15/07/2026
මෙරට සෞඛ්‍ය සේවාව සතු විශේෂඥ දැනුම, අතිනවීන වෛද්‍ය තාක්ෂණය, පර්යේෂණාත්මක ප්‍රවේශය, කැපවීම සහ බහුවිෂයීය කණ්ඩායම් සම්බන්ධීකරණයේ විශිෂ්ටත්වය ජාත්‍යන්තර වෛද්‍ය ක්ෂේත්‍රය ඉදිරියේ යළිත් තහවුරු කරමින්, ශ්‍රෝණි මේඛලාවෙන් (Pelvic Girdle) සම්බන්ධ වී උපන් බද්ධ නිවුන් දියණියන් දෙදෙනා සාර්ථකව වෙන් කිරීමේ අතිශය සංකීර්ණ හා ඓතිහාසික ශල්‍යකර්මය සිදුකළ පේරාදෙණිය සිරිමාවෝ බණ්ඩාරනායක විශේෂිත (ශික්ෂණ) ළමා රෝහලේ විශේෂඥ වෛද්‍ය කණ්ඩායම වෙත රජයේ සහ සෞඛ්‍ය අමාත්‍යාංශයේ ගෞරවය හා ප්‍රණාමය පුද කිරීම සඳහා සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි මහතා ඊයේ (14) පස්වරුවේදී එම රෝහලේ නිරීක්ෂණ චාරිකාවක නිරත විය.
මෙහිදී මෙම ඓතිහාසික ශල්‍යකර්මයට නායකත්වය ලබාදුන් විශේෂඥ ළමා ශල්‍ය වෛද්‍ය මා තුළ හෙට්ටිආරච්චි මහතා ඇතුළු විශේෂඥ ශල්‍ය වෛද්‍යවරුන්, නිර්වින්දන විශේෂඥවරුන්, ළමා රෝග විශේෂඥවරුන්, ප්ලාස්ටික් ශල්‍ය වෛද්‍යවරුන්, වකුගඩු බද්ධ කිරීමේ විශේෂඥවරුන්, විකිරණවේදීන්, හෙද නිලධාරීන් සහ අනෙකුත් සෞඛ්‍ය වෘත්තිකයන්ගෙන් සමන්විත බහුවිෂයීය කණ්ඩායම වෙත සිය ගෞරවය හා කෘතවේදීත්වය පළකළ නියෝජ්‍ය අමාත්‍යවරයා, මෙම සුවිශේෂී ජයග්‍රහණය මෙරට නිදහස් සෞඛ්‍ය සේවා ඉතිහාසයේ රන් අකුරින් සටහන් වන සන්ධිස්ථානයක් බව අවධාරණය කළේය.
2021 වසරේ මාවනැල්ල ප්‍රදේශයේ මවකගේ කුසින් සිසේරියන් සැත්කමක් මඟින් බිහි වූ මෙම බද්ධ නිවුන් දියණියන් දෙදෙනා ශ්‍රෝණි ප්‍රදේශයෙන් එකිනෙකාට සම්බන්ධව උපත ලබා තිබූ අතර, ඔවුන්ගේ අභ්‍යන්තර අවයවද ඉතා සංකීර්ණ ආකාරයෙන් එකිනෙකට සම්බන්ධ වී තිබිණි. එක් දියණියකට පමණක් වකුගඩු දෙකක් පිහිටා තිබූ අතර අනෙක් දියණියට වකුගඩුවක් නොතිබීම හේතුවෙන්, ඔවුන්ගේ ජීවිත ආරක්ෂා කිරීම සඳහා අදියරෙන් අදියර සැලසුම් කළ විශේෂඥ ප්‍රතිකාර ක්‍රමවේදයක් ද ක්‍රියාත්මක කෙරිණි.
මෙහිදී අදහස් දැක්වූ සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි මහතා, මෙම ඓතිහාසික ශල්‍යකර්මයේ සාර්ථකත්වය දරුවන් දෙදෙනෙකුගේ ජීවිත සුරක්ෂිත කළ වෛද්‍ය විශිෂ්ටත්වයේ සලකුණක් පමණක් නොව, මෙරට සෞඛ්‍ය ක්ෂේත්‍රය සතු විශේෂඥ දැනුම, නවීන වෛද්‍ය තාක්ෂණය භාවිත කිරීමේ හැකියාව, පර්යේෂණාත්මක ශක්තිය සහ විශේෂයෙන්ම සුව සත්කාරය සදහා කැපවූ මෙරට සෞඛ්‍ය ක්ෂේත්‍රයේ මානව සම්පතේ හැකියාවන් - දක්ෂතාවයන් ලොවට පෙන්වා දුන් ජාතික ජයග්‍රහණයක් බව පැවසීය.
