23/10/2024
សាច់ គោ 1Kg = $10 និង សាច់គោ 1Kg = $300 ឬ $500 រសជាតិខុសគ្នាមែនសាច់គោថ្លៃប្រាកដជាឆ្ងាញ់ជាង ហើយក៏អាចនិយាយបានថាឆ្ងាញ់ម្យ៉ាងម្នាក់បានដែរ ហូបហើយឆ្អែតដូចគ្នា រស់បានមួយថ្ងៃដូចគ្នា តែអស់លុយខុសគ្នា ៖
អ្នកជំនាញហិរញ្ញវត្ថុបានលើកឡើងថា ៖ មនុស្សយើងចំណាយលើអាហារច្រើនជាងគេជាប្រចាំថ្ងៃ ។ តស់ ! យើងមករៀនស្វែងយល់ទាំងអស់គ្នា ៖
1. រៀនទិញដុំ បើប្រើរបស់នោះប្រចាំថ្ងៃ ៖ ទឹកមួយដប 1,000 រៀល បើទិញមួយកេស ប្រហែល 15,000 រៀលបាន 24 ដប ចំណេញ 9,000 រៀល ។ បងប្អូនអាចទិញជាដុំនូវរបស់ប្រើប្រាស់ផ្សេងៗទៀតបាន ។
2. ទិញបន្លែ ៖ នៅពេលយើងទិញបន្លែអ្វីមួយ អ្នកលក់អាចថែមស្លឹកខ្ទឹម និងម្ទេស តែភាគច្រើនគឺថែមឱ្យ ដូចនេះយើងមិនចាំបាច់ ចំណាយទិញម្ទេស និង ស្លឹកខ្ទឹមទេ ។
3. ការទិញផ្លែឈើហូប ៖ បើអ្នកចង់ហូបទុរេន កុំទិញពេលខែដែលមានទុរេនតិចតួច អ្នកចាំខែដែលសំបូរទុរេនចាំទិញ ព្រោះបានទាំងគុណភាព បានទាំងតម្លៃល្អ សន្សំលុយបានច្រើនដែរ ព្រោះអ្នកខ្លះចូលចិត្តហូបវាណាស់ ។
4. ធ្វើបាយម្ហូបមកពីផ្ទះ ៖ មិនថាអ្នកធ្វើការ ឬ អ្នករកស៊ីទេ អាចធ្វើបាយខ្លួនឯងហូប អស់តិចហើយទទួលបានសុខភាពល្អជាងទិញគេហូប ។
5. ទិញបាយម្ហូបល្មមដែលខ្លួនហូប កុំទិញឱ្យហូបសល់ បើសិនគេលក់បាយ 6,000 រៀល អ្នកហូបសល់ច្រើន អ្នកអាចឱ្យគេដាក់តែ 4,000 រៀលបានហើយ ។ ល្មមហើយមិនសល់បាយម្ហូបតែសល់លុយ កុំខ្លាចខ្មាស់គេ ។
6. ទឹកកន្លែងធ្វើការ ៖ កាត់បន្ថយការទិញទឹកខាងក្រៅ ផឹកទឹកនៅក្នុង Office សល់លុយបានយ៉ាងហោចណាស់ 2,000 រៀលដែរ ។ 2,000 រៀល x 27 days x 12 months x 10 years = $ 1,620 ។ ពេលខ្លះយើងធ្វើការ 10 ឆ្នាំរកលុយ $1,000 នៅក្នុងខ្លួនគ្មានក៏មានដែរ ។
7. ការដើរហូបក្រៅនៅពេលល្ងាចៗ បន្ទាប់ពីការងារហើយ រួមជាមួយការហូបក្រៅនៅថ្ងៃសម្រាក ៖ បើកាត់បន្ថយបានកាត់ទៅ យូរៗចេញក្រៅម្តងបានហើយ ព្រោះហូបក្រៅចំណាយច្រើនណាស់ ។
8. ការទិញភេសជ្ជៈ ដូចជាកាហ្វេមួយថ្ងៃអ្នកខ្លះអស់ ពីរកែវ បើមួយកែវ 7,000 រៀល មួយថ្ងៃចំណាយអស់ 14,000 រៀលគ្រាន់តែកាហ្វេមួយមុខ អស់ $105 ក្នុងមួយខែ ។
