30/08/2021
သိုးမွေး ပုဝါ ခေါင်းစွပ် အနွေးထည် တို့ကို ဘယ်လိုလျှော်မလဲ
-----------------------------------------------------------------
သိုးမွေး အဝတ်အထည်လေးတွေ ပင်ပင်ပန်းပန် ထိုးခဲ့ ပြီးမှ ရေလျှော်ပြီးရော ရွဲသွားတယ်။ ကျဲသွားတယ်။ ပုံပျက်သွားတယ် စသဖြင့် ခဏ ခဏ ကြားရပါတယ်။
သိုးမွေး ချည်ထည် တွေကို လျော်တဲ့ နည်းလမ်းလွဲ နေရင်လည်း ပုံစံလေးတွေ ပျက်တတ်ပါတယ်။
ဘယ်လိုလျှော်ရမလဲ ဆိုတော့ တခြားအဝတ်အထည်တွေနဲ့ ရော မလျှော်ဘဲ သီးသန့်လျှော်ပါ။
ရေအေးထဲကို ခေါင်းလျှော်ရည် သို့မဟုတ် ရေချိုးဆပ်ပြာရည် ထည့်ပါ။ သမအောင်မွှေပြီးရင် သိုးမွှေးအထည်ကို ထည့်ပါ။ အသာအယာ ဆုတ်နယ်ပြီး နာရီဝက်လောက် စိမ်ထားပါ။ အစွန်းအထင်း ရှိသော နေရာကိုသာ လက်ဖြင့် အသာအယာ ပွတ်ပါ။ အစွန်းအထင်း မရှိပါက လက်ဖြင် ဖွဖွလေး ဆုတ်နယ်ပြီး ဆပ်ပြာ စင်သည် အထိ ရေဆေးပါ။
အထူး သတိထားရမှာက လုံးဝ ( လုံးဝ) ထုရိုက်ခြင်း၊ ညှစ်ခြင်း မလုပ်ရပါ။
ဆပ်ပြာ စင်ကြယ် သွားပါက သိုးမွေးထည်ကို အဖြူရောင် မျက်နှာသုတ်ပုဝါ သို့မဟုတ် အရောင်မဆိုးထားသော ချည်စောင် ပေါ်သို့ ပြောင်းတင်ပါ။ ပြီးနောက် မျက်နှာသုတ်ပုဝါကို လိပ်ပါ။ပုံမှာ ပြထားတဲ့ အတိုင်းပါ။ မျက်နှာသုတ်ပုဝါကိုလည်း မလိမ်ရပါ။
ရေများကို မျက်နှာသုတ်ပုဝါက စုတ်ယူသွားပြီး သိုးမွှေးအထည်မှာ ရေစစ်သွားလျှင် ရေလုံးဝခြောက်ရန် လှမ်းလို့ရပါပြီ။
သိုးမွေးအထည်များ လှမ်းရာတွင် ချိတ်ဖြင့် တွဲလောင်း မလှမ်းရပါ။ အဝတ်လှမ်းစင်တွင် အလျားလိုက် (ဖြန့်လျက်သား) လှမ်းရပါမည်။
နောက်ထပ်အရေးအကြီးဆုံးက နေရောင်တိုက်ရိုက် ကျသောနေရာတွင် မလှမ်းရပါ။
အတိုချုပ် ဆိုရလျှင်
- ရေအေးဖြင့်စိမ်ပါ။
- အစွန်းချွတ်ဆေးပါသော အဝတ်လျှော်ဆပ်ပြာမှုန့်များကို မသုံးရ။
- Brush မသုံးရ။ ထုရိုက် မလျှော်ရ။
- ဆပ်ပြာစင်အောင်ဆေးသည့်အခါ မညှစ်ရ။
- လက်ဖြင့်ဖွဖွသာ ဆုတ်ပြီးရေစစ်ပါ။
- မျက်နှာသုတ်ပုဝါဖြင့် လိပ်ပြီး ရေခြောက်အောင် လုပ်ပါ
- အလျားလိုက်စင်တွင်လှမ်းပါ။
- နေရောင် တိုက်ရိုက်မကျသည့်နေရာတွင်သာလှမ်းပါ။
သိုးမွှေးအထည်လေးများ လှလှပပ လျှော်နိုင်ကြပါစေ။
မေတ္တာများစွာဖြင့်
Photo - source from internet
