08/09/2025
ថ្ងៃបុណ្យភ្ជុំ យើងបានជុំ គាត់នៅជាប់ គាត់ពាំងគ្រាប់ យើងពាំសារ
ថ្ងៃបុណ្យភ្ជុំ ជាពេលយើងជុំគ្រួសារ រំលឹកទឹកចិត្ត ដឹងគុណ នឹកបុណ្យបុព្វការីជន ដែលជាទូទៅយើងតែងនឹកដល់សមាជិកគ្រួសារយើងដែលបានចែកឋានទៅ ហើយក៏ជាពេលដែលយើងតែងសប្បាយរីករាយចំពោះជំនុំគ្រួសារ ប៉ុន្តែ
យើងបានជុំ ម៉ែឪបងប្អូន អាចបន្តជីវភាពរស់នៅ អាចមើលមុខម៉ែឪ នៅបញ្ចុកបាយកូនៗបាន អាចនៅរកស៊ី ទៅធ្វើការ ទៅសាលារៀនសូត្រ ផ្ទុយពី
គាត់នៅជាប់ រាប់ពីថ្ងៃទី២៩ កក្កដាមក ឪពុកម្តាយគាត់នៅទន្ទឹងផ្លូវកូន ប្រពន្ធគាត់នៅរង់ចាំប្តី កូនប្រុសកូនស្រីគាត់នៅតែនឹកឪពុក ទាំងស្ទើរនឹងគ្មានដំណឹងសោះឡើយថាគាត់សុខទុក្ខយ៉ាងណា បើទោះ
គាត់ពាំងគ្រាប់ ដោយទ្រូងគាត់ផ្ទាល់ ជួសប្រជាពលរដ្ឋខ្មែរទូទាំងប្រទេស ដាច់បាយ ក្រហាយទឹក ហាលភ្លៀងហាលខ្យល់ ប្រឹងយប់ទល់ថ្ងៃ មិនសំចៃកម្លាំង ក៏គាត់នៅតែតតាំង ទាល់តែកម្តៅសង្គ្រាមថមថយនៅថ្ងៃចាប់ផ្តើមបទឈប់បាញ់ ដោយសុំតែត្រឹមថា
យើងពាំសារ ទៅកាន់ពិភពលោកទាំងអស់គ្នា ឲ្យគេដឹងថាយើងចង់បានសន្តិភាពពិតៗ ឥតឈប់ឈរ អត់ផ្អាក មិនខណ្ឌ "។" រហូតដល់សន្តិភាពពិតប្រាកដ ដែលមានគាត់ទាំង១៨នាក់ត្រឡប់មកជុំគ្រួសារគាត់វិញ ដូចថ្ងៃភ្ជុំបិណ្ឌមុនៗ។
ថ្ងៃនេះ ជាវេនបិណ្ឌទី១ សម្រាប់យើងរាល់គ្នា តែនេះជាថ្ងៃទី៤១ ដែលបងៗទាហ៊ាន ត្រូវបានឃុំខ្លួននៅថៃ ហើយក៏ជាថ្ងៃទី៤១ដែរ ដែលគ្រួសារគាត់បានប្រាស់ចាកគ្នា ក្រោមមូលហេតុនៃអំនួតនយោបាយថៃ។
ខ្ញុំ សូមបួងសួងដល់ដូនតាខ្មែរ និងវត្ថុសក្តិសិទ្ធិទាំងអស់ សុំឲ្យបងៗទាហានមានសុវត្ថិភាព និងសុខភាពពេញលេញ និងអាចវិលត្រឡប់មកផ្ទះវិញឆាប់ៗ ផ្តល់សន្តិភាពផ្លូវចិត្តដល់ក្រុមគ្រួសារ និងជនរួមជាតិទាំងអស់ដែលមិនភ្លេចពីគាត់ទាំង១៨នាក់នោះឡើយ។
ហើយ ដោយសារតែមនុស្ស ដែលបាត់បង់មនុស្សជាតិក្នុងខ្លួន លែងស្តាប់ភាសាមនុស្សបាន និងលែងខ្វល់ពីសំណៅច្បាប់អន្តរជាតិនានា ខ្ញុំក៏សូមបួងសួងឲ្យទំងន់នៃភាពអយុត្តិធម៌ សម្ពាយកម្មពីការស្រេកឃ្លានឈាមស្រស់ពីសង្គ្រាម និងអំរែកបាបពីការបំបែកបំបាក់គ្រួសារផ្ទះសម្បែងរបស់ទាហាន និងជនភៀសសឹកទាំងឡាយ ទាំងសងខាងព្រំដែន ធ្លាក់ទៅលើរាល់ជនណាដែលបង្កសង្គ្រាមនេះឡើង។
