14/09/2024
කුඩම්මා.❤
මම දැන් දොස්තර කෙනෙක්.රජයේ ඉස්පිරිතාලයකට අලුතින් පත්වුණේ.මගේ පවුලේ අක්කයි,අයියයි, මායි විතරයි.අම්මා නැතිවෙනකොට ලොකු අක්කට වයස 8 යි.අයියට 6යි මට 5 යි.තාත්තට රස්සාවක් කරගෙන අපි තුන්දෙනාගේ වැඩකටයුතු කරගන්න බැරි කම නිසා නෑයන්ගේ බලකිරීමක් මත තවත් කසාදයක් කරගත්තේ අපේ අනාගතය ගැන හිතලා ය.අපේ පවුලට අලුතෙන් එක්වුණ සාමාජිකාව තමයි කුඩම්මා...
එහෙත් ...අපි තුන්දෙනාටම කුඩම්මව පේන්න බැහැ මන්ද, අපේ අම්මට වඩා ලස්සනත් නැහැ අපිට අම්මතරම් වටින්නෙත් නැහැ. එයාගේ අහිංසක පෙනුමක් තිබුණට,අපි එයාට සමීපවුණේ නැහැ.නමුත් එයා අපිට සැර ගතියක් පෙන්නුවේ නැහැ.අපි එයාගේ හිත රිද්දු අවස්ථා බොහෝමයි.නමුත් එයා ඒව ඉවසා හිතදරාගෙන හිටියේ කොහොමද මන්දා. හවස තාත්තා ගෙදර ආවාම කේලම් කිව්වෙත් නැහැ. අම්ම කෙනෙකුගෙන් ඉටුවිය යුතු රාජකාරිය එයා එලෙසින්ම කිසි අඩුපාඩුවක් නැති සුහද සිතින් ඉටුකෙරුව.
අපි තිදෙනාම එකාට එකා පරයමින් හොඳට ඉගෙන ගත්තා. ගෙදර වැඩ ,අපේ වැඩ සේරම කෙරුවේ කුඩම්මා, කුස්සියේ පැත්තකටවත් අපිට එන්න දුන්නේ නැහැ.අපිට කියල වැඩක් කරන්න දුන්නේ ඉස්කෝලේ වැඩ විතරයි. අපි ඉස්කෝලේ යනකොටත්, ගෙදරින් බැහැරව කොහේ ගියත් කුඩම්මා අපි පස්සෙන්මයි.අපේ අකැමැත්ත නිසා එයා අපෙන් බැණුම් අහන වාර ගණන අනන්තයි.නමුත් ඒව සේරම ඉවසාගෙන අපිව බලාකියා ගත්තේ මල් වගේ.
කුඩම්මා දරුවෙක් හදාගන්න බරි කාරණේ ගමේ හැමෝම කීවේ "වඳ ගැහැනියක්" කියල.ඒ කටකතා ඉවසගෙන හදවතින් හැඬූ වාර ගණන බොහෝමයක් ඇති.
අපි ටික ටික ලොකු වෙනකොට කාලය ගෙවී ගිහින්. අක්කයි,අයියයි උසස් පෙළ සමත්වෙලා කැම්පස් යන කාලෙයේදී තාත්ත අසනීපවෙලා හිටියේ. කුඩම්මා තාත්තව ගොඩ දාගන්න ගත්ත උත්සහය අපිට අද වගේ මතකයි.නමුත් එයින් ඵලක්වුණේ නැහැ. තාත්තා සදටම අපෙන් සමුගත්තා. ඉන් පසු අපේ ගෙදර ආර්ථිකය දවසින් දවස කඩාවැටුණා. ගම වටේ නෑයන් හිටියට ඔවුන්ගෙ කිසි උපකාරයක් ලැබුණේ නැහැ.
කුඩම්මා හොඳ ගොවි පවුලක කෙනෙක්. කුඩම්මට තිබුණා ගොඩින්,මඩින් දේපළ. ඒ සේරම අපේ ඉදිරි අධ්යාපන කටයුතු සඳහා කොටසින් කොටස වික්කා.අපිට හොඳට ඉගැන්නුව.කිසිම අඩුපාඩුවක් තිබ්බේ නැහැ.කිසිකෙනෙකුට ණය වෙන්න හෝ කිසිවෙකුගෙන් අත පා ජීවත්වෙන්න තරමට අපිව පත්කළේ නැහැ.
