26/12/2025
مشكلة واقعية كارثية ، للأسف الموضوع يبدو إنه منتشر..
للأسف كنت أعرف إنه ظهر من سنين ارسال الصور العارية ، و ظننتها حالات فردية و مرت.
لكن قريبا أيضا صدمت في حالة مشابهه😢👇🏼
في استشارة هاتفية بنت بتسأل :
أنا بنت عندي ٢٣ سنة سنة في نهائي طب و الحمدلله إحنا بيت هادي مفيهوش أزمات.. بابا وماما شغالين لأن إحنا ٦ اخوات، ٣ اولاد و ٣ بنات أعمارنا من ٢٦ لـ اصغرنا بنت عمرها ١٤ سنة في اعدادي.. كلنا تعليم عالي ما بين صيدلي و مهندس وطبيب بشري و ثانوية و اعدادي والحمدلله كويسين كلنا كل واحد مسحول في دوره و الدنيا ماشية عادي جداً..
امبارح بليل كنت سهرانة بذاكر و خرجت أعمل حاجة اشربها تدفيني و تفوقني سمعت همس من غرفة اختي الصغيرة و ضحك بدلع اوڨر.. قربت أشوف إيه الحكاية فـ فتحت الغرفة لقيتها عار ية و ماسكة موبايلها بتتكلم فيديو كول..
أنا صعقت و جات لي هيستريا بكاء و مش فاهمة ولا مستوعبة فيه إيه.. ههي قامت بسرعة قفلت غرفتها و زقتني برا و لبست هدومها و فتحت الباب قالت لي متقوليش لحد بالله عليكي..
أنا مقدرتش أرد و كل اللي عليا عياط بس أنا حاسة بنار بتاكل دماغي و مش عارفة اصارح أهلي إزاي وهي من امبارح بتبكي و حاولت تنتحر و أخدت شريط برشام من دواء معين ولكن ربنا سترها و لحقناها وأهلي هيتجننوا ليه تحاول تنتحر وأنا مش قادرة اتكلم..
اعمل إيه يا أم أنس؟
طلبت منها اكلم اختها لو ينفع أو تكلمها هي قالت مش هقدر اناقشها ولا فاهمة اقول لها إيه ولا مستعدة أعرف تفاصيل اللي شوفته ..
و بعد يومين الأخت الصغيرة تواصلت معايا.. و اللي سمعته منها يشيب وعشان كده انا نزلت المنشور ده عشان الأمهات و الآباء تنتبه لكارثة محدش واعي لها..
البنت سألتني : اختي حكت لك إيه؟
قولت لها سيبك من اللي اختك قالته لي و احكي لي انتي.. أنا حابة أسمعك مش احكم عليكي.
بعد ما طمنتها و حاولت افهمها إني عاوزة بس افهم عشان اعرف اساعدها و نحتوي الأزمة قبل ما تكبر..
قالتلي هتكبر اكتر من كده؟
وبعدين بدأت تسترسل و تحكي كوارث .. طيب البداية كانت منين؟
قالت من سنة و ٣ شهور كنت باخد كورس انجليزي في المكان كذا و اتعرفت على بنات من هناك منهم هدير
(وده اسم مستعار بالمناسبة.)
و هي كانت حِركة و بتتكلم و دلوعة و كل الأولاد كانوا معجبين بيها جداً.. بتعرف تلبس و تعمل ميك اب حلو و بسيط و عارفة تكون حلوة..
أنا طول عمري في حالي أوي ودايما ماما و بابا يقولوا مينفعش و حرام على كل حاجة رغم ان صحابي عادي بيعملوا كدا!
حتى لبسي و الميك اب و حجابي مش عارفة اكون شبههم..
قربنا من بعض و بقينا best friend انا وهدير و لقيتها في مرة بتقولى أنتي عارفة يعني إيه جواز وكده؟
قولت لها إزاي مش فاهمة.. لقيتها بتفرجني على فيديو إباحي و قالت لي يعني ده..
اتخضيت أوي و كنت هرجع و لكنها ضحكت و قالت لي دي ثقافة جنـ ـسية ولازم ابقى فاهمة انتي مش لسه في kg!
و من هنا جالي فضول أفهم أكتر فـ بقيت اتفرج على ابا حيات.. بعدين بقيت تحكي لي عن حبيبها وانهم مرتبطين وقد إيه مبسوطة بوجوده و سألتني ليه ملكيش boy friend فـ حبيت أجرب أنا كمان ليه لأ؟!
فـ قالتلي ان صاحب حبيبها كان شافني كام مرة و أعجب بيا و نفسه نتكلم فـ حصل و ارتبطنا وكنت طايرة من الفرحة لما حسيت إني في حياتي شاب وكده وهو كان مهتم خالص و هدايا بقا وكده..
كان الأول كلامنا حب عادي وبعدين لما اتعلقت بقا يخاصمني و يمنع التواصل بينا الا لو اتكلمنا في كلام خارج بحجة إنه بيحبني و أنا لو بحبه هـ أسعده .. وبقي يحصل بينا كل حاجة في التليفون زي المتزوجين..
سألتها مكالمات صوت بس؟
سكتت شوية وقالت فيديو و صور و شات و فويس وكله..
المهم إنه بعد فترة لما جمع داتا محترمة بدأ يهددها بالحاجات دي إنه هيبعت لأهلها وهي خافت لان عدد الصور و الفيديوهات كتير جداً وقالت بابا و ماما هيموتوا فيها و هكون عار على اخواتي..
