09/08/2026
今日真係好開心，亦都有少少感動，所以突然好想同大家講幾句心底話。其實我已經好耐冇認真出過一篇 Facebook Post，每次出 Post 都係賣嘢、介紹產品、做優惠，又或者講下公司嘅安排，好少真正講自己心裏面嘅說話。但今日真係想講下。
最近收到一啲客人嘅說話，話我哋近排介紹嘅新產品、新品牌質素都幾好，包括最近我哋嘗試做嘅 Psycho Bunny、Emporio Armani、Diesel、Aritzia……客人收到貨之後滿意，對我嚟講當然係開心，但更加令我感動嘅，係原來好多客人連我哋一啲好細微嘅地方都有留意到——就係包裝。
有客人話 Best Buy 嘅包裝真係與別不同，甚至有人講：「Patrick 嘅手袋包裝方法，堪稱一絕！」🤣 我睇到真係笑咗，但笑完之後，其實個心係幾感動。因為原來我哋一直堅持做緊嘅一啲小事，大家真係感受得到。
我一直覺得，一件貨寄出去，唔係求其放入個紙箱、封好佢，就叫完成。尤其手袋，我自己本身對手袋比較熟悉，所以由皮料、袋形，到運輸途中點樣避免壓痕、變形，我都會特別緊張。鞋都一樣，我哋會用質量好嘅密實袋裝好，每對鞋入面都盡量塞好紙，希望運輸途中即使有其他貨物壓住，都可以保持鞋形。甚至連盒裝底衫褲，我哋都會另外用保護膜包好。
可能有人會覺得：「使唔使做到咁？」但我自己覺得，要。因為無論你買嘅係平定貴，當你願意落單、願意畀錢嗰一刻，其實已經係一份信任。每個客人收到自己買嘅嘢，都一定有期待，打開包裹嗰一下，梗係希望自己收到嘅係完整、乾淨、靚靚仔仔。所以對我嚟講，唔會因為一件貨平，就可以求其處理。每一張訂單，我都尊重；每一件貨，我都會盡量做好。
另外一樣我一直好重視嘅，就係貨期。雖然我哋對外一直講大約 2–3 個星期，但其實好多時，可能 10 日左右客人已經收到貨。因為我自己覺得，買嘢除咗係買一件產品，其實仲有一份「期待」。嗰一刻你見到佢、鍾意佢、想買佢，嗰份感覺係最強烈。如果一件貨等得太耐，耐到連最初嗰份期待同興奮都冇埋，其實件貨返到嚟，嗰種感覺已經唔同咗。所以可以快，我哋就盡量快，希望大家仲期待緊嘅時候，就已經收到自己買嘅嘢，可以即刻用、即刻享受。
其實今時今日，外面經濟環境真係唔容易，呢樣大家都知道。好多行業生意都有下滑，大家消費亦都比以前更加小心。所以 Best Buy 到今日仍然可以保持住，甚至仲有上升嘅跡象，最近亦多咗好多新客人認識我哋，我真係好感恩。我從來冇覺得呢啲係理所當然。
其實我自己長期一個人喺加拿大生活、一個人作戰，冇人日日提你今日要做咩、幾點起身、幾點執貨、幾點處理訂單，所以自律性一定要好高。但更加重要嘅係，你一定要真心鍾意呢份工作。如果唔係，根本冇可能長期咁投入。而我真係好鍾意自己做緊嘅嘢。大家每一個查詢、每一個 Request、每一張訂單，無論件貨貴定平，我都係認真去對待。
我唔敢講我哋樣樣都做到 100 分，一定仲有做得唔夠好、需要改善嘅地方。但至少我可以答應大家，我哋會繼續保持呢份初心，用真誠、用心同努力去做好每一樣嘢。
今日坐喺度寫呢篇 Post，我真係好開心，亦都真係有啲感動。因為原來自己一直以嚟嘅付出同堅持，係有人睇得到、感受得到。呢份認同，對我嚟講真係好重要。
多謝一路支持 Best Buy 嘅熟客，亦都多謝最近開始認識我哋、第一次願意相信我哋嘅新客人。多謝你哋每一張訂單、每一次信任，同埋每一句鼓勵。就係因為有你哋，我先更加有動力繼續做好呢份自己真心喜愛嘅工作。
今日真係想講一句：多謝大家。❤️
Patrick
Send a message to learn more
