21/08/2024
උදේම දැක්ක ලස්සන වීඩියෝවක්.. ❤️
කිරි අම්මලාගේ දානයක් නිවැරැදිව දෙන්නේ කොහොමද ? දෙන්න හේතු මොනවද .?
++++++++++++++++++++++++
💛කිරි අම්මා කෙනෙක් කියන්නේ කාටද?
කිරි අම්මා කෙනෙක් කියන්නේ සත්යය වශයෙන්ම එම අවස්ථාව වන විට කිරි දරුවෙකුට තම දෙතනින් කිරි දෙන අම්ම කෙනෙක්. කිරි අම්මාවරුන්ගේ දානයට ශරීරයේ යම් යම් ආබාධිත තත්වයන් ඇති, (අංග විකල), අශුද්ධ, අවිවාහක, දුරාචාරී හා ස්වාමි පුරුෂයා මිය ගිය කාන්තාවන් කැඳවන්නේ නැහැ.
💛කිරි අම්මා දානය ගැන ඔබ දැනුවත්ද? සමහර දාක හිරු එළිය වැටෙන්නත් පෙර අන්ධකාරය මැදින් සුදුවතින් සැරසී දානයට වඩින කිරි අම්මාවරුන්ගේ සිත නිවන දසුන ඔබ දැක ඇති, කිරි අම්මාවරුන් එලෙස වඩින්නේ කිරි අම්මා දානය පිළිගන්නයි.
ශ්රී ලංකාවේ කිරි අම්මා වරුන් වෙනුවෙන් දෙන දානය ප්රදේශ අනුව සුළු සුළු වෙනස් කම් වලින් යුක්ත වුනත් එය පත්තිනි මැණියන් වෙනුවෙන් දෙන දානයක්. කිරි අම්මාවරුන්ගේ දානය ශ්රීලංකාව තුල ආවේණික මුළුමනින් ම මිහිරි කවි ගායනයෙන් පූජාවකි. මෙම කවි මුඛ පරම්පරාවෙන් පැමිණෙනවා.
💛කිරි අම්මා දානය: පත්තිනි මැණියන්
පතිවෘතා බලයෙන් අග තැම්පත් ඒ නිසාම දිව්යත්වයට පත් දෙවගනක් ලෙස පත්තිනි මැණියන් සලකනු ලබනවා. දැනට නවගමුවේ පිහිටි සත් පත්තිනි දේවාලයේ ප්රධාන කොට ගෙන රටපුරා වෙන්වු දේවාල වල පුද පුජා කටයුතු සිදු කෙරෙන්නේ පත්තිනි මැණියන් වෙනුවෙන්.
විශේෂයෙන් පුංචි දරුවන්ට , ගර්භණී මාතාවන්ට,දරුවන් බලාපොරොත්තු වෙන කාන්තාවන්ට පත්තිනි දේවියගේ පිහිට ආරක්ෂාව ලැබෙන බවට තියෙන්නේ ලොකු විශ්වාසයක්. ඒ වගේම පත්තිනි දේවිය වෙනුවෙන් පුදනු ලබන කිරි අම්මාවරුන්ගේ දානය බොහෝ හාස්කම් හා අනුහස් වලින් යුක්තයිලු.
💛කිරි අම්මා දානය: කිරි අම්මාවරුන්ට දෙන දාන දෙන්නේ ඇයි?
මේ දානය බොහෝ දුරට කෙරෙන්නේ බෞද්ධ පසුබිමක් ඇති නිවෙස් වලයි. කිරි අම්මාවරුන්ගේ දානයක් දීමෙන් පවුලේ දියුණුව, ඇස්වහ කටවහ දුරුවී යක්ෂ, ප්රේත, භූත ආදීන්ගෙන් ඇතිවන උපද්රව දුරු වෙනවාලු.
😇කිරි අම්මාවරුන්ගේ දානයක් බාර හාර වෙන විශේෂ අවස්ථා
🌼ලෙඩ රෝග වලදී
🌼දරු උපත් වලදී
🌼දරුවන්ට ආරක්ෂාව පතා
🌼දරු ඵල පතා
🌼ගොවිතැන් කටයුතු වලදී
🌼පවුලේ දියුණුව සදහා වාර්ෂිකව
🌼ප්රදේශයේ,රටේ වස්දොස් දුරුවී රටේ සෞභාග්ය පතා
😇කිරි අම්මා දානය සදහා කිරි අම්මාවරුන් තෝරා ගන්නේ කෙසේද?