9. ការផឹកស៊ី ៖ អ្នកខ្លះចូលចិត្តផឹកស៊ីសឹងរាល់ថ្ងៃ អស់លុយច្រើនណាស់ ខូចទាំងសុខភាព ដូចនេះត្រូវចេះកាត់បន្ថយ ឬ ឈប់តែម្តង ។
10. នំឬរបស់ហូបលេង ៖ អ្នកខ្លះមិនមែនមួយថ្ងៃ 3 ពេលទេ អាចហូបគ្រប់ពេលដល់យប់តែម្តង ការធ្វើបែបនេះអស់លុយ ហើយប៉ះពាល់ដល់សុខភាពខ្លាំងទៀតផង បើអាចមួយថ្ងៃហូបតែពីរពេលបានហើយ ។
នៅមានរឿងជាច្រើនទៀតបងប្អូន ! ដែលបងប្អូនមិនបានគិតដល់ ហើយចំណាយអស់ច្រើននៅក្នុងមួយខែដោយគ្រាន់តែហូបនឹងផឹក ។ តស់ ! យើងមកគិតលេងៗ ថាមួយខែអស់ប៉ុន្មានដែរ ៖ ( $1 = 4,000 រៀល )
1. បាយ 3 ពេល ៖ 5,000 រៀល X 3 ពេល = 15,000 រៀល = 15,000 X 30 = 450,000 រៀល
2. ទឹកបរិសុទ្ធ ៖ 2,000 រៀល X 30 ថ្ងៃ = 60,000 រៀល
3. កាហ្វេ ៖ 7,000 រៀល X 30 ថ្ងៃ = 210,000 រៀល
4. របស់ហូបលេង 4,000 រៀល X 30 ថ្ងៃ = 120,000 រៀល
5. ការផឹកស៊ី ឬ ដើរលេង មួយខែប្រហែល = 150,000 រៀល គិតតិចផង
ដូចនេះគិតលេងៗ មួយខែអស់ ប្រហែល 990,000 រៀល = $247.5 គ្រាន់តែអាហារ ចុះបើអ្នកប្រាក់ខែ តែ $300 តើអ្នកសង្ឃឹមអ្វី ? យើងនៅមានចំណាយជាច្រើនទៀត ដូចជាផ្ទះ ទឹក ភ្លើង Internet សាំង ជួយអ្នកផ្ទះ អ្នកខ្លះមានបំណុលទៀត តើយើងរស់នៅបែបណាដែរ ? វិធីគឺត្រូវកាត់បន្ថយទិញតែរបស់ចាំចាច់ ហើយចេះរកតម្លៃល្អរួមជាមួយគុណភាព ។
ចំណុចសំខាន់មួយទៀតគឺ បង្កើនចំណូល ពីមួយឆ្នាំទៅមួយឆ្នាំ ៖ អ្វីដែលកាន់តែឈឺចាប់ទៀតនោះ ៖
- យើងនៅចំណូលដដែល ពីមួយឆ្នាំទៅមួយឆ្នាំ តែចំណាយកើន ។
- យើងបាត់ចំណូល អាចមកពីរកស៊ីខាត បាត់បង់ការងារ ហើយមានបំណុលទៀត ។
- អ្នកខ្លះចំណូលមិនកើនទេ ប្រាក់ខែដដែល ៗ ពេលក្រុមហ៊ុនតូច ដល់ពេលក្រុមហ៊ុនត្រូវបង់ពន្ធ ប្រាក់ខែដែលបានដដែលៗនោះតិចជាងមុនទៀត ពិតជាទុក្ខលើទុក្ខ ដូចនេះហើយការរើសកន្លែងការងារសំខាន់ណាស់ ។
SUC NEWS
#ចំណេះដឹងហិរញ្ញវត្ថុ
#ចំណេះដឹងថ្មីៗ
#ចំណេះដឹងសង្គម
#ចំណេះដឹងទូទៅ
#ចំណេះដឹង
#ចំណេះដឹងផ្លូវចិត្ត
