20/01/2026
Kæru ÍBV-arar 🖤🤍
Næsta laugardag fer fram leikur meistaraflokks kvenna gegn Val. Það er engu logið þegar við segjum að þetta sé stærsti leikur tímabilsins til þessa. Stelpurnar okkar hafa staðið sig ótrúlega vel í vetur og deila toppsætinu með Val þessa stundina. Við biðlum til allra að mæta í húsið á laugardaginn og hvetja stelpurnar okkar til sigurs.
Ungir leikmenn ÍBV hafa vakið verðskuldaða athygli á tímabilinu fyrir frábærar frammistöður. Ein þeirra er Ásdís Halla Hjarðar sem hefur sinnt lykilhlutverki þá sérstaklega í varnarleik liðsins. Við skulum kynnast henni aðeins betur.
Næstu daga munum svo við birta kynningu á fleiri ungum leikmönnum.
🏐 Þú hefur vakið mikla athygli í vetur fyrir varnarleikinn – hvernig myndirðu sjálf lýsa þínu hlutverki í liðinu?
Ég myndi segja að hlutverkið mitt í liðinu sé fyrst og fremst að vera sterk varnarlega og leiðandi þar. Ég legg mikla áherslu á að tala mikið, stýra varnarlínunni og halda stemningunni uppi.
🏐 Hvað finnst þér skipta mestu máli í góðum varnarleik?
Mér finnst talandi skipta langmestu máli í góðum varnarleik. Þegar við erum stöðugt að tala saman og hjálpa hver annarri þá gengur oftast mun betur. Svo finnst mér líka skipta miklu máli að vera skynsöm, að lesa leikinn rétt og taka réttar ákvarðanir.
🏐 Hvernig undirbýrðu þig fyrir andstæðinga – ertu mikið að greina leikmenn eða treystirðu meira á tilfinningu inni á vellinum?
Ég kíki auðvitað aðeins á gamla leiki og reyni að greina þá leikmenn sem standa mest upp úr hjá andstæðingunum. En ég geri samt ekki of mikið úr því, mér finnst líka mjög mikilvægt að treysta á tilfinninguna inni á vellinum og lesa leikinn þegar hann er í gangi.
🏐 Er eitthvað í þínum leik sem þú hefur sérstaklega bætt hjá þér í vetur?
Mér finnst ég hafa bætt mig sérstaklega í því að tala meira og þora að vera leiðandi inni á vellinum, ég er duglegri að gefa af mér, bæði í vörninni og líka upp í stúku. Einnig hef ég líka lært mikið í vetur, bæði af reynslu og af stelpunum í liðinu.
🏐 Hversu gott er að hafa markvörð eins og Amalie, vinnið þið mikið saman?
Það var geggjað að fá hana í liðið, bæði sem leikmann og leiðtoga. Hún hjálpar mér rosalega mikið í vörninni, talar mikið við mig og segir mér til inni á vellinum.
🏐 Áttu þér einhverja fyrirmynd í handbolta? Bannað að segja mömmu 😀
Já, fyrirmyndin mín í handbolta er Steinunn Björnsdóttir. Hún er ekki bara ótrúlega góð í handbolta, heldur líka mikill leiðtogi inni á vellinum og mikil fyrirmynd utan hans.
🏐 Næsti leikur er afar mikilvægur - Er öðruvísi undirbúningur hjá þér persónulega fyrir leiki þar sem mikið er undir?
Nei, það er í raun ekkert öðruvísi hjá mér. Ég reyni bara að halda mig við sömu rútínu, æfa vel vikuna fyrir og vera í góðum undirbúningi.
🏐 Hvað gefur þér mesta ánægju í handbolta?
Félagsskapurinn gefur mér klárlega mesta ánægju í handbolta, bæði inni á vellinum og utan hans. Að vera hluti af svona góðum hóp skiptir rosalega miklu máli. Svo finnst mér líka auðvitað bara mjög gaman í handbolta og maður kvartar ekkert þegar hlutirnir eru að ganga vel.
🏐 Nú hefur þú fengið gríðarlega mikla ábyrgð þrátt fyrir ungan aldur. Finnst þér þú vera að vaxa sem leikmaður með þessari ábyrgð?
Já, þessi ábyrgð lætur mann klárlega vaxa með hverjum leik. Maður lærir mikið af því að fá traust og taka meiri ábyrgð inni á vellinum. En á sama tíma finnst mér alltaf vera hægt að bæta sig.
🫵 Ertu með einhver skilaboð til eyjamanna fyrir leikinn um helgina? 🫵
Ég vil bara hvetja ykkur til að mæta og styðja okkur. Stemningin í húsinu skiptir rosalega miklu máli og hjálpar okkur helling inni á vellinum. Þetta verður geggjaður leikur hjá liðum í toppsætinu og við lofum að gefa allt í þetta. 🖤🤍
ÁFRAM ÍBV 🤍🖤