කිරි අම්මා වරු තෝරා ගැනීම ඉතාම පරිස්සමෙන් කල යුතු කාර්යයක්, පත්තිනි මැණියන් නියෝජනය සිදුවෙන කාන්තාවන් ඉතාම ප්රතිපත්ති ගරුක, ආගමානුකූල අය වීම අත්යවශ්යයි.
ඒ වගේම දේව කාර්යයන්හී දී කිලි වලින් තොර වීම අනිවාර්යය වෙනවා.
වැදුම් කිල්ල, මරණ කිල්ල හා කොටහළු කිල්ල ඉන් ප්රධාන වන අතර කාන්තාවන්ගේ මාසිකව හටගන්නා කිල්ලද මෙහිදී සැලකෙනවා. කිරි අම්මාවරුන්ට එම දානයට පෙරදිනයේ ආරාධනා කරනු ලබන්නේද මේ සියලුම කිලි වලින් තොර බවට වගබලා ගැනීම සදහායි.
🙏🙏පත්තිනි මැණියන් නියෝජනය වන අම්මාවරුන් සත් දෙනා
සිද්ධ පත්තිනි
සලඹ පත්තිනි
අඹ පත්තිනි
මල් පත්තිනි
ගිනි පත්තිනි
දේව පත්තිනි
සත් පත්තිනි
මේ කිරි අම්මා වරු නියෝජනය කරමින් ඕනෑම කාන්තාවන්ට ඒ සදහා සහභාගී වෙන්න බැහැ. කිරි අම්මාවරු 7,14,21 වශයෙන් තමයි කිරි දානයට සහභාගී වන්නෙ. සාමාන්යයෙන් කිරි අම්මාවරු 7 දෙනෙකුගේ පැමිණීම බහුලව දකින්න පුළුවන්.
ඒ සදහා සාමාන්යයෙන් ආරාධනා කරන්නේ පති භක්තියෙන් යුත් කිරිදෙන තරුණ ආගමානුකූලව ජිවත්වෙන කාන්තාවන්ටයි.
😇ඒ වගේම කිරි අම්මාවරු ලෙස පහත කාන්තාවන්ට ඒ සදහා ආරාධනා කරනු නොලැබේ.
-ඉතා මහළු කාන්තාවන්
-සුව කළ නොහැකි රෝගවලින් පෙලෙන කාන්තාවන්
-අන්ධ හෝ බිහිරි කාන්තාවන්
-අංග විකල හෝ අපස්මාර රෝගී කාන්තාවන්
-කලින් දරුවන් ලැබී ඔවුන් මිය ගිය කාන්තාවන්
-වැන්දඹු කාන්තාවන්.
-වඳ කාන්තාවන්
-මස් මාළු විකුණ හෝ මත්පැන් පානය කරන කාන්තාවන්
-ගණිකාවන්,දුරාචාරයේ යෙදෙන්නියන්
-කේලාම් කියමින් උනුන් කොටවන කාන්තාවන්
-මීට අමතරව ගර්භණී මව්වරුන්, දරුවන් බිහි නොකල හා අවිවාහක කාන්තාවන් කිරි අම්මාවරු ලෙස ආරාධනා නොලබයි. නමුත් කිරි දානයට සහභාගි වී ආශිර්වාද ලබාගැනීමට මේ කිසිවකින් බාධාවක් නැත.
ඇතැම් ප්රදේශ වල කිරි අප්පා කෙනෙක්ද දානයට සහභාගී වීමට සිරිතකි. පලාතෙන් පලාතට මෙය වෙනස් විය හැක.
😇කිරි අම්මා දානය සදහා සුදානම් වීම
✅කිරි අම්මා වරුන්ට ආරාධනා කිරීම
පළමුව කිරි අම්මාවරුන්ගේ දානය සදහා සුභ සහ කිළි රහිත දිනයක් තෝරා ගන්න. අතීතයේදී විශේෂයෙන් සෙනසුරාදා හෝ බදදා දිනයක් මේ සඳහා තෝරා ගත්තද දැන් නම් සතියේ පහසු දිනයක් තෝරා ගන්න ඔබට පුළුවන්.
✅නිවැසියන් දානයට දින තුනක් කලින් සිටවත් මස් මාළු වලින් තොර නිර්මාංශ විය යුතුය.
සමහර අය නම් සතියක් එනම් දින හතක් නිර්මාංශ වෙනවා.
✅නිවස සම්පුර්ණයෙන්ම පිරිසිදු කරන අතර සමහරුන් නිවසේ තීන්ත,පොලිෂ් පවා ආලේප කරනු ලබනවා.
