01/02/2026
ဝုန်းဒိုင်းကြဲသောင်းကျန်းနေတဲ့ကလေးငယ်
သို့မဟုတ် Toddler Tantrum
••••••••••••••••••••••••••••••••••••••••••••
ကလေးတွေ ခံစားရသမျှ စိတ်ပိုင်းဆိုင်ရာ စိတ်တိုမှု၊ ဒေါသ စတဲ့ခံစားမှုတွေကို ပြသတဲ့ အခြေအနေကို “temper tantrum” လို့ခေါ်ပါတယ်။
Trantrum အမျိုးအစားတွေက အမျိုးမျိုးရှိပါတယ်။
▪️ထိခိုက်ဒဏ်ရာရတာမရှိဘဲ အသားကုန်အော်ဟစ်ငိုယိုခြင်း
▪️စူးစူးဝါးဝါးအော်ဟစ်ခြင်း
▪️ခြေဆောင့်ခြင်း
▪️အရာဝတ္ထုများကိုလွှင့်ပစ်ခြင်း
▪️ကြမ်းပြင်မှာလူးလိမ့်နေခြင်း
▪️အသက်အောင့်ကာ ရှိုက်နေခြင်း စတဲ့ပုံစံတွေနဲ့တွေ့နိုင်ပါတယ်။
💠ကလေးတွေကဘာကြောင့် ဝုန်းဒိုင်းကြဲကြတာလဲ?
လူတိုင်းက စိတ်ဆိုးဒေါသဖြစ်ကြပါတယ်။ ဒါက လူသားတွေမှာဖြစ်တတ်တဲ့သဘာဝပါပဲ။
ကလေးငယ်လေးတွေ အထူးသဖြင့် toddler တွေအတွက် tantrum ဆိုတာ သူတို့ရဲ့ စိတ်ခံစားမှုကို ပြသတဲ့ ပုံမှန်နည်းလမ်းတစ်ခုပါ။
ကလေးတို့ကြီးလာတဲ့အခါမှာ သူတို့ ဦးနှောက်ရဲ့ စိတ်ခံစားမှုအဓိကဗဟို (emotional centre) က ဖွံ့ဖြိုးလာပြီး အလိုမကျမှုတွေကို ထိန်းချုပ်ခြင်း၊ သူတို့ လိုအပ်ချက်တွေကိုဖော်ပြခြင်း၊ သူတို့ကိုယ်သူတို့ဖော်ပြခြင်း စတာတွေကို သင်ယူနေခြင်း ဖြစ်ပါတယ်။
💠ကလေးတွေ tantrum လုပ်တတ်တဲ့ အခြေအနေတွေ
▪️မိဘက "မလုပ်ရဘူး” လို့ ပြောတဲ့အခါ
▪️သူတို့ဖြစ်ချင်သလို အခြေအနေတွေ မဖြစ်လာတဲ့အခါ
▪️ခက်ခဲတဲ့အလုပ်တွေကို လုပ်ရင်း မရတဲ့အခါ
▪️လိုချင်တာကို စကားနဲ့ ဖော်ပြလို့မရတဲ့အခါ
▪️ဗိုက်ဆာခြင်း၊ ဝမ်းနည်းခြင်း၊ မောပန်းခြင်း၊ စိတ်ဖိစီးမှု (stress) သို့မဟုတ် စိတ်ပင်ပန်းနေခြင်းစတာတွေကြောင့်ဖြစ်ပါတယ်။ ဒါပေမယ့် ဘာအကြောင်းရင်းမယ်မယ်ရရမှမရှိဘဲလည်း ဖြစ်တတ်ပါသေးတယ်။
ကလေးတွေက မိဘကို တမင်စိတ်ဆင်းရဲစေချင်လို့ တမင်လုပ်တာမဟုတ်ကြပါဘူး။ သူတို့အနေနဲ့ စိတ်ခံစားမှုပိုင်းဆိုင်ရာတွေတိုးတက်လာဖို့ သင်ယူနေကြတာပါ။
💠ကလေးတစ်ယောက် tantrum ဖြစ်နေရင် ဘာလုပ်သင့်လဲ?
