27/01/2021
⚖️ ဟန်ချက် ညီဖို့လိုတယ် ⚖️
✔ အလိုမကျတိုင်း ရန်ရှာနေရင်
လူမိုက် ဖြစ်သွားလိမ့်မယ်။
✔ စိတ်ညစ်တိုင်း အရက်သောက်နေရင်
အရက်သမား ဖြစ်သွားတတ်တယ်။
✔ အခက်အခဲတွေ့တိုင်း ညည်းတွားနေရင်
အောင်မြင်မှုဆိုတဲ့လမ်း
ပျောက်သွားတတ်တယ်။
✔ အရာရာကို မကောင်းမြင်နေရင်
အဆိုးမြင်ဝါဒီလို့ ခေါ်ခံရလိမ့်မယ်။
✔ အကောင်းမြင်စိတ် ထားတာပါဆိုပြီး
မကောင်းတာကို
အကောင်းလုပ်ပြောနေရင်လည်း
ငပေါကြီး ဖြစ်တတ်တယ်။
✔ ကောင်းတာလေးတွေကို ချီးမွမ်းပြီး
မကောင်းတာတွေကို
ဖုံးကွယ်ထားပြန်လည်း
“မတရားသောဘက် လိုက်သူ" လို့
ပြောခံရလိမ့်မယ်။
✔ ငါလုပ်ဖို့ စောနေသေးတယ်,
အချိန်အများကြီး ကျန်ပါသေးတယ်လို့
တွေးနေရင်လည်း
နောက်ကျသွားတတ်တယ်။
အရာရာဟာ နောက်ကျသွားပြီ,
ဘာမှမလုပ်နိုင်ဘူးလို့
ခံယူလိုက်တာကလည်း
ဘဝကို အရှုံးပေးလိုက်ရာ ကျတယ်။
✔ ဘဝဆိုတာ
ဝမ်းနည်းစရာပဲလို့ အမြဲထင်နေရင်
ပျော်ရွှင်မှုကို ရှာတွေ့မှာ
မဟုတ်ပြန်ပါဘူး။
✔ အရာရာဟာ
ငါ့အတွက်ချည်းပဲဆိုရင်လည်း
အတ္တကြီးရာ ကျတာပေါ့။
အရာရာဟာ
ငါ့အတွက်မဟုတ်ပါဘူးဆိုပြီး
မှိုင်နေရုံပဲ ရှိတာပေါ့လို့ ထင်လိုက်တာနဲ့
စိတ်ကျဝေဒနာရှင် ဖြစ်သွားလိမ့်မယ်။
✔ ဘဝဆိုတာ တစ်စုံတစ်ယောက်က
သတ်မှတ် ပြဋ္ဌာန်းပြီးသား,
ဒါမှမဟုတ် အတိတ်ကံကသာ
ချယ်လှယ်နေတယ်လို့ ယူဆလိုက်ရင်
ပစ္စုပ္ပန်မှာ ရှုံးနိမ့်သွားလိမ့်မယ်။
✔ ဘဝပျက်တယ် ယူဆရင်တော့
ကံ,ကံ၏အကျိုး ပယ်ရာကျပြီး
တစ်ဘဝစာအတွက်
မလုပ်သင့်တာတွေ
လုပ်မိသွားလိမ့်မယ်။
✔ သူများပြောတိုင်း ယုံနေရင်လည်း
အလိမ်ခံရတတ်တယ်။
ငါမြင်ရ,ငါတွေ့ရမှ,
ငါကိုယ်တိုင်ကြုံဖူးမှ
လက်ခံမယ်ဆိုရင်လည်း
ကိုယ့်အဖေအမေတောင်
ဟုတ်ပါ့မလား" လို့
သံသယ ဝင်သွားနိုင်တယ်။
✔ ခန္ဓာကြီးက
ဘာမှမဟုတ်ဘူး,
မုန်းစရာကြီးပါဆိုပြီး
မစားမသောက် မပြုမပြင် ဂရုမစိုက်ပဲ
ပစ်စလက်ခတ် နေလိုက်ရင်လည်း
ဒုက္ခဖိစီးပြီး အကျိုးမများနိုင်ပြန်ဘူး။
✔ ခန္ဓာကြီး တွယ်တာ,မက်မောပြီး
အိုဟောင်းသွားတာတွေကို နှမြော
နေပြန်ရင်လည်း
စိတ်သောက ဖိစီးပါလိမ့်မယ်။