කිරි අම්මාවරුන්ගේ දානයට තෝරා ගත් දිනයට පෙර දින හවස ගෙහිමි කාන්තාව විසින් ඒ සදහා තෝරා ගත් කාන්තාවන්ගේ නිවාස වලට ගොස් බුලත් කොළයක් පිරි නමා ආරාධනා කල යුතු වෙනවා.
😇කිරි අම්මාවරුන්ගේ දානයට සකස් කරන කැවිලි
මෙම දානය සඳහා යොදාගනු ලබන්නේ කිරි ආහාර වීම විශේෂ වෙනවා.
🌿කැකුළු හාල් කිලෝ 7 ක කිරිබතක් ( කිරිබත් කැට 56)
🌿කිලෝ 2 ක කිරියා (කැබලි 56)- හාල් කිරි නමින්ද ඇතැම් පළාත් වල හදුන්වනවා.
🌿කැකුළු හාල් කිලෝ 2 ක හැදි කැවුම්(කැබලි 56)
🌿කෙසෙල් ගෙඩි 56
💛මීට අමතරව පහත දේවල්ද සුදානම් කරගත යුතුය.
🌿කිතුල් හකුරු කෑලි 8
🌿පඬූරු 8 (කාසි)
🌿බුලත් විට 8
🌿කෙසෙල් කොළ 7
🌿ලොකු බෑග් 7
🌿මැටිපහන් 08
🌿කෝපි කෝප්ප 08
🌿කපුරු පෙත්තක්
🌿පහන්තිර 15 යි
🌿බොහෝ දුරට මෙම අම්මාවරුන් හට පිරිකරක්ද පුජා කරන බැවින් පිරිකර 07 ක්ද පිළියෙළ කරගන්න. අද කාලයේ නම් වියලි බඩු පාර්සල් පිරිකර ලෙස බහුලව ලබාදෙනවා.
😇කිරි අම්මා දානය: වත් පිළිවෙත්
සාමාන්යයෙන් මෙම දානය කපුටන් හැඩීමට පෙර දී අවසන් කල යුතු යුතු යැයි සැලකෙනවා.
දානය නොඉදුල්ව තබාගත යුතු බැවින් එහි ලුණු ඇඹුල වත් බලන්නේ නැහැ. ඒ වගේම පිසූ භාජන පවා වසා තබන්න. උඩුවියන්, යටි වියන් බැද පිරුවට ඇද, හිසට සුදු රෙද්දක් බැද, මුඛ වාඩම් දමා දානය පිළියෙල කල යුතුයි.
දානයෙන් පසුව ඒවා පිරිසිදු කරන්නේ එම දානය සතෙකු හෝ ඉදුල් නොකිරිමටලු.
පළමුව බුදුන් වහන්සේ උදෙසා දානය පිළිගන්වනු ලැබේ. ඒ සදහා දානය දෙනු ලබන ස්ථානයේ උස් තැනකට නිවසේ බුදු පිළිම වහන්සේ වඩම්මවා මේසයක් සකස් කර මල්,පහන්, සුවඳ දුම්, බුද්ධ පූජාව, කිරි ආහාර, ගිලන්පස, පිරිකර පූජා කරනු ලබයි.
පත්තිනි මෑණියන්ගේ පිළිරුව/පින්තුරය ප්රධාන කිරි අම්මා නිවසට වඩම්මවන අතර පත්තිනි මෑණියන්ගේ පිළිරුව තැබීම උදෙසාත් වෙනම ස්ථානයක මේසයක් සකසා කහමල්, පහන් සුවද දුම්, කිරි ආහාර ආදිය පූජා කරනු ලබයි.
කිරි අම්මා වරුන්ගේ දානය උදේ පහට විතර (කොස් නැටි පෙනෙන වේලාවට) අරඹා විනාඩි හතලිස් නමයක කාලයක් තුළ මෙය නිම කරනු ලබනවා.
එනම් කහ කැටේට ඉර පෑයිමට පෙර මෙය නිම විය යුතු වෙනවා. එහිදි එක් පත්තිනියකට විනාඩි හත බැගින් වෙන්වෙනවා.
පුරාණයේදී කිරි අම්මා දානය දීමේදී පළමුව අඩුක්කු වෙන්කරනු ලබනවා. ඉන්පසු පොල්ගහක කොළ බැඳ කිරි අම්මාලට දානයක් දෙන බවට දිනයක් පොරොන්දු වී පඬුරක් වෙන් කර බාර වුනාලු.
