22/07/2022
ဓာတ်ဆားရည်အကြောင်း သိကောင်းစရာ (အသက်ခြောက်လအောက် ကလေးတွေအတွက်)
ရင်သွေးငယ်လေးတွေနဲ့ ကလေးငယ်လေးတွေကို ဓာတ်ဆားရည်တိုက်မယ်ဆိုရင် ကျန်းမာရေးဝန်ထမ်းတွေရဲ့ ညွှန်ကြားမှုနဲ့ တိုက်သင့်ပါတယ်။
ဘယ်လောက်တိုက်ရမယ်၊ ဘယ်လိုပြင်ဆင်ပြီး တိုက်ရမယ်ဆိုတဲ့ လမ်းညွှန်မှုတွေကို သေသေချာချာ နားလည်အောင် လုပ်ဖို့လိုပါတယ်။ ဘယ်နှစ်ရက်တိုက်ရမလဲ ဆိုတာကိုလည်း ကျန်းမာရေး ဝန်ထမ်းတွေနဲ့ တိုင်ပင်မေးမြန်းဖို့ လိုပါတယ်။
ဝမ်းလျှောတဲ့အခါ အန်သည်ဖြစ်စေ၊ မအန်သည်ဖြစ်စေ ရေဓာတ်နဲ့ ကိုယ်တွင်းဆားဓာတ်တွေ ဆုံးရှုံးတတ်ပါတယ်။ ဒီလိုဓာတ်တွေ အများကြီးဆုံးရှုံးလာတဲ့အခါ ကလေးအတွက် အန္တရာယ်ဖြစ်တတ်ပါတယ်။ ဓာတ်ဆားရည်သောက်သုံးခြင်းဟာ ဒီလို ရေဓာတ်ဆုံးရှုံးမှုတွေ မဖြစ်အောင် ကာကွယ်ပေးနိုင်ပါတယ်။ ဓာတ်ဆားရည်ဟာ ဝမ်းပျက်ဝမ်းလျှောရောဂါကို ကုသပေးနိုင်တာမျိုးမဟုတ်ဘဲ ဆုံးရှုံးသွားတဲ့ ရေနဲ့ ကိုယ်တွင်းဆားဓာတ်တွေကို ပြန်လည်ဖြည့်တင်းဖို့အတွက်သာ ဖြစ်ပြီး ပြန်လည်နလန်ထူဖို့နဲ့ ခန္ဓာကိုယ်ကလိုအပ်တဲ့စွမ်းအင်အတွက် ကယ်လိုရီဓာတ်နဲ့ ပရိုတင်းဓာတ်တွေကိုတော့ ပေးနိုင်စွမ်းမရှိပါဘူး။
ဒါကြောင့် မိခင်နို့ကိုတော့ ဆက်ပြီးတိုက်နေရမှာပါ။ လိုအပ်ရင် ကျန်းမာရေးဝန်ထမ်းတွေနဲ့ တိုင်ပင်ပါ။ ဓာတ်ဆားရည်ဖျော်တဲ့အခါ သန့်ရှင်းတဲ့ရေနဲ့ဖျော်စပ်ဖို့လိုသလို သန့်ရှင်းတဲ့ ဇွန်း၊ ပန်းကန်/ခွက် တို့ကိုသာ သုံးပါ။
ရေဓာတ်ဆုံးရှုံးခြင်းရဲ့ လက္ခဏာတွေကတော့
- ဆီးသွားနည်းခြင်း (တစ်ရက်ကို နှစ်ကြိမ်-သုံးကြိမ်ထက်နည်းတာ)
- တက်ကြွမှုမရှိဘဲ မှိန်းနေခြင်း
- ပါးစပ်ခြောက်သွေ့နေခြင်း
- ငိုသော်လည်း မျက်ရည်မထွက်နိုင်ခြင်း
- ကလေးရဲ့ငယ်ထိပ်ချိုင့်ဝင်နေခြင်း
တကယ်လို့ လက္ခဏာတွေက ပိုပြီးဆိုးလာရင် ဒါမှမဟုတ် နှစ်ရက်-သုံးရက်အတွင်း မသက်သာလာဘူးဆိုရင် ဆေးရုံ/ ဆေးခန်းသွားဖို့ လိုအပ်ပါတယ်။
ဤ ရွှေမေမေကဏ္ဍရှိ အကြောင်းအရာများသည် ကျန်းမာရေးနှင့် အားကစားဝန်ကြီးဌာနမှ အသိအမှတ်ပြုထားသည့် ခွင့်ပြုချက်ရရှိထားပါသည်။