▪️စိတ်တည်ငြိမ်အောင်ထားပါ
Tantrum ကို ကိုင်တွယ်ရတဲ့အချိန်မှာ စိတ်
အေးအေးထားဖို့ဆိုတာ အမြဲလွယ်ကူမနေပါဘူး။ဒါပေမယ့် အရေးကြီးပါတယ်။ ဘာကြောင့်လဲဆိုတော့ Tantrum ကို ကြုံတွေ့ပြီး ကိုယ်က ဒေါသနဲ့တုံ့ပြန်ရင် ကလေးရဲ့ ကြီးမားတဲ့စိတ်ခံစားမှုပေါ်မှာ ထပ်လောင်းတိုးသလိုဖြစ်သွားပြီး Tantrum ကပိုဆိုးတတ်လို့ပါပဲ။
▪️ဆုံးဖြတ်ချက်ကို မလွဲမသွေချမှတ်ထားပါ
ဥပမာ – မိဘနဲ့ ကလေးတစ်ယောက် စျေးဝယ်နေတုန်း အားလုံးက အဆင်ပြေပြေ ဖြစ်နေတယ်ဆိုပါစို့။ ကလေးက သူလိုချင်တဲ့ အရာ(အရုပ်ဖြစ်ဖြစ်)တစ်ခုကို မြင်လိုက်ရမယ်။
ဝယ်ခိုင်းမယ်။ မိဘက “မရဘူး” လို့ ပြောပြီး ကလေးကို အဲဒီအရာကို ပြန်ထားခိုင်းမယ်။ ကလေးက မလိုက်နာဘဲ ငိုကြွေးတာ၊ ခြေဆောင့်တာ၊ လူးလှိမ့်တာတွေလုပ်တဲ့အခါ မိဘကဝယ်ပေးလိုက်ပါတယ်။ ဒါဆိုရင် ကလေးက Tantrum ဖြစ်တဲ့အခါ လိုချင်တာကို ရနိုင်တယ်လို့ထင်သွားတတ်ပါတယ်။ ဒါကြောင့် ကိုယ်က Yes or No မပြောခင် သေချာတွေးပါ။ ပြီးရင်တော့ ဆုံးဖြတ်ချက်အတိုင်းတည်ဖို့လိုအပ်ပါတယ်။ ကလေးကို ရှည်ရှည်ဝေးဝေးရှင်းပြတာ၊ အကြာကြီးချော့တာက ပြောင်းပြန်ရလဒ်တွေပေးနိုင်လို့ တိုတိုရှင်းရှင်းပဲရှင်းပြသင့်ပါတယ်။ ဒီအချိန်ဝယ်လို့မရသေးကြောင်း၊ မပေးနိုင်ကြောင်းကိုသာ တည်တည်ငြိမ်ငြိမ်နဲ့ပြောပြရပါတယ်။
▪️နောက်တစ်ခုကတော့ ကလေးတွေ Tantrum ဖြစ်နေစဉ်မှာ အလွန်အမင်းသင်ကြားခြင်းနှင့် ရှင်းပြခြင်းကို ရှောင်ပါ။ ကလေးက စိတ်ဆိုးနေချိန် သို့မဟုတ် စိတ်ပင်ပန်းနေချိန်မှာ အများကြီးရှင်းပြခြင်းဟာ မကောင်းပါဘူး။ သူတည်ငြိမ်တဲ့အချိန်၊ Relax ဖြစ်ချိန်မှသာ နားလည်အောင်ရှင်းပြသင့်ပါတယ်။
Tantrum မဖြစ်စေဖို့တော့ အလုံးစုံတားလို့မရပါဘူး။ ဒါပေမယ့် ဖြစ်တာတွေနည်းလာစေဖို့ သူတို့ရဲ့ခံစားချက်လေးတွေကို စကားနဲ့ဖော်ပြတတ်ဖို့ ကူညီပေးသင့်ပါတယ်။
💠Toddler Tantrums က ဘယ်အချိန်မှာ စိတ်ပူရမလဲ