🗝 သော့လေးတစ်ချောင်း ရှိတယ်
အဲ့ဒီ သော့လေးနာမည်က
အလယ်အလတ်လမ်းစဉ်" တဲ့။
✔ တကယ်တော့ ခန္ဓာကိုယ်ကြီးကို
မုန်းတီးနေရမှာ, ရွံရှာနေရမှာ မဟုတ်ပါဘူး
စွဲလမ်းနေရမှာလည်း မဟုတ်ပါဘူး။
ရုပ်တရားရဲ့ ဖြစ်ပျက်ပြောင်းလဲပြီး
သူ့သဘော သူဆောင်နေတာလေးတွေ
ရှု့မှတ်ပြီး
အမြဲ မရှိနိုင်ပါလားလို့
မြင်တတ်တာကမှ
ဉာဏ်အလင်းပါ။
✔ ဘဝပျက်တယ်, ဆက်တယ်ဆိုပြီး
တထစ်ချကြီး အစွန်းရောက်မနေပါနဲ့။
✔ အတိတ်နဲ့ အနာဂတ်ကြားက
ပစ္စုပ္ပန်မှာသာ ကောင်းအောင်လုပ်ပါ၊
အဲ့ဒီ့အခါ
ကျန်ခဲ့တဲ့အတိတ်လည်း ကောင်းပြီး
နောင်လာမယ့် ပစ္စုပ္ပန်အလောင်းအလျာ
အနာဂတ်ကလည်း လှပနေမှာပါ။
✔ သူများပြောတိုင်း
ခေါင်းငြိမ့်နေဖို့ မလိုသလို
ငါမဟုတ်ဖူးဆိုပြီး
ခေါင်းခါဖို့ချည်းပဲ မလိုပါဘူး။
✔ အကြောင်းအကျိုးတွေ
ဝေဖန်ဆန်းစစ်ပြီး
ဟုတ်နိုင်သည်/မဟုတ်နိုင်သည်
ဆုံးဖြတ်ပါ။
“အရာရာဟာ
ငါ့အတွက် သူ့အတွက်ပါလား" လို့
မြင်တတ်ပါစေ။
✔ တရားသေ သတ်မှတ်ပြီးသား မဟုတ်သလို
ကိုယ်ပြုတဲ့ ကံတိုင်းဟာ အရာမထင်,
အထောက်အပံ့မရှိတာ မဟုတ်ပြန်ပါဘူး။
ပြုပြင်ပြောင်းလဲလို့ ရတယ်ဆိုတာ
နားလည်ပေးပါ။
✔ နောက်ကျနေပြီ စောနေသေးတယ်
မသတ်မှတ်ပါနဲ့ ၊
ကောင်းမယ်ဆိုရင် ထလုပ်လိုက်ပါ။
✔ ကောင်းတာကိုလဲ မပစ်ပယ်ပါနဲ့ ၊
မကောင်းတာကိုလဲ မဖုံးကွယ်ပါနဲ့၊
ကောင်းတာကို ချီးမွမ်းပြီး
မကောင်းတာကို
ထောက်ပြဝေဖန် ပြုပြင်ပေးပါ။
✔ အခက်အခဲ တွေ့တိုင်း
စိတ်ပျက်အားလျော့စရာမလိုသလို၊
“ အခက်အခဲကိုလည်း
အခက်အခဲ မဟုတ်ပါဘူး" ဆိုပြီး
ပေါ့လျော့လို့ မရပြန်ပါဘူး။
အခက်အခဲကို
ဘယ်လိုကျော်လွှားရမလဲ,
ဖြေရှင်းဖို့လုပ်တာက
အသင့်တော်ဆုံးပါ။
✔ အလိုမကျတိုင်း ရန်ရှာနေလို့
အလိုမကျမှုကို အောင်နိုင်မှာ
မဟုတ်ပါဘူး။
အလိုမကျမှုကို သည်းခံတတ်မှ
ငြိမ်းချမ်းမှုဆိုတဲ့
အောင်မြင်မှုကို ရရှိမှာပါ။
ဘယ်တော့မှ အစွန်းမရောက်ပါနဲ့။
အစွန်းရောက်တဲ့ အရာတိုင်းဟာ
ပြုတ်ကျဖို့ ပိုနီးတယ်ဆိုတာ
သတိထားမိပါစေ...။
Credit😊
မေတ္တာဖြင့်
ပြန်လည်မျှဝေပါတယ်။
#ဂမ္ဘီရဆရာအောင်
