05/03/2022
! သတိ ! ခုချိန်မှာ ဖျားနေတယ် ဒါပေမယ့် အကြောင်းအမျိုးမျိုးကြောင့် ဆေးလည်းမစစ်နိုင်ဘူး ဆေးခန်းလည်းမပြနိုင်ဘူးဆိုရင် ဒီစာလေးကို အဆုံးထိ သေချာဖတ်ကြည့်ပါ။
အခုချိန်မှာ နှာပဲစေးစေး၊ ချောင်းပဲဆိုးဆိုး၊ အသံပဲဝင်ဝင် တရားခံကတော့ Omicron ပဲဖြစ်နိုင်ပါတယ်။
🔅 omicron မှန်း ဘယ်လိုသိနိုင်မလဲဆိုရင်
➢ ဖျားမယ်၊
➢ ချမ်းတုန်မယ်၊
➢ နှာစေးမယ်၊ နှာပိတ်မယ်၊
➢ လည်ချောင်းနာမယ်၊ ချောင်းဆိုးမယ်၊
➢ ခေါင်းကိုက်မယ်၊ ကိုယ်လက်တွေကိုက်ခဲမယ် စတဲ့ လက္ခဏာတွေထဲက အနည်းဆုံး၂ခုလောက်ခံစားနေရပြီဆိုရင် omicron ကူးစက်ခံရတာသေချာသလောက်ရှိပါပြီ။ အချို့ကတော့ အစားအသောက်ပျက်တာ၊ ဝမ်းလျှောဝမ်းပျက်တာတွေလည်းခံစားရနိုင်ပါတယ်။ Omicron မှာ အနံ့အရသာပျောက်တာမျိုးက အတွေ့ရနည်းပါတယ်။
🔅 ဘာဆေးတွေသောက်ရမလဲ။
ဆေးကတော့ မိမိခံစားရတဲ့လက္ခဏာတွေအလိုက် သောက်ပေးရမှာဖြစ်ပါတယ်။
အဖျားကျစေဖို့အတွက်ဆိုရင် paracetamol 500mg ပါဝင်တဲ့ Biogesic တို့ Paracap တို့သောက်ပေးလို့ရပါတယ်။ အဖျားမကျမချင်း တစ်နေ့ ၃ကြိမ်မှ ၄ကြိမ်ထိ အစားစားပြီး သောက်သုံးပေးရပါမယ်။
နှာစေးနှာပိတ်ဖြစ်နေပြီဆိုရင် Cetrine သို့မဟုတ် Burmeton ကိုတစ်နေ့ ၂ကြိမ်ထိသောက်ပေးနိုင်ပါတယ်။
ချောင်းဆိုးနေပြီဆိုရင်တော့ သလိပ်သံပါမပါ သိဖို့လိုပါတယ်။ Musol လိုဆေးမျိုးကို သလိပ်ပါတဲ့ချောင်းမှ သောက်ပေးရမှာဖြစ်ပါတယ်။ Musol လိုဆေးမျိုးကတော့ ပထမဦးဆုံး သလိပ်ကိုပျော်အောင်လုပ်တာဖြစ်တဲ့အတွက် ချောင်းကို ပိုဆိုးစေမှာဖြစ်ပါတယ်။ ဒါကြောင့် ချောင်းခြောက်ဆိုးတဲ့သူတွေက Musol သွားသောက်လို့မရပါဘူး။ ချောင်းခြောက်ဆိုးနေရင် atussin လိုဆေးမျိုးသောက်ပေးရမှာဖြစ်ပါတယ်။ Brochest လိုဆေးမျိုးဆိုရင်တော့ ချောင်းခြောက်ဆိုးသူရော၊ သလိပ်ချောင်းဆိုးသူတွေအတွက်ရောသင့်တော်ပါတယ်။
Omicron ဖြစ်ရင် လည်ချောင်းနာအသံဝင်တာတော်တော်ဆိုးလွန်းလို့ ဇော်ဝင်းထွဋ်အသံတွေ ၊ ပပဝင်းခင်အသံတွေဖြစ်ကုန်ကြပြီလို့ပြောကြပါတယ်။ လည်ချောင်းတွေနာရင် mybacin သို့မဟုတ် strepsils ကိုတစ်နေ့ ၄ကြိမ်ငုံပေးနိုင်ပါတယ်။ ဆားရည်နဲ့ပလုတ်ကျင်းပေးဖို့လည်း မမေ့ကြပါနဲ့နော်။