Toddler tantrum တွေဟာ ကလေးငယ်ရဲ့ ဖွံ့ဖြိုးမှုအတွက် သာမန်အစိတ်အပိုင်းတစ်ခုပါပဲ။Tantrum များက ၁၂ လအရွယ်မှာ စတင်နိုင်ပြီး ၂ နှစ်အရွယ် ကလေးတွေအတွက် ပုံမှန်ဖြစ်တတ်ပါတယ်။သုတေသနများအရ ၃–၄ နှစ်အရွယ် ကလေးတွေမှာ တနေ့ကို ပျမ်းမျှတစ်ကြိမ် tantrum ဖြစ်တတ်ကြောင်းတွေ့ရှိရပါတယ်။ကလေးတိုင်းက မတူညီပါဘူး။ tantrum ပိများသည့် ကလေးများလည်း ရှိနိုင်ပါတယ်။ မိဘတွေရဲ့ စိတ်ရှည်သည်းခံမှုနဲ့ handle လုပ်နိုင်မှုပေါ်မူတည်ပြီး tantrum များကို နည်းလာစေနိုင်ပါတယ်။ ကလေးတွေ စိတ်ခံစားမှု၊ လိုချင်မှုကို ထိန်းချုပ်သင်ယူခြင်းနှင့် ပြဿနာဖြေရှင်းနည်းများကို သင်ပေးနိုင်ပါတယ်။
🔺ကလေးကိုရိုက်နှက်ဆုံးမခြင်း၊ အော်ဟစ်သောင်းကျန်းခြင်းများကိုရှောင်ပါ။
🔺ကလေးအနေနဲ့ Tantrum များကို ထိန်းချုပ်ကိုင်တွယ်မရခြင်း၊ ကိုယ်နှုတ်အမူအရာများ လွန်စွာကြမ်းတမ်းနေတာကို မိဘများက မသင်ကြားပေးနိုင်ခြင်းများရှိနေရင်တော့ ပညာရှင်များရဲ့ အကူအညီကိုရယူနိုင်ပါတယ်ရှင်။
ဇနီးမောင်နှံ၊ မိသားစု၊ သူငယ်ချင်းနဲ့ ဆွေးနွေးကြည့်နိုင်ပါတယ်။ ကလေးအများစုမှာဖြစ်တတ်တာမို့ အလွန်အမင်းစိတ်မပူဖို့တော့လိုအပ်ပါတယ်ရှင်။
အားလုံးကျန်းမာပျော်ရွှင်ကြပါစေ။
မောင်(ဆေး-၁)မာမီ
✅စာများကို လွတ်လပ်စွာ share နိုင်ပါတယ်။ ခွင့်ပြုချက်တောင်းရန်မလိုပါ။
❗️တစ်ဆင့်ပြန်လည်ကူးယူဖော်ပြခြင်းမပြုရန်မေတ္တာရပ်ခံပါတယ်။
စာဖတ်သူများသို့မေတ္တာရပ်ခံချက်💕
ကျွန်မရေးသားသောဆောင်းပါးများနဲ့ ထုတ်လွှင့်သော ဗီဒီယိုများဟာ အယူအဆမှားတွေများတတ်တဲ့ လူမှုကွန်ယက်မှာ မှန်ကန်တဲ့ကျန်းမာရေးဗဟုသုတရရှိစေဖို့သာ ရည်ရွယ်ပါတယ်။ တစ်ဦးချင်းစီရဲ့ ကျန်းမာရေးပြဿနာများအတွက် အဖြေရှာရန်မဟုတ်ပါဘူး။
ဒါ့အပြင် ပြင်ပမှာပြသနေတဲ့ ဆရာဝန်များရဲ့ ကုသချက်၊ ဆေးပညာအကြံပြုချက်များနေရာမှာ အစားထိုးလို့မရပါ။ မိမိကိုယ်တိုင် သို့မဟုတ် မိမိကလေးငယ်ရဲ့ကျန်းမာရေးနဲ့ပတ်သက်ပြီး စိုးရိမ်မှု၊ သီးသန့် ဆွေးနွေးလိုသော အခြေအနေများရှိပါက ကိုယ်တိုင်ပြသနေသောဆရာဝန်များနှင့်သာ တိုင်ပင်ရမှာဖြစ်ပါတယ်။ အရေးကြီးလက္ခဏာများရှိပါကလည်း နီးစပ်ရာ ဆေးခန်း/ဆေးရုံမှာ သွားရောက်ပြသရမှာဖြစ်ပါတယ်ရှင်။