කිරි අම්මා දානය පිරිනමන දිනයේ දානය පිරිනමන දිනයේ පළමුව කොළ බැඳි පොල් ගහේ ගෙඩි කඩාගෙන නොයිඳුල් තෙල් සිඳ ඒ මඟින් දානය පිළියෙළ කලා. ඒත් දැන් කාලය වෙනස් වෙලා. මේ සදහා බාර වීම පත්තිනි දේවාලයේ හෝ නිවසේදී පඬුරක් වෙන් කර සිදු කරනු ලබනවා.
😇නිවස සුදානම් කීරීම
ගේ සෝදා පිරිසිදු කර සුදුහඳුන් සමග කහපොල් කිරිවලට දියකර ගෙයි පුරා ඉස සාම්බ්රානි කට්ටකුමංජල් දුම් ඇල්ලිය යුතුය. පැදුරු දෙකක් එලා ඒ මත සූදු සාරියක් එලන්න. කිරි අම්මාවරු ගේ තුළට වඩින විට මූහූණ සෝදා ගැනීම සඳහා ගෙයි දොරකඩ දෙහි බෑයක් සමඟ කහ මිශ්ර වතුර කෝප්පයක් තබන්න.
😇කිරි අම්මාවරුන් පැමිණීම
පිරිසුදුවට පිරිවට ඇඳ පේ වෙන්නේ
දානෙට සත්දෙන එන බව දන්නේ
පත්තිනි දෙවියොත් සමඟ වඩින්නේ
කඩුල්ල ගාවට ඇවිත් සිටින්නේ
කඩුල්ල ලග සිට ප්රධාන කිරිඅම්මා සමඟ කිරි අම්මා වරු ගායනා කරනවා. ඉන් අනතුරුව කිරි අම්මාවරු හත් දෙනා නිවෙස ඉදිරිපිට තබා ඇති දිය පිරි බඳුන තුළට දෙහි කැබැලෙන් පිරිසිදු වී නිවසට ඇතුල් වෙනවා.
එම අවස්ථාවේදී කට සෝදා ගැනීමට වතුර වීදුරුව බැඟින්ද ලැබෙනවා. ප්රධාන කිරි අම්මා නිවසට ඇතුල් වෙන්නේ පත්තිනි සළඹ හා පත්තිනි මැණියන්ගේ පිංතූරයක් රැගෙනයි.
එම පත්තිනි සළඹ හා පිංතුරය පත්තිනි මැණියන් වෙනුවෙන් වෙන්කල ස්ථානයේ තැම්පත් කරනු ලබනවා. ඉන්පසු ගෘහ මුලිකයා බුද්ධ පුජාව,ගිලන්පස බුදුරාජාණන් වහන්සේට පූජා කරනවා.
ඉන්පසු පත්තිනි මැණියෝ උදෙසා පූජා වට්ටිය පූජා කරනවා.
මුලින්ම සත් පත්තිනි පහනේ තිරය බැගින් කිරි මැණිවරුන් හත් දෙනා විසින් පත්තු කරනවා.
දෙවනුව හඬ නගා පන්සිල් ගැනීම කරනවා. ඉන්පසු පත්තිනි මැණියන්ට ආරධනා කරනු ලබනවා.
වැඩිමල් පිළිවෙලකට එළා ඇති පිරුවට මත කිරි අම්මාවරු ඉදගන්නවා.
ඉන්පසු පත්තිනි හෑල්ලේ කවි හඬ නගා කියනවා.
කිරි අම්මාවරුන්ගේ දානය අද සමාජයේ බොහෝ දෙනා අතරත් ජනප්රියයි. හැබැයි මේ දානයේ සුවිශේෂ වැදගත්කම අවබෝධ කරගෙන නිවැරදිව දානය පවත්වන එක නම් කාගෙ කාගෙ අතිනුත් වෙන්න ඔනෙමයි. ඔබත් මින් පස්සේ කිරි අම්මාවරුන්ගේ දානය ජනප්රිය රැල්ලට, කරන්නන්වාලේ කරන එක නවත්වලා හරි විදියට ම පවත්වන්න.
මේ සියලු විස්තර ඔබව දැනුවත් කිරීම සදහා අන්තර්ජාලයෙන් උපුටා ගන්නා ලදි .
SK Herath මහතාගේ මූණු පොතේ සටහනකින් උපුටා ගැනීමකි.
පාරම්පරික Paramparika - The HealthFood Store
Video copied
උපුටා ගත් වීඩියෝවකි.
