06/02/2021
Хэрэгтэй мэдээлэл байна шүү ээжүүдээ🤱🏻
Нярайн гэдэс дүүрэлтэнд нөлөөлдөг шалтгаануудаас:
Хөхний сүүний эхний хэсэг нь өөх тосны агууламж бага, шингэн, цэхэр бөгөөд лактоз агуулсан байдаг бол хүүхэд түүнийг хөхсөний дараа араас нь тослог ихтэй өтгөн шаргал сүү гардаг. Энэ нь хөхөнд сүү нь нийлэгжих явцдаа түүнд агуулагдах тослог нь эдэд нэвчиж, харин усархаг шингэн хэсэг нь хөхний толгой хэсэг руу нүүсэнтэй холбоотой. Хөхнийхээ сүүг дуустал хөхүүлэх нь хүүхэд эхний ба төгсгөлийн сүүг тэнцвэртэй харьцаатай хөхөх боломж олгож, сүүний шингэцийг сайжруулдаг.
Гэтэл нэг удаадаа нэг хөхөө дуустал биш, хоёр хөхөө ээлжлэн хөхүүлэх үед хүүхэд зөвхөн эхний сүүг хөхнө. Эсвэл сүү ихтэй ээжийн хувьд хүүхэд эхний сүүгээрээ ходоодоо дүүргэж, төгсгөлийн сүүгээ хөхөхгүй байдал үүсдэг.
Нярайн хүүхэд их хэмжээний сүүний сахарыг (лактозыг) задалж боловсруулах фермент нийлэгжүүлэх чадваргүй тул энэ нь гэдэс дүүрэх, яраглаж янцаглах, гэдэс нь өвдөж уйлах, ихээр гульгих, олон удаа (хөхсөн даруйдаа) усархаг ногоон, хөөстэй ”буудаж” баах, жингээ зохих ёсоор нэмэхгүй байх, исгэлэн хүчиллэг бааснаас бөгсний арьс түлэгдэж үрэвсэх шалтгаан болдог.
Энэ байдал олон хоног/долоо хоногоор үргэлжлэх нь нарийн бүдүүн гэдсний салстыг цочроон үрэвсүүлж улмаар цустай баахад ч хүргэнэ.
Гэхдээ хүүхэд дунджаар 3 сар хүрэхэд сүүний сахарыг (лактозыг) задалж боловсруулах ферментийн нийлэгжилт нэмэгдэж, нэг удаадаа хөхөх хугацаа уртсан эдгээр шинж аяндаа намждаг.
Хөхний сүүний гарц хэт их байх нь эхний ба төгсгөлийн сүүний тэнцвэр алдагдах үндсэн шалтгаан болдог. Заримдаа ээж нар “би сүү ихтэй боловч хүүхэд маань жингээ сайн нэмэхгүй байна, миний сүү шим тэжээл муутай бололтой” гэж хэлдэг. Үнэндээ бол шим тэжээл муутай сүү гэж байдаггүй, бүр тураалтай эхчүүдийн сүү ч хангалттай шим тэжээлтэй.
Дээрхи зовиурууд байгаа тохиолдолд нэг хөхөө сулартал хөхүүлсний дараа нөгөө хөхөө хөхүүлэх, сүү ихтэй ээжүүд эхний сүүгээ сааж хөхүүлэх нь хүүхдэд илрэх дээрх шинж тэмдгүүдийг намжаахад тустай.
Сүү ихтэй ээжүүд сүүгээ сааж хорт хавдартай, эрхтэн шилжүүлэн суулгасан, элэгний хүнд өвчтэй, харшлын хүнд эмгэгтэй, бөөрний дуталд орсон, томоохон хагалгаа хийлгэсэн, хүнд түлэгдсэн, амьдралын төгсгөлийн шатанд буй өвчтөнд хандивлаж болохоос гадна өөрсдөө нүүр цэвэрлэгч сүүн шингэний оронд ашиглахыг зөвлөж байна.
Б.Эрдэнэцэцэг
