15/03/2022
#မိခင်ဖြစ်လာပြီးနောက်မှာအတိုက်အခံတွေလုပ်တတ်လာပါသလား?
အရင်ခေတ်တုန်းကတော့ ရှေးအယူအဆတွေအများကြီးရှိခဲ့ကြတယ်။
🔺အမျိုးသမီးဟာ မီးဖွားပြီးရင် အစားအစုံမစားရဘူး။ အဖြူထည်ပဲစားရမယ်။
✅နို့တိုက်မိခင်ကအစာအာဟာရအစုံမစားရင် အာဟာရချို့တဲ့မှာပေါ့။ အဲဒီကျမှ ကလေးရောအမေပါ Vitamin နဲ့ Protein ဓာတ်ချို့တဲ့ပြီး ကျန်းမာရေးထိခိုက်မှာ။
_______
🔺မီးဖွားပြီးရင်ဆပ်ပြာမကိုင်ရဘူးနော်။ နူတတ်တယ်။
✅မီးဖွားပြီးရင် တကိုယ်ရည်သန့်ရှင်းရေးကို ပိုတောင်ဂရုစိုက်ရဦးမယ်။ သားဖွားမီးယပ်ဆရာဝန်ကြီးတွေကတောင်မှ မီးဖွားပြီးတာနဲ့ ရေချိုးနိုင်တယ်...ခွဲတဲ့ဒဏ်နာက သက်သာရင်ခေါင်းလျှော်နိုင်တယ်လို့မှာထားတာ။ နူတယ်ဆိုတာ Leprosy ရောဂါ။ ဆပ်ပြာနဲ့ဘာမှမဆိုင်ပါ။
________
🔺မီးဖွားပြီးရင်တစ်ကိုယ်လုံးနနွင်းလိမ်းရမယ်။ ဒါမှသွေးသန့်မယ်။
✅အမေကနနွင်းတွေလိမ်းထားတော့ ကလေးနို့တိုက်ရင်းချီတဲ့အခါ ကလေးကိုယ်ကိုဆနွင်းတွေပေပြီး ရောဝါကုန်မှာပေါ့။ အဲတော့ ကလေးအသားဝါရင်တောင် နနွင်းကြောင့်လား တကယ်ဝါတာလားခွဲမရဘူးဖြစ်ပြီး အသိတွေနောက်ကျကုန်ရော။ အမျိုးသမီးတွေမှာ သွေးသန့်တယ်/မသန့်ဘူးဆိုတာမရှိဘူး။
_________
🔺ကလေးကို မွေးဆံပင်နဲ့မထားနဲ့။ ဘုန်းနိမ့်တတ်တယ်။ မွေးဆံပင်နဲ့ထားရင် ဆံပင်လည်းမသန်ဘူး။
✅မွေးစကနေ ၆လအထိ ကလေးကိုခေါင်းလုံးဝမရိတ်ရဘူး။ မတော်တဆဓားထိပြီး ပိုးဝင်ရင် ကလေးအသက်အန္တရာယ်ထိဖြစ်နိုင်တယ်။ ဆံပင်သန်ခြင်းမသန်ခြင်းက ခေါင်းရိတ်တာနဲ့မဆိုင်ဘူး။
_________
🔺ကလေးချက်ထဲကို အုပ်ဆေးလေးထည့်လိုက်လေ အနာကျက်လွယ်အောင်!
✅ကလေးချက်က မွေးပြီး ၁၀ရက်ကျော်ရင် အလိုလိုခြောက်ပြီးကြွေတယ်။ ချက်ထဲကို ဘာမှမထည့်ရဘူးလို့ ဆရာဝန်မှာထားတယ်။ ပိုးဝင်ပြီးဖျားတတ်တယ်။
ဒီလိုပြန်ပြောတတ်ကြတဲ့၊ ပတ်ဝန်းကျင်ကို အတိုက်အခံလုပ်ခဲ့ကြတဲ့ မေမေတွေရှိပါသလား...
တကယ်တော့ ဒီလိုမေမေတွေတကယ်လိုအပ်ပါတယ်။
ကျွန်မတို့ဟာ လွဲမှားတဲ့ကျန်းမာရေးအသိတွေကို တွန်းလှန်ပစ်ဖို့တာဝန်ရှိပါတယ်။ ဒီလိုပြန်တွန်းလှန်နိုင်ဖို့ဆိုတာလည်း ဖေဖေ၊ မေမေတို့အနေနဲ့ သူများစကားမှာလမ်းမဆုံးဖို့လိုအပ်ပါတယ်။ စာများများဖတ်ထားရပါမယ်။ လွဲမှားတဲ့အယူအဆတွေ လာပြောရင်၊ လုပ်ဖို့တွန်းအားပေးရင် ချက်နဲ့လက်နဲ့ပြန်လည်ဖြေရှင်းတတ်ဖို့လိုပါတယ်။
လူကြီးတွေပြောနေကျစကားရှိတယ်မဟုတ်လား။
ခုခေတ်ကလေးတွေကဉာဏ်ပိုကောင်းကြတယ်တဲ့။
ဒါဟာအဖြေပါပဲ။
အရင်ကနဲ့မတူတဲ့ အတွေးအခေါ်မှားတွေ၊ အယူအဆမှားတွေကို ပြင်ဆင်လိုက်ကြလို့ ခုခေတ်ကလေးတွေရဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာဟာ အရင်ထပ်ပိုတိုးတက်လာကြတာပါ။
ကျွန်မတို့ဘက်ကနေ မှန်ကန်တဲ့ကျန်းမာရေးအသိတွေကိုအမြဲဝေမျှပေးပါမယ်။
မေမေတို့ဘက်ကလည်း စာတွေဖတ်ရှုပြီး မမှန်ကန်တဲ့အယူအဆတွေကို ပြန်တွန်းလှန်ဖို့ကြိုးစားပေးပါ။
ကျွန်မဟာ မိခင်တစ်ဦးအနေနဲ့လည်း အယူအဆအမှားတွေကို ဘယ်သူ့ကိုမဆိုချေပတတ်သလို ပတ်ဝန်းကျင်ကမိခင်တွေအတွက်လည်း အမြဲအားပေးနေမှာဖြစ်ပါတယ်❤️
အားလုံးကျန်းမာပျော်ရွှင်ကြပါစေ။
မောင်(ဆေး-၁)မာမီ
✅စာများကို လွတ်လပ်စွာ share နိုင်ပါတယ်။ ခွင့်ပြုချက်တောင်းရန်မလိုပါ။
❗️တစ်ဆင့်ပြန်လည်ကူးယူခြင်းမပြုရန်မေတ္တာရပ်ခံပါတယ်။