راحت تستشير صاحبتها هدير لأنه من طرفها قالت لها راضيه و خليه يهدي من ناحيتك و شوفي عاوز إيه و اعمليه أنا و س بنعمل كده برضوا ما هو يا بنتي هيكون جوزي عادي بلاش تشوشري على نفسك وبطلي فلح انتي عارفة انه بيحبك!!
(لما سمعت الكلام ده حسيت إني جوايا مشاعر كتير متضاربة تجاه البنت و أهلها و حقيقي دي من اتعس الحاجات اللي ممكن اخرج بيها من سيشن لأنها بتأثر على الأفكار و السلوكيات و بتزود مخاوفنا بدون وعي ..)
بعد فترة من التواصل الحميمي بينهم تتفاجأ أن الولد بيطلب منها تعمل علاقة جنـ ـسية مع شباب فيديو كول مقابل مال هو هياخده يا هيبعت صورها في كل مكان.. و تاني يوم لقيت صاحبتها بتقولها لقيت الصور دي ليكي مبعوتة ليا انتي عملتي ايه و نصحتها تطاوعه وانها بكده هتساعده ماديا عشان يجمع مال اسرع و يتقدم لها حتى على الأقل تتقي شره لأن أهلها ممكن يقتلوها..
و بقيت تكلم شباب يوميا تقريبا بعد ما أهلها يناموا فيديو كول و دخلت عالم قذر و مستنقع من القرف مش عارفة و لا بقيت عاوزة تخرج منه لأنها اعتادت علي الأمر فألفته..
بعد حبة اسألة فهمت ان الامر ده مش حصل معاها وحدها لأ، فيه اكتر من بنتين في الكورس وقعوا نفس الوقعة بس مش بسبب هدير ولكن بسبب بنات تانية..
و إنه في العموم اتصاحبت على عدد من البنات دي في جروب بيتشاركوا فيه تجاربهم عشان يتعلموا إزاي يكونوا أحسن و أفضل في الموضوع ده!!!!
يعني دي بقيت تجارة زي الد عارة الإلكترونية و أصبحت شبكة بيستهدفوا فيها البنات الصغيرة اللي سهل ينضحك عليهم و بيجندوهم..
هدير كمان طلعت كانت بتصطادها.. وده دورها أصلاً في التشكيل ده!
سألتها أهلك مشكوش فيكي؟
قالت كله تمام قدامهم.. بروح مدرستي و موبايلي أمان مفيش فيه حاجة لأنهم قالوا لي إزاي اخفي كل الحاجات دي..
و نتيجة عدم وعي الأهل و فساد الصحبة البنت اتسلبت منها برائتها و أصبحت بنت مشوهة غير سوية.
📍 كلامي هنا موجه للأهل.. بالله عليكم توعية مستمرة للبنات في البيت و متقولوش صغيرة مش فاهمة.. مش لوحدنا اللي بنربيهم والله..
الصحاب هتربيهم
المدرسة هتربيهم
السوشيال ميديا هتربيهم
الأفلام و المسلسلات هتربيهم
فـ اللي مش هنعلمه ليهم بشكل واضح و سليم هيتعلموه من برا بشكل مشوه و قذر.
📍 ممنوع تنشغلوا عن بناتكم.
مراعية ان الشغل طاحنكم و ان الوضع المادي ضاغط الكل ولكن كل فترة شوفوا صحاب بناتكم و موبايلاتهم و تابعوا اهتماماتهم وتفضيلاتهم و تابعوهم بليل لما يناموا في غرفهم لأن التربية اهم من الرعاية.
📍ممنوع تعنيف البنات.
الضرب و الصراخ و العنف مش هيحلوا المشكلة ابدا، لكن هيحجموها بمعنى هتختفي قدامك و لكن هتظهر من وراكم.. متخلوش بناتكم تهربزمن قسوتكم للدنيا.
📍الاشباع النفسي و العاطفي مهمين جداً.
يعني لو سمحتم سمعوهم كلام حلو.. احضنوهم و اثنوا على شكلهم و ملامحهم.. عرفوهم انكم مقدرينهم.
📍علموهم يكونوا حلوين جوا.. تلبس اللي تحبه و تحط ميكاب و تعمل اللي نفسها فيه، خليها تعرف تعيش انوثتها جوا عشان تحافظ عليها برا وهي حابة ده مش مجبورة.
📍ساعدوهم يبنوا حدودهم اللي تحميهم.
علموهم من سن مبكر إيه العادي وايه لأ، إيه المسموح وإيه المفروض.. كلموهم عن تطوراتهم النفسية و الجسدية عشان يكونوا مستعدين يستقبلوها.. و اتعلموا إن الجيل ده مينفعش نكبته بدون ما نوعيه.
📍مهم تعملوا قعدة يومية أو أسبوعية أقصى حاجة مع البنات و الاولاد نعرف يومهم مشي إزاي و أبرز أحداثه و خلافه.. مش هنستجوبهم لا و لكن هيحكوا لنا بحب لأنهم عاوزين يشاركونا.
🎯 الخلاصة، لو مشربتوش النهاردة بناتكم الحب بالمعلقة، هيضطروا بكرا يلحسوه من على السكاكين.
يارب أحفظ ذرياتنا ومتفجعناش بيهم ولا فيهم و احفظهم َن الفتن ما ظهر منها وما بطن و اكفيهم شر شياطين الإنس والجن يارب و ارزقهم نفوس سوية في عفو وعافية يارب.
#البنات
