07/06/2018
مرحبا .. آني جنان من #النجف وعمري ٢٤ سنة. من جنت طفلة صار وياي حادث وفقدت البصر بعيني اليمنى ..
حبيت الرسم من أيام الطفولة! بالابتدائية جنت أرسم إنمي وأشياء كارتونية من خيالي .. جنت أرسم أي شي ينطبع ببالي 😊
فصار عندي حلم أنه أصير محترفة بالرسم، مع العلم كلها جانت تضحك على مستواي
وجنت أسمع "انتي بطرانه شدتسوين ادرسي احسنلج الرسم ميفيدج "
لكن هذا صار دافع الي حتى أطور نفسي بالرسم أكثر وأكثر! انتقادهم واستهزائهم بالنسبة إلي كان تشجيع ..
تخرجت وبديت مسيرتي بالفن .. تابعت أساتذة أجانب وفنانات أجنبيات على اليوتوب وبديت اطّور شوية شوية إلى أن وصلت لربع طموحي الي هو العالمية! وكل الي ضحكوا عليّه انصدموا بمستواي 💪🏻
فقداني للبصر بعيني اليمنى كان اله أثر كبير على رغبتي بالفن لأن مجتمعنا يدور مظاهر وهذا الشي خلاني أواجه المجتمع بطريقة تخليهم يقتنعون أنه آني إنسانة ناجحة!
آني مستمرة بطريقي وإن شاء الله أوصل للعالمية ويسموني بيكاسو النجف 😍
