04/06/2026
"ဒီအခြေအနေကလည်း ပြီးသွားမှာပါ"
🔳 ဘုရင်ကြီးတစ်ပါးက သူ့ရဲ့ ပညာရှိအမတ်ကြီးကို မေးဖူးတယ်။
"ငါ ဝမ်းနည်းနေတဲ့အချိန် ဖတ်လိုက်ရင် ပျော်သွားစေရမယ်၊ ငါ ပျော်နေတဲ့အချိန် ဖတ်လိုက်ရင် သတိဝင်သွားစေရမယ်... အဲဒီလို အခြေအနေနှစ်ခုလုံးနဲ့ ကိုက်ညီမယ့် စာတစ်ကြောင်းလောက် ရေးပေးပါ" တဲ့။
အဲဒီအခါ အမတ်ကြီး ရေးပေးလိုက်တဲ့ စာသားက "This too shall pass" (ဒီအခြေအနေကလည်း ပြီးသွားမှာပါ) တဲ့။
🔳 လူတွေက ဒုက္ခရောက်နေတဲ့အချိန်ဆိုရင် ဒီဒုက္ခက ဘယ်တော့မှ ပြီးတော့မှာ မဟုတ်ဘူး၊ တစ်သက်လုံး ဒီလိုပဲ နေသွားရတော့မှာလို့ ထင်ပြီး စိတ်ဓာတ်ကျတတ်ကြတယ်။
တကယ်တော့ ညဘယ်လောက်မှောင်မှောင် မနက်လင်းရစမြဲပါပဲ။ မိုးဘယ်လောက်သည်းသည်း တချိန်ကျရင် တိတ်သွားမှာပါပဲ။ ကိုယ်ဖြတ်သန်းနေရတဲ့ အခက်အခဲဆိုတာ ဘဝစာအုပ်ကြီးရဲ့ "အခန်းတစ်ခန်း" (Chapter) ပဲ ဖြစ်ပါလိမ့်မယ်။ စာအုပ်တစ်အုပ်လုံး မဟုတ်ပါဘူး။
🔳 တစ်ဖက်မှာလည်း အောင်မြင်မှုတွေ ရပြီး ပျော်ရွှင်နေတဲ့အချိန်မှာ ဒီစာသားကို သတိရသင့်တယ်။
ကိုယ့်ရဲ့ ရာထူး၊ ကိုယ့်ရဲ့ ငွေကြေး၊ ကိုယ့်ရဲ့ ကျော်ကြားမှုတွေက ထာဝရ မဟုတ်ဘူး။ ရေလှိုင်းတွေလိုပဲ တက်ပြီးရင် ပြန်ကျသွားတတ်တယ်။ ဒါကို သတိမမူမိဘဲ မောက်မာမိလိုက်ရင် ပြန်ကျချိန်မှာ အထိနာတတ်တယ်။
"ငါ့လောက် တော်တဲ့သူ မရှိဘူး" လို့ တွေးမိတိုင်း "ဒီအခြေအနေကလည်း ပြီးသွားမှာပါ" လို့ တွေးလိုက်ရင် ခြေထောက်က မြေကြီးပေါ် ပြန်ရောက်လာလိမ့်မယ်။
🩶 စိတ်ခံစားမှု (Emotion) တွေဆိုတာ ဧည့်သည်တွေနဲ့ တူတယ်။
ပျော်ရွှင်မှုဆိုတဲ့ ဧည့်သည် လာလည်ရင် ကောင်းကောင်း ဧည့်ခံလိုက်ပါ။ ဒါပေမဲ့ သူက ပြန်သွားမယ့်သူဆိုတာ သိထားပါ။ ဝမ်းနည်းမှုဆိုတဲ့ ဧည့်သည် လာလည်ရင်လည်း တံခါးဖွင့်ပေးလိုက်ပါ။ သူလည်း ပြီးရင် ပြန်သွားမှာပဲ။
ဧည့်သည်ကို အိမ်ရှင်အမှတ်နဲ့ စွဲလမ်းထားမိရင်သာ ကိုယ်စိတ်ဆင်းရဲရတာ။ လာသမျှ၊ ဖြစ်ပျက်သမျှကို "ခဏတာပါလား" လို့ ရှုမြင်တတ်ရင် စိတ်က အများကြီး ပေါ့ပါးသွားတယ်။
🩶 အရာရာဟာ အပြောင်းအလဲ (Change) နဲ့ မကင်းဘူး။
ချစ်သူတွေ လမ်းခွဲကြတယ်၊ သူငယ်ချင်းတွေ စိမ်းကားသွားကြတယ်၊ ကျန်းမာတဲ့သူက ဖျားနာလာတယ်၊ နုပျိုတဲ့သူက အိုမင်းလာတယ်။ ဒါတွေက သဘာဝတရားတွေ။
ဒါကို လက်မခံနိုင်ဘဲ "ဘာလို့ ပြောင်းလဲသွားရတာလဲ" လို့ မေးခွန်းထုတ်ပြီး ငိုကြွေးနေရင် ကိုယ်ပဲ ပင်ပန်းမယ်။ ပြောင်းလဲခြင်းကို လက်ခံပြီး လိုက်လျောညီထွေ နေတတ်သူ (Adaptable person) ကသာ ဘဝမှာ အရှင်သန်နိုင်ဆုံး ဖြစ်တယ်။
🩶 ဘဝမှာ အကောင်းဆုံး နေထိုင်နည်းက "အတက်" မှာလည်း သိပ်မပျော်နဲ့၊ "အကျ" မှာလည်း သိပ်မငိုနဲ့ ဆိုတဲ့ နည်းပဲ။
ကောင်းတာတွေ ဖြစ်လာရင် "ကျေးဇူးပါ၊ ဒါပေမဲ့ ဒါလည်း ပြီးသွားမှာပါ"။ ဆိုးတာတွေ ဖြစ်လာရင် "အိုကေ၊ ဒါလည်း ပြီးသွားမှာပါ"။
အဲဒီလိုလေး ထိန်းထားနိုင်ရင် လောကဓံ လှိုင်းတံပိုးတွေ ဘယ်လောက်ကြမ်းကြမ်း ကိုယ့်လှေလေးက နစ်မြုပ်မသွားဘဲ ငြိမ့်ငြိမ့်လေး သွားနေမှာ သေချာပါတယ်။
🩶 သင့်မှာ အဆင်မပြေမှုတွေ ရှိနေလား...?
အားမငယ်ပါနဲ့၊ ခဏနေရင် ပြီးသွားမှာပါ။
ပစ္စုပ္ပန်တည့်တည့်မှာ တည်ငြိမ်စွာ နေထိုင်ခြင်းကသာ အစစ်အမှန်ပါပဲ။ ☘️
#ဉာဏ
December 25, 2025
________________________________________________
ဆရာမဉာဏ၏စာအုပ်များကို City Mart စင်တာများနဲ့ အမြို့မြို့အနယ်နယ် စာအုပ်ဆိုင်များမှာ ဝယ်ယူရရှိနိုင်ပါတယ်။ Online က မှာယူလိုပါလျှင် Page Messenger ကနေ လာရောက်မှာယူနိုင်ပါတယ်။
