01/09/2024
01. ඔයාලගෙ පවුලටම ආවේණික විවිධ සම්ප්රදායන් ඔයාගෙ පවුල තුළ නිර්මාණය කරන්න. මාසයකට වතාවක් හෝ පවුලේ සියල්ලන් එකතු වෙලා එලියට යන එක, ඉඳහිට හරි රෑකට පවුලේ හැමෝම එකතුවෙලා ආසාවෙන් බලන චිත්රපටයක්.. එකතු වෙලා රෑ කෑම ගන්නට, නිවාඩු දවසට කෑම ගන්නට එලියේ පුංචි ඉඩකඩක් ලස්සන කරල හරිගස්සන එක වගේ.. දේවල් ඒ අතර තියේවි. මට පවුලක් ඉන්නවා කියන හැඟීම පවුලේ අයට දැනෙන්න, ඒ අය ගාව ඒ හැඟීම ගොඩනඟන්න මේ වගේ පුංචි දේවල් සෑහෙන්න දුරට හුඟක් උදව් වෙනවා..
02. පවුලේ අයගෙ විවිධ උත්සාහයන් අගය කරමින් ඔවුන්ව හැම මොහොතේම දිරිමත් කරන්න. ඒ වගේම ඔවුන්ගේ ජීවිතේ විශේෂ අවස්ථා, ජයග්රහණ හා සාර්ථකත්වයන් සමරන්න. ඒවා කොයිතරම් කුඩා උනත් හැමෝම එකතුවෙලා රස කෑමකින් ඒක සමරද්දි ඒවා දවසක හැරී බලන්නට තරම් විශාල මතකයන් බවට පත් වෙනවා.
03. පවුලේ අයත් එක්ක නිතර ඇති වෙන හිත් අමනාපකම්, නොහොඳ නෝක්කඩු හිතේ තියාගෙන දුරට අරන් නොයා ඒවා ඉක්මනින්ම අමතක කරල දාන්නත්, පුංචි පුංචි දේවල් වෙනුවෙන් සමාව දෙන්නත් පුරුදු වෙන්න. පවුලේ අයත් එක්ක ගත කරන දවස් කොයිතරම් වටිනවද ? දරුවො ලොකු වෙනවා..දෙන්න දෙමහල්ලෝ වයසට යනවා. ආදරේ පිරුණු දවස් වෙනුවෙන් අමනාපකම් අමතක කරන්න.
04. 'මගේ ගෙදර' 'මගේ පවුල' වගේ හැඟීම් හදවතට දැනෙන්නට පවුලේ පින්තූර, සතුටු මතකයන් හා ආදරණීය සිහිවටන නිතර පෙනෙන සේ තියන්න.. ආරක්ෂාව වෙනුවෙන් කියා ඒවා අල්මාරි කබඩ් ඇතුලේ සඟවා තියාගන්න එපා.
05. ආදරණීයයන්ට ඔබේ හදවතේ ඇති ආදරය සෑමවිටම පෙන්වන්න.. වැලඳ ගැනිම, සිප ගැනීම, සෙනෙහසින් හිස අතගෑම, පිටට තට්ටු කිරීම වැනි සරල දේවල් තුලින් එකිනෙකා අතරේ සෙනෙහස ආදරය ගොඩනැඟෙමින් පවුලේ බැඳීම් ශක්තිමත් වෙනවා. ඉතින්.. ආදරය හිතේ සඟවාගෙන ඉන්නට එපා. ආදරය පෙන්වන්න.
❤️
Madhushika Udagedara