කාලයේ ඇවෑමෙන් අපි තිදෙනා කුඩම්මව ටිකෙන්,ටික තේරුම් ගන්න කොට කුඩම්මා අපිට ටිකක් අහිංසක සැරගතියක් පෙන්නුවේ අපේ අනාගතේ ගැන හිතල වෙන්න ඇති. ප්රේම සබඳකම් තහනම්, කොහේ ගියත් කුඩම්මා අපේ පස්සෙන්මයි. ක්රමක් ක්රමයෙන් අපිට කුඩම්මා ගැන ඇතිවුණේ නිමක් නැති ආදරක් සහ ගෞරවයක් .අපි එයාට ගෞරව කළා.
අයියගේ උපාදියක් සමඟ කැනඩාවේ ආයතනයක් උප කළමනාකාර තනතුරකට රැකියාවක් ලැබුණා.එයා රට ඉන්නකොට එයාට මනාලියක් තේරුවේ අපේ කුඩම්මා. දැන් අයියයි නෑනයි රට ඉන්නෙ.එයාලට දැන් බබෙකුත් ඉන්නව.
ලොකු අක්කගේ උපාධියට නවසීලන්තයේ වැඩිදුර ඉගැනුම ලබන්නට ශිෂ්යත්වයක් ලැබුණා. එහේ ගිය වෙලාවේ. ලංකාවේ කෙනෙක් විවාහ වෙන්නට කුඩම්මගෙන් අවසරය ඉල්ලුව. නමුත් කුඩම්මා ඒ පුද්ගලයා ගැන තොරතුරු සොයා බලා එයාලගේ විවාහයට අවසර දුන්නා.එයාල ලංකාවට ඇවිත් විවාහවෙලා ආයෙත් රට ගියා. දැන් මායි,කුඩම්මයි ගෙදර තනි වෙලා.
අයියා ලංකාවට නිවාඩුවට ඇවිත් යන දවසේ කුඩම්මගේ නළලේ කැලැල්ල සිඹල,වැඳල තමයි යන්නෙ.
අපි පොඩිකාලේ දවසක් අයියා සරුංගලයක් හදන්න යනකොට කුඩම්ම එක්ක කේන්ති ගිහින් අතේ තිබුණ පිහියෙන් දමල ගැහුවා.කුඩම්මගේ නළලේ වැදිල මැහුම් හතරක් දැම්මා. ඒ දවස්වල අපේ තත්තටවත් කිව්වේ නැහැ..නාන කාමරේ ලිස්සල වැටුණා කියලයි කිව්වෙ.
කුඩම්මා එයාගේ ජීවිත කාලයම අපි වෙනුවෙන් කැප කළා. රට්ටුන්ගෙන් නොහොඹිනා ඇනුම්පද ඇහුවා. ඊට පසු කාලයක මට දැනගන්න ලැබුණා කුඩම්මා "වඳ ගැහැනියක් නොවන බව. තාත්තත් එක්ක කතා කරලා තීරණයක් ගත්තලු..දරුවෙක් හදාගන්නේ නැහැයි කියලා. අපි තුන්දෙනා එයාට හොඳටම ඇති කියලා.
ඇගේ කැප කිරීම මහ මෙරක් තරණය කිරීමට අපිට රුකුලක් වුණා....කුඩම්මාවරුන් අතරේ අපේ කුඩම්මා දේවතාවියක්..ඇයට පල්ලි පන්සල් ගිහින් නිවනට යන්නට පෙරුම් පුරන්න අවශ්යයක් තිබේද....??
දැන් ඇය වයසයි. මම කසාද බඳින වයසේ වුණත්, මට කසාදයක් ගැන හිතන්න බැහැ...මගේ කුඩම්මව දාල මම කොහේ යන්නද. අපිට පණ දුන් ඒ දේවමාතාව කිසිම අඩුපාඩුවක් නැතිව ඇස් දෙකේ තියන් මම හොඳින් බලාගන්නව.ඇය නිරෝගියි විවේක සුවයෙන් කාලය ගතකරනවා...
දීර්ඝායු වේවා!! ඒ මාතාවට.
✍️ ෆවුම් අන්සාර්..
උපුටා ගැනීමකි 🙏😍❤️
