25/05/2026
10 urte igaro dira nire Amets Bat betetzen hasi nintzenetik. Gaur, hamar urte geroago, pena handiz baina bihotza eskertzez beteta, etapa honi amaiera eman eta beste bati hasiera emateko garaia iritsi zaidala esan nahi dizuet.
Urte hauetan bizitako guztia hitzez azaltzea ez da erraza: une bereziak, momentu zailak, irribarrez eta ilusioz beteriko egunak… Guztiek utzi dute arrastoa nire bihotzean.
Eskerrak emateko hitzak motz geratzen zaizkit nire egunerokoan bidelagun izan zareten guztioi: bezero, lagun, familia, nire ondoan lanean aritu zareten lankideei, modeleoei eta goizeroko kafea prestatzen eta ekartzen zenidaten horiei… Zuek guztiok izan zarete nire indarra eta nire babesik handiena.
Zorteko sentitzen naiz eman didazuen maitasun eta konfiantza guztiagatik. Zuek izan zarete nire lanaz benetan gozatzea eta egunero aurrera egiteko kemena mantentzea posible egin duzuenak.
Bihotz-bihotzez, mila esker denoi.
Herri bat bizirik sentitzeko, merkatariok egunero egiten dugu apustu eta lan gogorra. Baina hori mantentzeko, guztion babesa eta konpromisoa ezinbestekoak dira. Hunkigarria da jendea herrian bertan erosten ikustea, kaleak bizirik sentitzea, terrazak jendez beteta, dendak zabalik eta argiz… hori da herri bizi baten seinalea.
Segi dezagun elkar zaintzen.
Segi dezagun merkataritza txikia babesten.
Segi dezagun, guztion artean, herri bizi eta bero bat eraikitzen.
Eskerrik asko bihotzez, benetan.
