيحصل في الشركة لأرقام تقدر تفهمها وتبني عليها قرار

وقاله : الدورة المحاسبية مش شوية دفاتر وخانات وحفظ قيود .. دي رحلة كاملة تبدأ من مستند صغير، وتنتهي بقوائم وتقارير ممكن يتبني عليها قرارات مصيرية داخل الشركة

وكل خطوة فيها معمول لها نظام عشان في النهاية صاحب البيزنس يبقى شايف الصورة الكاملة للبيزنس بتاعه

----------------------------

تابعني هتفهم 👇

16/05/2026