26/05/2026
සිසුවියකගේ ජීවිතය රැකගන්නට ගිය විදුහල්පතිවරයෙක් කිරින්ද මුහුදේ ගිලී මරුට..
බඩල්කුඹුර ප්රදේශයේ විදුහලකින් කිරින්ද වෙරළ තීරය වෙත පැමිණි අධ්යාපන චාරිකාවක් ඛේදවාචකයකින් කෙළවර කරමින්, දියවැල් පහරකට හසු වූ සිසුවියක බේරාගැනීමට තැත් කළ විදුහල්පතිවරයෙකු මුහුදේ ගිලී අවාසනාවන්ත ලෙස ජීවිතක්ෂයට පත්ව තිබේ. අනතුරට පත් සිසුවිය සහ විදුහල්පතිවරයා දිය රළ අතරේ ගිලෙමින් සිටියදී වහා ක්රියාත්මක වූ පොලිස් ජීවිතාරක්ෂක නිලධාරීන් සහ ප්රදේශවාසීන් එක්ව ඔවුන් දෙදෙනා බේරාගෙන දෙබරවැව මූලික රෝහලට ඇතුළත් කිරීමට පියවර ගෙන තිබුණි. කෙසේ වෙතත්, රෝහල් ආරංචි මාර්ග තහවුරු කළේ රෝහල්ගත කරන විටත් එම විදුහල්පතිවරයා මෙලොව හැරගොස් සිටි බවයි.
තම සෙවණේ හැදෙන වැඩෙන දරුවෙකුගේ ජීවිතය වෙනුවෙන් තමන්ගේ ප්රාණය පරදුවට තබා කටයුතු කළ මෙම විදුහල්පතිවරයාගේ අකල් අභාවය සමස්ත අධ්යාපන ක්ෂේත්රයටම මෙන්ම රටටම දැඩි සංවේගයක් දනවන පුවතක් බවට පත්ව ඇත. සිසුවිය සහ ගුරුවරුන් පිරිසක් මුහුදේ නාමින් සිටියදී සිදු වූ මෙම අනපේක්ෂිත අනතුර පිළිබඳව කිරින්ද පොලිසිය විසින් වැඩිදුර විමර්ශන පවත්වාගෙන යනු ලබයි. ඔහුට නිවන් සුව අත්වේවා...
🔴