ကိုယ်လက်တွေကိုက်ခဲနေပြီ၊ ခေါင်းတွေလည်းကိုက်နေပြီဆိုရင်တော့ ibuprofen 200mg or 400mg ကိုတစ်နေ့၃ကြိမ်သောက်သုံးပေးနိုင်ပါတယ်။ Ibuprofen ဟာ paracetamol ထက်ပြင်းတဲ့ အကိုက်အခဲပျောက်ဆေးဖြစ်တဲ့အတွက် ဆေးမသောက်ခင် အစားကိုသေချာစားပြီးမှ သောက်ပေးရမှာဖြစ်ပါတယ်။ အစာအိမ်ကိုမထိခိုက်ရအောင် ပိုစိတ်ချချင်တယ်ဆိုရင်တော့ Omeprazole သို့မဟုတ် ranitidine တစ်နေ့နှစ်ကြိမ်နဲ့ တွဲသောက်ပေးလို့ ရပါတယ်။
ဝမ်းပျက်နေပြီဆိုရင်တော့ Nova-lact သို့မဟုတ် Bioflor သောက်သုံးပေးလို့ရပါတယ်။
အန်ပါအန်နေပြီဆိုရင်တော့ metoclopramide ပါဝင်တဲ့ အအန်ပျောက်ဆေးတွေ သောက်သုံးပေးနိုင်ပါတယ်။
ခုခံအားကောင်းဖို့အတွက်တော့ တစ်နေ့ကို Vitamin C 500mg သောက်သုံးပေးပါ။ Vitamin D သောက်သုံးမယ်ဆိုရင်တော့ တစ်နေ့ကို 1000mg ထက်မကျော်သင့်ပါ။ Vitamin D ကို လိုအပ်တာထက်ပိုသောက်မိရင် ကျောက်ကပ်ပျက်စီးစေနိုင်ပါတယ်။
🔅 Antibiotics သောက်ဖို့လိုလား။
မလိုပါ။ Antibiotics ဆိုတာ ဘက်တီးရီးယားတွေကိုသာ သတ်နိုင်ပါတယ်။ Omicron က ဗိုင်းရပ်စ်ပိုးဖြစ်တဲ့အတွက် antibiotics သောက်ရင် အနာတခြားဆေးတခြားလိုဖြစ်ပြီး အကျိုးမရှိနိုင်ပါဘူး။
🔅 အခုအတွေ့ရများနေတဲ့ Molnupiravir ဆိုတာကရောဘာဆေးလဲ။ အဲ့တာရော သောက်ဖို့လိုလား။
Molnupiravir ဆိုတာဟာ ဗိုင်းရပ်စ်သတ်ဆေးတစ်မျိုးဖြစ်ပါတယ်။ ရောဂါမပြင်းထန်သူ လူငယ်တွေကတော့ မသောက်လည်းရပါတယ်, အောက်စီဂျင်ကျနိုင်ခြေရှိတဲ့ အသက်အရွယ်ကြီးပြီးရောဂါအခံရှိတဲ့သူတွေသာ သောက်ဖို့ လိုအပ်တာဖြစ်ပါတယ်။ သောက်တဲ့အခါမှာလည်း မိမိသဘောနဲ့မိမိသောက်လို့ မရပါဘူး။ ဆရာဝန်နဲ့တိုင်ပင်ပြီး ဆရာဝန်ညွန်ကြားချက်နဲ့မှ Molnupiravir ကို သောက်ရမှာဖြစ်ပါတယ်။ ဒါ့အပြင် ဒီဆေးဟာ လက္ခဏာစပြပြချင်း ၅ရက်အတွင်းဘဲ စပေးရမှာဖြစ်ပါတယ်။ နောက်ပိုင်းမှပေးမိရင် ထိရောက်မှာမဟုတ်ပါဘူး
🔅 မိမိက အရင်ကလည်း covid တစ်ခါဖြစ်ဖူးတယ်၊ ကာကွယ်ဆေးလည်း ၂ကြိမ်ထိုးထားတယ်ဆိုရင်တော့ ဒီတစ်ကြိမ် ထပ်ဖြစ်ရင်လည်း ရောဂါလက္ခဏာအနည်းငယ်သာခံစားရပြီး သက်သာသွားမှာဖြစ်ပါတယ်။ စဖြစ်ဖြစ်ချင်း ၂ရက်ခန့်ကတော့ ပိုမိုခံစားရနိုင်ပါတယ်။ Covid လည်းမဖြစ်ဖူး၊ ကာကွယ်ဆေးလည်းမထိုးဖူးသူတွေကတော့ ရောဂါလက္ခဏာတွေကို