20/08/2025
လမ်းကြောင်း အခြေအနေတွေ မထူးသေးပါဘူးနော် 😞
June 29-30 တစ်ချို့နဲ့ july အစ order တွေက စပြီး အကုန် မဝင်သေးပါဘူးရှင် 😢
အားနာနာနဲ့ပဲ ထပ်စောင့်ပေးကြဖို့ မေတ္တာရပ်ခံပါတယ်နော် 🙏🏻
မင်မင်တို့လည်း ဘာမှလုပ်လို့ မရတဲ့ အခြေအနေမို့ပါ 😞
မြန်မာ-ထိုင်း ချစ်ကြည်ရေးတံတားအမှတ် (၂) ယာယီပိတ်၊ တင်သွင်းကုန်များ သက်တမ်းကုန်ပါက ထိုင်းက နိုင်ငံပိုင် သိမ်းနိုင်
မောင်ခက်နွေ
မဇ္ဈိမ ။ ။ ကရင်ပြည်နယ်၊ မြဝတီမြို့နယ်နှင့် ထိုင်းနိုင်ငံ၊ မဲဆောက်မြို့အား ဆက်သွယ်ထားသည့် မြန်မာ-ထိုင်း ချစ်ကြည်ရေးတံတားအမှတ် (၂) ကို စစ်အုပ်စု၏ ညွှန်ကြားချက်အရ ယနေ့ (ဩဂုတ်လ ၁၈ ရက်) မှ စ၍ ယာယီပိတ်ထားကြောင်း မြဝတီမြို့နယ်အုပ်ချုပ်ရေးနှင့် နီးစပ်သူတဦးက မဇ္ဈိမသို့ ပြောသည်။
“"ကုန်စည်ကြောင့် ရော၊ နယ်မြေလုံခြုံရေးအရကြောင့်ကော ပိတ်တာ” ဟု ၎င်းက ဆိုသည်။
ယခင်ရက်ပိုင်းများတွင် မြန်မာပြည်အောက်ပိုင်းမှ သင်္ဘောဖြင့် လိုင်စင်မဲ့ကုန်စည်များ ဝင်ရောက်လာသဖြင့် ဖမ်းဆီးမှုများရှိခဲ့ပြီး၊ ထိုကုန်စည်များသည် မြဝတီနယ်စပ်မှ ပြန်လှည့်ဝင်ရောက်လာခြင်းဖြစ်ကြောင်း ၎င်းက ရှင်းပြသည်။ တံတားကို မည်သည့်အချိန်တွင် ပြန်ဖွင့်မည်ကိုမူ မသိရသေးပါ။
လိုင်စင်မဲ့ကုန်စည်များသည် ရေလမ်းခရီးတွင် ဖမ်းဆီးခံရပြီး မြဝတီနယ်စပ်မှ ပြန်ဝင်ရောက်လာခြင်းဖြစ်ကြောင်း လဝကနှင့် နီးစပ်သူတဦးက ပြောသည်။ ထို့ပြင် အေးဂျင့်အချင်းချင်း တိုင်ကြားမှုများကြောင့်လည်း ယခုလို ယာယီပိတ်ခြင်းဖြစ်နိုင်သည်ဟု ၎င်းက ဆက်လက်ပြောသည်။
မဲဆောက်တွင် ကုန်တင်ကားများ ပိတ်မိနေသည်မှာ ယနေ့ဆို ၁၂ ရက်ခန့်ရှိပြီဖြစ်ပြီး၊ တရက်လျှင် ကုန်ကျစရိတ် ကျပ် ၅၀၀,၀၀၀ ခန့်ရှိသဖြင့် လက်ရှိတွင် သယ်ယူစရိတ် ကျပ်သိန်း ၅၀ ခန့် ပိုမိုကုန်ကျနေသည်ဟု ကုန်သည်များထံမှ သိရသည်။
တံတားပိတ်ထားမှုကြောင့် ကုန်တင်ကားရာနှင့်ချီပိတ်မိနေပြီး၊ စားသောက်ကုန်၊ လူသုံးကုန်၊ ဆောက်လုပ်ရေးနှင့် လျှပ်စစ်ပစ္စည်းများ သယ်ဆောင်ထားသည့် ကားများပါဝင်သည်။ စစ်အုပ်စုက တရားမဝင်ကုန်သွယ်မှုတိုက်ဖျက်ရေးဟုဆိုကာ ကုန်စည်များကို စစ်ဆေး၊ ဖမ်းဆီးနေသဖြင့် တရက်လျှင် ကုန်တင်ကား ၂၀ မှ ၃၀ စီးခန့်သာ မြန်မာဘက်သို့ ဝင်ရောက်ခွင့်ရရှိသည်။
ဆက်လက်ပိတ်မိနေပါက သယ်ယူစရိတ်များ မြင့်တက်လာမည်ဖြစ်ပြီး၊ ထိုင်းမှ တင်သွင်းသည့် ကုန်စည်များ၏ စျေးနှုန်းများ ပြည်တွင်းတွင် မြင့်တက်လာနိုင်သည်ဟု ကုန်သည်များက ပြောသည်။ ဥပမာအားဖြင့်၊ ရန်ကုန်တွင် LUX ရေချိုးဆပ်ပြာရည်ဘူးတဘူး၏ စျေးနှုန်းမှာ ကျပ် ၁၀,၀၀၀ မှ ၁၅,၀၀၀ သို့ တက်လာသည်ဟု ရန်ကုန်မြို့ခံတဦးက ဆိုသည်။
ထို့ပြင်၊ ထိုင်းနိုင်ငံ၏ ဥပဒေအရ တင်သွင်းကုန်များကို တလသာ ခွင့်ပြုထားပြီး၊ ထိုသက်တမ်းကုန်ဆုံးပါက ကုန်စည်များကို နိုင်ငံပိုင်အဖြစ် သိမ်းဆည်းနိုင်သည်ဟု ကုန်သည်များက ပြောသည်။ ထိုသို့ သိမ်းဆည်းခံရပါက ကုန်သည်များအနေဖြင့် ၎င်းတို့၏ ကုန်စည်များကို လေလံမှတဆင့် ပြန်လည်ဝယ်ယူရမည်ဖြစ်သည်။
ယခုအခါ ကုန်သည်များသည် ပိတ်မိနေသည့် ကုန်စည်များကို သောင်ရင်းမြစ်လှေဂိတ်များမှ တင်သွင်းနိုင်ရန် ထိုင်းအာဏာပိုင်များနှင့် ညှိနှိုင်းနေသော်လည်း၊ ထိုနည်းဖြင့် သယ်ယူပါက ကုန်ကျစရိတ် နှစ်ဆမြင့်တက်နိုင်သည်ဟု ဆိုသည်။
စစ်အုပ်စုက တရားမဝင်ကုန်သွယ်မှုတိုက်ဖျက်ရေးဟု ဆိုကာ ယခုလို ပိတ်ဆို့မှုများသည် ပြည်သူလူထုအား စားဝတ်နေရေး အခက်အခဲဖြစ်စေရန် ရည်ရွယ်သည့် ဖိနှိပ်မှုတမျိုးဖြစ်သည်ဟု မြဝတီမြို့ခံတဦးက သုံးသပ်သည်။
စာတည်း။ ။ နောင်နောင်
#မြန်မာ
#ထိုင်း
#အမှတ်၂တံတား
#ကုန်ကားများပိတ်မိ
