28/11/2024
အသက် 6 လပြည့်ကလေးတွေကို ဒိန်ချဥ်ကျွေးလို့ရနိုင်လား👶
ဘေဘီလေးတွေ ၆ လသားမှာ ဖြည့်စွက်စာ စပြီး ကျွေးတာနဲ့ ဒိန်ချဉ်လည်း စကျွေးလို့ရပါပြီ။ဒိန်ချဉ်ထဲမှာ ကယ်လစီယမ်၊ပရိုတင်းနဲ့ဗီတာမင်တွေများပါသဖြင့် အတော်ကောင်းတဲ့အစားအစာဖြစ်ပါတယ်။ဒိန်ချဉ်မှာ Probiotics တွေပါပါတယ်။ Probiotics ဆိုတာ ခန္ဓာကိုယ်အတွက် အကျိုးပြုတဲ့ပိုးလေးတွေပါ။နေမကောင်းတဲ့သူတွေ ပိုးသတ်ဆေး(antibiotics)တွေ သောက်ရတဲ့အခါ လူကိုအကျိုးပြုတဲ့ ပိုးတချို့ပါ သေသွားတတ်ပါတယ်။အဲဒီအကျိုးပြုတဲ့ ပိုးလေးတွေ အမြန်ပြန်ဖြစ်လာဖို့ probiotics ပါတဲ့ အစားအသောက်လေးတွေ စားပေးတာကောင်းပါတယ်။
ဒါပေမဲ့ တချို့ရယ်ဒီမိတ် ဒိန်ချဉ်တွေကတော့ သကြားတွေ အများကြီးထည့်ထားပါတယ်။ပြီးတော့ ရယ်ဒီမိတ် ဒိန်ချဉ်ဘူး တော်တော်များများက low fat yogurt တွေများပါတယ်။အဆီလျော့ထားတဲ့ ဒိန်ချဉ်(low fat yogurt)တွေကို ဆရာဝန်ညွှန်ကြားချက် မပါရင် ၂နှစ်အောက် ကလေးတွေကို မကျွေးရပါဘူး။၂နှစ်အောက် ကလေးတွေကို ကျွေးမယ်ဆိုရင် သေချာစစ်ဆေးပြီးမှ ကျွေးသင့်ပါတယ်။
အဲဒါကြောင့် ကလေးငယ်ငယ်လေးတွေကို ဒိန်ချဉ်စပြီးကျွေးတော့မယ်ဆိုရင် “သန့်စင်ပြီးသား သဘာဝဒိန်ချဉ်”တွေက အကောင်းဆုံးပါ။သကြားမပါတဲ့ဒိန်ချဉ်၊အချိုတွေထည့်မထားတဲ့ဒိန်ချဉ်လေးတွေ ကျွေးတာကောင်းပါတယ်။ဒိန်ချဉ်ကို သကြားမပါ ဘာမပါ ဒီအတိုင်းသက်သက်တော့ ကလေးတွေက ကြိုက်မှာမဟုတ်တဲ့အတွက် သူတို့ကြိုက်မယ့် သဘာဝအသီးအနှံလေးတွေကို ကြိတ်စက်နဲ့ကြိတ်ပြီးရောကျွေးလို့ရပါတယ်။
၁ နှစ်အောက်ကလေးတွေကို ဒိန်ချဉ်တိုက်ရင် ပျားရည် လုံးဝမထည့်ပါနဲ့။ ၁ နှစ်အောက်ကလေးတွေကို ပျားရည်လုံးဝမကျွေးသင့်သေးပါဘူး။ဒိန်ချဉ်ကိုပျားရည်နဲ့ရောကျွေးတာတွေမလုပ်ပါနဲ့။အန္တရာယ်ရှိပါတယ်။ပျားရည်ဟာ ၁ နှစ်အောက်ကလေးငယ်များအတွက် အဆိပ်အတောက်ဖြစ်စေနိုင်တဲ့ အစားအစာဖြစ်ပါတယ်။လုံးဝ မကျွေးသင့်ပါဘူး။
ပျားရည်ထဲမှ ရှင်သန်တတ်တဲ့ Clostridium ဆိုတဲ့ ဘက်တီးရီးယားက ထုတ်တဲ့အဆိပ်ဟာ ကလေးငယ်တွေအတွက် အန္တရာယ်များတဲ့ “Infant Botulism ”ဆိုတဲ့ ကြွက်သားအားနည်းခြင်းနဲ့ အသက်ရှူရခက်ခြင်းရောဂါဖြစ်စေနိုင်ပါတယ်။ ၁ နှစ်အောက်ကလေးတွေကို ဒိန်ချဉ်တော့ ကျွေးလို့ရပေမယ့် နွားနို့တော့ တိုက်လို့မရသေးပါဘူး။ဒါလေးကိုတော့သတိထားရပါမယ်ရှင့်။ ကလေးတွေအတွက်သီးသန့်ဖော်စပ်ထားတဲ့ Formula နို့မှုန့်ပဲတိုက်ရပါမယ်။
ဒိန်ချဉ်ဟာ ကျန်းမာရေးအတွက် အတော်ကောင်းပါတယ်။ရယ်ဒီမိတ် ဒိန်ချဉ်ဘူးလေးတွေ ကျွေးတော့မယ်ဆိုရင် ကလေးအတွက် မကောင်းတဲ့ဆိုးဆေးတွေ၊အချိုတွေ အများကြီးပါတဲ့ဟာ ဖြစ်နေတာမျိုးမဖြစ်ရအောင်ဘာ ingredients တွေပါသလဲ၊ဘယ်လောက်ပါသလဲဆိုတာသိပြီးမှ ကလေးတွေကိုကျွေးသင့်ပါတယ်။
#ဒိန်ချဥ်
#မိခင်နှင့်ကလေးအသုံးအဆောင်ပစ္စည်းအရောင်းဆိုင်
#ပေါင်ပေါင်းbaobao