ပိုမိုခံစားရနိုင်ပါတယ်။ သို့သော်လည်း အောက်စီဂျင်ကျတာမျိုးတော့ အလွန်ရှားပါးပါးတယ်။ 3rd wave မှာ အောက်စီဂျင်ကျပြီး လူတော်တော်များများကို သေစေခဲ့တဲ့ delta variant ဟာ အဆုတ်ကို အဓိကတိုက်ခိုက်တာဖြစ်ပြီး ယခု omicron variant ကတော့ အသက်ရှူလမ်းကြောင်းအပေါ်ပိုင်းကိုသာ အဓိကတိုက်ခိုက်တာဖြစ်ပါတယ်။ ဒါကြောင့် နှာစေး၊ နှာပိတ်၊ လည်ချောင်းနာခြင်းတွေကို ပိုမိုခံစားကြရတာဖြစ်ပါတယ်။
🔅 မည်သို့ပင်ဖြစ်စေ အသက်ကြီးသူတွေ၊ ရောဂါအခံရှိသူတွေအနေနဲ့ကတော့ SpO2 level ကို မကြာခဏတိုင်းပေးထားရင် အကောင်းဆုံးဖြစ်ပါတယ်။ ပုံမှန် SpO2 99/100 ရှိနေကြလူက 95 အောက်ရောက်သွားပြီဆိုတာနဲ့ ဆရာဝန်ဆီ မြန်မြန်ပြသသင့်ပါတယ်။
🔅 Omicron ကအရသာလုံးဝပျက်တာမျိုး ရှားပေမယ့် အစားအသောက်ပျက်တာမျိုးတွေဖြစ်တတ်ပါတယ်။ Ibuprofen လိုဆေးမျိုး သောက်ထားပြီးရင်လည်း လျှာခါးနေပြီး အရသာမမှန်တာမျိုးတွေဖြစ်တတ်ပါတယ်။ Covid ဆိုရင် အစားနဲ့စိတ်နဲ့အဓိကနိုင်အောင် တိုက်ရတာဖြစ်လို့ အာဟာရပြည့်ဝစွာရရှိအောင် အစားကို မဖြစ်မနေဝင်အောင်စားပေးရမှာဖြစ်ပါတယ်။
🔅 Omicron ဖြစ်နေချိန် မိမိအတွက်ရော၊ သူများတွေမကူးစက်ဖို့အတွက် အိမ်မှာဘဲ သီးသန့်ခွဲနေပြီး အနားယူနေထိုင်သင့်ပါတယ်။
ရောဂါလက္ခဏာကလည်း မပြင်းထန်ဘူး၊ ဖျားတာလည်း မရှိဘူးဆိုရင် သီးသန့်ခွဲနေခြင်း(ကွာရန်တင်း)ကို (၅)ရက်နဲ့ ထွက်လို့ရပါတယ်, ဒါပေမဲ့ အိမ်မှာရော အပြင်မှာရော နောက်ထပ်(၅) ရက်ခန့် Mask သေချာတပ်ပြီး လူအများနဲ့ နီးကပ်လွန်းတဲ့ အခြေအနေတွေကို ရှောင်ကြဥ်ပေးပါ။
( သတင်းကောင်းလို့ ဆိုရမှာကတော့ Omicron ကူးစက်ခံရပြီးလို့ ထွက်လာတဲ့ကိုယ်ခံအားဟာ delta variant ကိုကာကွယ်နိုင်သလို နောင်အသစ်ပေါ်လာနိုင်တဲ့ covid variant အတွက်လည်း ကာကွယ်နိုင်စွမ်း ရှိနေမှာဖြစ်ပါတယ်။ ဒါကြောင့် Omicron ဖြစ်ပြီး antibody လဲထွက်ပြီဆိုရင် နောင်လာမယ့်လှိုင်းတွေကို ကြောက်စရာမလိုတော့ပါဘူး။ )
Omicron variant ဟာ နောက်ဆုံး covid လှိုင်းလဲ ဖြစ်နိုင်တယ်လို့ ပညာရှင်တွေကဆိုကြပါတယ်။ ဒါကြောင့် omicron ဆီကနေ antibodies တွေရယူရင်း နောက်ဆုံး covid လှိုင်းကြီးကို အတူတကွတိုက်ထုတ်လိုက်ကြပါစို့။
