15/02/2026
မရမ်းကုန်းမှာ အိမ်မီးလောင်ပြီး အသက်ကြီးပိုင်း ညီအစ်မနှစ်ယောက် သေဆုံး
ဖေဖော်ဝါရီ ၁၅ ၊ ၂၀၂၆
ရန်ကုန်တိုင်း ၊ မရမ်းကုန်းမြို့နယ်၊ အမှတ်(၂)ရပ်ကွက်၊ အောက်ဗဟိုလမ်းမှာ ဒီကနေ့ ဖေဖော်ဝါရီ ၁၅ ရက်နေ့ မနက်ပိုင်းက နေအိမ်တအိမ် မီးလောင်မှုဖြစ်ပွားပြီး အမျိုးသမီးနှစ်ယောက်သေဆုံးခဲ့တယ်လို့ သိရပါတယ်။
ဒီကနေ့ မနက်အစော ၃ နာရီ ၃၇ မိနစ် လောက်မှာ စတိုးဆိုင်ဖွင့်ထားတဲ့ နေအိမ်မှာ မီးလောင်ကျွမ်းမှုဖြစ်ပွားခဲ့တာ ဖြစ်ကြောင်း ၊ မီးလောင်မှုအတွင်းမှာ အဆိုပါ နေအိမ်ပိုင်ရှင်တွေဖြစ်တဲ့ အသက်ကြီးပိုင်း ညီအစ်မနှစ်ယောက် သေဆုံးခဲ့တာလို့ သိရပါတယ်။
" အိမ်နဲ့ဆိုင် တွဲထားတဲ့အိမ်ပါ ။ အမျိုးသမီးနှစ်ယောက်က အထဲမှာပဲဆုံးနေတာ ။ သူတို့က အသက်တွေကြီးနေပါပြီ ၆၀ ကျော်လောက်တွေလို့ သိရတယ်။ မီးလောင်တာက အိမ်အပေါ်ထပ်ကနေ စလောင်တယ်လို့ပဲ ပြောကြတယ်။ ဘယ်ကဘယ်လို ဖြစ်လဲဆိုတာတော့ အတိကျမသိရသေးဘူး ။ " လို့ မြေပြင်ကူညီကယ်ဆယ်ရေး ဆောင်ရွက်ခဲ့တဲ့ ရွှေရောင်သမိုင်း လူမှုကယ်ဆယ်ရေး အသင်းဝင်တယောက်က ပြောပါတယ်။
မီးလောင်မှုအတွင်း သေဆုံးခဲ့တဲ့ အမျိုးသမီးနှစ်ယောက် ရုပ်အလောင်းကိုတော့ အင်းစိန်ဆေးရုံကြီးကို ပို့ဆောင်ထားတယ်လို့ သိရပါတယ်။
မီးလောင်မှုကိုတော့ မရမ်းကုန်းမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ ရေသယ်ယာဉ်(၁)စီး၊ လှိုင်မြို့နယ်မီးသတ်စခန်းမှ မီးသတ်ယာဉ်(၁)စီး နဲ့ ရွှေရောင်းသမိုင်းလူမှုကယ်ဆယ်ရေးအသင်းတို့က ပူးပေါင်းငြိမ်းသတ်ခဲ့တာ ဖြစ်တယ်လို့ သိရပါတယ် #ရန်ကုန် #မရမ်းကုန်း #အိမ်မီးလောင် #အမျိုးသမီးနှစ်ယောက်သေဆုံး
